親子工作坊

今日同小慈一齊返去學校參加親子工作坊, 由資深社工主講, 主題係 "孩子需要有界線的父母"

呢個題目好吸引, 大家都唔希望屋企養左隻小霸王, 小王子, 小公主, 小太陽, 5 筒 (孩子係中心俾爸爸媽媽爺爺嫲嫲圍住), 金叵籮 (升值左而家叫鑽叵籮), 一家之主 (小孩作主), 仲有香港獨有名詞 "港孩" (真係好難聽, 我成日以為叫緊 "港燦")  以前 1 個湊 7 個小朋友, 而家 7 個湊 1 個小朋友, 好矜貴個個都錫, 好想保護佢, 小朋友除左成績好咩都可以唔駛理, 於是衣來伸手飯來張口, 遇到問題唔識解決形成三低局面!  有見及此, 今次工作坊報名人數超標要抽籤先有得參加, 對於鍾意聽講座既我黎講, 抽中真係好開心!!  人地話讀萬卷書不如行萬里路, 我就話教仔冇方程式, 個個小朋友性格都唔同, 所以聽多 d 問多 d 係冇壞!

親子遊戲 (一) 障礙賽

請小朋友頭頂豆袋, 手用匙羹運乒乓球再穿過障礙物!  可想而知, 小朋友要顧住個頭唔好跌豆袋, 又要睇住個波唔好跌, 非常輪盡, 小慈唔要我幫佢, 所以我冇扶佢, 見佢走到老遠執波我先幫佢執豆袋, 小慈仲玩到卡卡笑 XD  

不過原來有家長由頭到尾都幫小朋友凌空吊住頭上個豆袋, 見微知著, 社工帶出遊戲主旨 --

連玩遊戲你都會忍唔住幫佢, 想佢快 d 完成, 想佢贏, 覺得佢細個做唔到, 會唔會就係咁樣不自覺過份保護左佢呢? 

穿越所有障礙物後有一隻信封, 原來入面係七巧板, 請小朋友砌番個正方形出黎, 自己解決問題, 家長從旁協助

媽媽我係有數學幾何形狀缺憾, 砌左一半攪唔掂, 好在有周主任出手相助

親子遊戲 (二) 耍盲雞 

家長要矇眼, 由小朋友引領家長搵預先貼左係牆上面既紙仔 (食物券) 換取小食!  呢個眼罩係屬於我既, 只係小慈見我戴得咁攪笑佢又想試下, 即刻影低佢個可愛樣 ^^

開始時小慈未明白遊戲規則, 一支箭標左出去自己搵紙仔, 留低左戴住眼罩摸黑中既我係路中心 @.@  佢仲大叫 "媽媽過黎呀~~~"

咁多個媽媽邊度知你叫緊我?!  於是我伸隻手出去佢先識返黎拖我去搵, 好在小慈一點就明, 超快搵齊 4 張食物券換美食

家長矇眼俾小朋友引路對我黎講係一個新體驗!  我真心驚, 唔係好信小慈又唔係好放心 (我當然冇表現出黎)!!!  不過今次小慈表現出佢都好可靠, 平時同佢默契都唔錯, "聲控" 佢都做得到!  

社工帶出呢個遊戲主旨 --   

父母係要將是非黑白規矩教導小朋友 (有界線), 係帶領小朋友前進個一個, 如果咩都俾小朋友話事, 覺得咁先係民主自由, 結果就等於自己矇住隻眼俾小朋友拖你去邊就去邊, 佢話做咩你就做咩, 小朋友都唔識你又俾佢話事, 做左一家之主, 冇晒方向目標好易撞牆!

小慈既戰利品

對我黎講, 信任小慈有能力做好都係一種向上既推動力, 慢熱無自信既小慈由 BB 開始已經絕對需要鼓勵, 好多野都要忍心, 放手放心俾佢去做!  有時我都會扮矇扮傻做錯晒 d 野等佢指出我既錯處, 教番我轉頭佢就會好自豪, 好開心, 自信返晒黎  XD

遊戲 (三) 親子圖工 

材料全部都係小朋友自己揀, 家長從旁指引小朋友做一幅掛畫,  我畫畫麻麻即時鼓勵小慈成幅畫自己攪掂 XD  真係幫佢唔到!  我淨係教佢點樣黐條繩係後面等幅畫可以掛起, 膠紙都係佢自己貼!  原來小慈都可以不求人!  Good!!  Well done!!  Excellent 呀, 女~~

小慈畫我地一家四口拖晒手, 仲有用絨鐵線捲 Jimmy 出黎, 由爸爸用手抱住

社工最後總結: 

教仔要狠而不狼, 態度可以溫柔, 但係立場要堅定!!  

唔係要你好惡, 唔係要你返去鬧佢打佢好嚴厲, 唔係狼死, 係要狠心, 要堅持!!  一個好簡單既例子, 家長見小朋友食飯食得慢, 把口就叫佢食快 d 但隻手已經餵左佢食, 呢個就係唔堅持!! 

唔係要你好惡鬧佢, 可以協商 20 分鐘入面食晒, 千奇唔好心急, 因為永遠都係皇帝唔急太監急, 最緊要堅持, 定立一 d 規則大家都覺得舒服, 定左就要執行, 俾機會小朋友嘗試, 放手, 往往有意外驚喜~~

我真係有驚喜!!  今次工作坊我發覺我非常欣賞我個女!!  由一個成日喊, 咩都要媽媽媽媽既小朋友, 變成而家已經充滿自信, 咩都會自己嘗試, 唔識先搵人幫手!  又會投入參與遊戲, 就算玩到論論盡盡都卡卡笑, 好樂觀, 真係成熟左!!!

媽媽非常欣賞你呀, 小慈!!!