Frankie 叔叔一個月前已經約定大家燒野食, 真係約都冇咁岩, 預都冇咁準, 今日絕對係非常適合 BBQ 既一日!! 天氣 17-23 度, 有太陽吹微風, 舒服到不得了!! 我地今日去左大尾篤再入少少既新娘潭, 邪邪地, 好多交通意外因為條路飛車一流, 絕對要打醒十二分精神! 不過呢度真係好舒服!! BBQ 既地方見到個潭, 仲有個小沙灘, 夫復何求?!
早到既朋友仔唔理三七廿一, 醫肚先~
兩個爐既好處, 一個爐加緊炭, 另一個勢必人頭湧湧 :DD
Frankie 叔叔係今日既大廚, 所有食材都係自己醃, 獨家配方唔講得笑, 腐乳雞翼, 白膳開邊點鰻魚汁我都係第一次食, 超好味!
仲有乾嫂煲既蘋果雪梨湯 and 老公燒左半個鐘既金沙骨, 甜晒~~
大人有大人燒烤, 小慈小明見到個 "海" 已經衝左落去, 開心到不得了!
呢位小姐又要玩, 又嫌棄 d 沙入腳, 玩兩野就走去洗鞋洗腳, 終於玩到襪都濕埋
望住大自然既景色真係心曠神怡, 好舒服
我一叫弟弟, 弟弟就會自動波同我講 "笑~~~~"
玩掉石頭, 但遠處有人釣緊魚唔好攪亂檔, 入內彎掉唔好嚇走晒人地 D 魚
將石頭掉落海, 如果水花彈到自己小慈就會笑成咁!
弟弟將方圓數十里既石起勢咁掉晒落去, 練臂力之餘仲幫手填海
周圍執石頭時竟然俾我地發現有神秘嘉賓 -- 野生巴西龜仔係度曬太陽!! 遠睇好似一塊葉! 釣魚發燒友話應該岩岩出世冇耐, 個殼仲係軟既!
執上手個時佢地完全唔郁以為係死龜, 點知一放入盒仔就活潑非常, 真係有衝動想帶佢地返屋企陪 Jimmy
比小明隻手仲要細, 你睇下 d 巴西龜真係好 BB
考察一陣就將佢地放生, 呢隻游走左又游返轉頭好似同我地 say goodbye 咁, 要好好活下去呀!!
玩左咁耐係時候要食 d 野補充體力, 弟弟淨係要麵包, 腸仔, 雞翼, 棉花糖
小慈一個人獨食
咁慘, 過黎一齊 BBQ 啦! 其實係佢對鞋濕左赤腳冇得走, 要爸爸抱佢坐大脾
食左少少野又要出去玩喇
去郊外一定吹 bubbles, 不過我地個 Bubble 抽氣扇無電, 一班大小朋友就地取材用飲管吹
效果都唔錯啊
名副其實雙管齊下
遙控車都好好玩
上落斜坡危險, 辛苦晒工人姐姐抬住小明上上落落
隻衰豬好似甩繩馬騮咁通山走, 一直玩到 5:30 pm 都唔肯瞓覺, 要我夾住佢呢埋一邊靜靜地, 仲要應承佢瞓醒再玩沙再玩掉石頭先霹拍一聲瞓著! 快叉左半個鐘又玩過!
餘慶節目 -- Frankie 叔叔表演沖茶餐廳港式奶茶!!
架生齊全!!! 我鍾意呢 d 厚杯, 真係正宗茶餐廳!!
大家望住個潭嘆茶, 爽呀~~~~~
天黑了~
今日真係好開心, 好盡慶! 小慈小明非常鍾意大自然, 多謝 and 辛苦晒 Frankie 叔叔好介紹 :)
沒有留言:
張貼留言