小慈N1旅行

小慈學校今日去假日農場旅行, 爸爸終於有得參加!!

真係冇估到呢間學校會有 2 次旅行, 上次 11 月旅行撞正爸爸既好朋友結婚, 佢要由朝到晚咁幫手做司機, 唔想錯失大好機會認識小慈學校既老師同學, 籮咁大個肚既我都要報名參加!

爸爸上一次好唔開心架, 因為我地盡量都唔想錯失小慈既第一次, 估唔到竟然有機會補償, 所以爸爸今日超開心 ^^

假日農場原來好好玩, 我地已經事先報名參加自製手摝拉麵, 稻草人製作 & 創意焗麵包, 爸爸而家整緊稻草人

3 樣都咁好玩!  小慈極喜歡佢自己整既麵包

場地又大又原始, 一大塊田又有牛又有羊又兔仔真係唔係浪得虛名呢

熱愛淋花的小慈

兔仔好肚餓呀

三色山羊好狼死, 都係唔好餵佢地喇

農場仲有自製好多千秋, 草馬, 小吊籃, 激波船, 阿拉飛氈.... 

磨粟米

全部都係用環保物料製造

呢個飛索好刺激

小慈呢張相好靚女啊~

阿拉飛氈快到有離心力, 但小慈個樣好淡定

小慈既兩個班主任: 陳老師 and 郭老師, 多謝你地平日咁照顧小慈呀 ^8^

我地真係好欣賞呢度又原始又環保

小慈由朝玩到天黑興奮到唔駛瞓晏覺, 終於上到旅遊車先頂唔順瞓左一陣, 返到屋企就精神晒!  極度掛住弟弟又攬又錫, 幾咁肉緊地攬住弟弟個頭, 做媽媽既真係好安慰呀 ^^

你睇小慈

弟弟今日 d 攣毛好攪笑, 呢張相成個八爪魚頭咁呀 

close up 睇真 d

傻笑的肥仔

仲想學人坐, 不過條腰唔夠力就自我摺埋 

全家都玩到又攰又餓, 即刻煮左今朝整個個手摝拉麵黎食

味道唔錯, 小慈食左好多

我真係越黎越鍾意呢間學校, 校園雖然細, 但老師全部都有愛心, 學校又成日舉辦好多活動令到小朋友投入開心咁返學, 真係好難得!

幼稚園既生活應該係快快樂樂咁渡過架麻, 童年應該係愉快無憂既~~

弟弟笑到卡卡聲 ^^

嘩~~  今日真係好開心!!  放工返屋企撩弟弟玩, 如常地同佢玩下 PeeKaBoo, 吱下佢, 又整 d 怪聲, 點知弟弟勁興奮, 手 fing 腳撐, 笑到卡卡聲, 好 cute 呀!!

小慈都話自己笑到咪晒眼好靚, 叫我影佢

兩姐弟可以越來越多互動了

要相親相愛啊!

我要戴口罩呀~~

因為來勢洶洶既豬流感 (已經改名為甲型流感 H1N1, 但都係豬流感個名型 d ), 小慈返學要量體溫之餘仲要全日戴口罩

不過小慈由新年開始咳, 學校已經要求放口罩係書包以備不時之需, 再加上工人姐姐呢幾日病 係屋企戴口罩小慈已經好 "恨", 所以當老師要小慈戴左口罩先可以入課室, 而我又係書包裡面 "變" 左個口罩出黎既時候, 小慈係好驚喜既 @.@

萬萬都估唔到小慈鍾意得個口罩咁緊要!  一早起身牙都未擦已經話:

"我要戴口罩呀~~"

氹佢返到學校先戴, 點知到放學搭火車返到屋企都唔肯除!?! 

平時放學會俾少少零食如: 餅仔, 果仁, 軟糖咁, 俾小慈一路食一路行番返屋企咁架麻, 我咪同佢講,

"食果仁除口罩啦, 好唔好?"

小慈竟然同我講: "唔駛架, 媽媽!"

跟手就拉低個口罩去下巴, 露出個嘴自自在在咁食果仁, 食完又拉番個口罩上去戴住!!!

真係嘆為觀止~~~ 

牙仔痕

見弟弟成日食手又俾我地阻止咁凄涼, 於是買左 2 個牙膠俾弟弟咬下

肉緊到佢.....

咬到成身濕晒, 換過件衫又咬過

欲罷不能

未係好識操控對手將牙膠放入口, 都係食手指開心 d

小慈見我同弟弟影相佢又要影

手拖手感情深厚

忍唔住仲要錫啖 ^8^  攬攬錫錫一直都係我既嗜好, 作為我既仔女, 當然不能幸免, 小慈成日都勁錫弟弟 

今晚瞓覺前又係勁啜小慈既時間, 初時小慈都冇咩野, 當我左左右右上上下下錫過一次再 repeat 之際, 小慈用手遮住自己塊面, 其實我已經想笑, 不過繼續啜佢, 連手仔都錫埋, 於是, 小慈出聲勒:

"額頭要黎啜架!"  

聽佢咁講, 我咪繼續錫羅, 小慈又再講多一次, 我又錫....

終於, 小慈 "嘟~~~" 左一聲, 我先意會到佢指用耳探探熱,  係額頭 "嘟~~~" 一聲探熱..... 唔係啜......

噢~~  會錯小慈意添!  不過, 我係唔會認錯既, 而家唔啜更待何時  ^^

弟弟笑出聲

工人姐姐病左, 由少少傷風演變成頭痛發燒, 最後連聲都變埋, 姐姐已經主動日日戴口罩怕傳染俾我兩個小寶貝, 不過有病梗係要睇醫生, 我今日冇返工俾時間姐姐去診所之餘, 我仲湊埋弟弟, 等姐姐休息下

連埋公眾假期, 其實我都已經湊左弟弟幾日架勒!  佢係一個好乖既 BB, 而家飲奶超快, 又定時, 食飽又會瞓一陣, 又唔駛點噯, 瞓左又可以放落床仔唔駛攬住瞓, 瞓醒會叫我, 一埋去床仔問佢咩事已經笑定先, 超級可愛 :DDD 

異性相吸, 弟弟好明顯係鍾意我同工人姐姐抱, 爸爸抱就會扭黎扭去, 不過有時我分身不暇, 弟弟都會將就俾爸爸噯佢瞓, 只係時間要長少少, 算乖, 好易捉到佢想點

弟弟又好鍾意企, 對腳會撐到直一直咁, 有時仲跳高, 好有力!  今日爸爸抱佢企直時, 我路過埋去吱佢隔肋底, 弟弟 "卡" 左一聲咁笑出黎 ^^ 

我好開心呀!!  平時佢笑只係咧嘴笑, 冇聲架, 估唔到今日 "卡" 左一聲!  不過再吱都已經冇聲了, 好珍貴既第一次!

參加 A Force 復活 Party

秋秋班舊同事真係好長情, 雖然大家已經離開左舊公司, 但成為朋友既佢地周不時都會有聚會聯絡感情, 今日就約左去尖沙咀一間樓上 cafe 包場玩, 我地搭馬鐵出尖沙咀都好快

弟弟學識用手拉玩具

你睇佢幾肉緊!

小慈羅住個相機周圍同姨姨叔叔影相

好友相聚就是開心!

兩個小寶貝

今日心血來潮, 搵番兩個既相黎比較下, 發現結果都好有趣 ^^

 

大家認到邊個係小慈?  邊個係小明呀?

故事咭

今日公眾假期賦閒在家, 又覺得小慈既語言能力已經到達一個水平, 於是羅左 d 故事咭出黎同小慈講故事!  我將 d 咭分別入左好多個唔同顏色既信封裡面, 請小慈揀信封, 同埋抽出信封入面既故事咭, 小慈表現得好興奮!

講完第 1 個故事, 小慈已經要學我講故事!  嘩~~ 最好不過啦!  我就係想睇下佢既吸收力去到邊麻!  唔錯喎!  講得番 7 成, 至少講到個故事主旨!  跟住仲要我一個接住一個咁講, 講晒咁多隻信封仲要 repeat.... 

"媽媽, 再黎過!"

足足講左 45 分鐘呀!  原來佢可以咁好耐性, 坐定定冇郁過 ^^

瞓醒晏覺, 小慈同我講: "媽媽, 我想睇爸爸個 d 買報紙"

??? 咩話 ??? 

小慈話: " 我想睇爸爸同哥哥個 d 買報紙, 俾錢呀!"

原來小慈想睇故事咭, 爸爸帶哥哥去 7-11 買報紙係其中一個故事內容黎架!  小慈唔記得個 d 叫 "故事咭" 就同我講番個 d 故事主旨, 真係好 cute 呀佢, 亦都代表佢真係好鍾意呢 d 故事 

係岩既時候俾岩既野佢, 引發到佢既興趣, 事半功倍  ^^

參加心心姐姐 8 歲生日會

心心姐姐第一次開生日會請埋我地, 地點係翠擁華庭會所, 場地佈置, 食物安排, 遊戲禮物全部都係心心既爸爸媽媽一手包辦, 好厲害!  心心姐姐英文名叫 Ella, 好好聽呢 :)

小慈有 balloon 玩好開心

準備玩踩波波

成班小朋友玩遊戲玩到 high 晒叫到好大聲, 弟弟原本瞓著都嚇醒, 大家都好鍾意佢個面珠 dun ^^

大合照~~ 祝心心生日快樂, 身體健康, 游水羅金牌!

壓軸玩現時最 hit 既 Pinata, 揮刀一斬就跌晒 d 糖出黎, 好好玩

仲有好多禮物, 真係多謝晒你呀心心姐姐, 我地玩得好開心 ^^

肥脾

天朗氣清, 陽光普照, 係時候換季勒! 

執衫時發現好多衫未著過已經唔岩著 @.@  好在媽媽我一直奉行用得唔好徙既原則, 差不多所有衫都係其他姨姨俾既, 而家唔岩著既衫唯有遲 d 又送俾其他岩用既朋友仔啦~  It's a circle of clothes :DDD

弟弟今日著左件露脾夾衣, 嘩~~  原來佢對脾脾真係好肥美!! 

用尺一度, 勁呀!  大脾有 9 寸半!!  真係想咬佢一啖!  心口都有肉架, 19 寸胸, 20 寸腰, 腳長 30 cm, 腳板仔 9.5 cm   係唔係好標準既身型呢?  弟弟一直都係 keep 住係 75 線, 岩架勒, 肥少少夠架勒, 太肥好似米之蓮咁就唔得意 :)

另外, 弟弟呢幾日好鍾意互握雙手, 放佢瞓係平地佢一定同自己握手跟住就反身 (向左碌, 單邊咋), 之後仲腳撐撐好似想爬咁, 動作快到冇人有!  最鍾意瞓低換片時反過不停, 有時要軍事震壓先可以同佢換到片  @.@

今日係 5 月 1 日公眾假期, 著番條褲就去街

帶弟弟搭火車, 佢 d 攣毛係陽光下大圈大圈咁, 超得意呀 ^^

牙痕又咬下唇了!  弟弟, 要忍耐呀!

好可愛呀你 ^8^