Party Room

秋秋既堂細佬移民左去加拿大好幾年, 今年第一次全家返香港, 好想約出黎見下面, 仲話搵 D 活動一齊玩!  本來想去釣蝦, 點知竟然全部執笠冇間留低!?  於是改去 Party Room, 小慈就跟同學仔去過, 我地第一次去 Party Room 玩咋 :)

位於觀塘既 Party Loft $35 位任玩 3 小時包飲品, 地方開揚唔錯喎!

今日係 Kwok's Family gathering!

鋤 Dee 既鋤 Dee

唱 K 既唱 K, 姑媽s 好訝異小慈小明識唱咁多舊歌 :)

呢部足球機都好受歡迎, 玩到枱都抬起埋

好大隻麻雀好攪笑呀!  打風時教過小慈玩而家仲記得, 非常努力食左兩舖添!  我就食白果

打機係必然架啦, 小明好開心可以玩太鼓達人, 學左打鼓一排真係打得有板有眼呢!

Mario 都好受歡迎, 大家玩到目不轉睛

第一次玩 VR, 絕對需要大人在旁邊攬住, 太投入既小朋友好容易出界跌親

爺爺有四兄弟, 大哥在漳州, 二哥在深圳, 得爺爺同細佬阿叔在香港, 四兄弟都各自生一仔一女, 爺爺同阿叔既小朋友年齡好近, 一年生一個, 又一齊住, 所以呢 4 位堂姐弟特別好感情, 一齊長大, 而家各自又生小朋友, 年齡又係差不多, 投契啊!

晚餐行過隔離食私房菜, 好多海鮮不過價錢唔平, $355 x 12 位套餐, 最驚喜係隻菠蘿鳥, 好得意呀!

左邊既 Haylie 9 歲, 晞晞、昊昊、小慈一樣大, 12 歲, 小明 10 歲, 郭家新生代

因為今日打機已經打左成個下午, 為近視著想, 飯後唔俾再攞電話出黎, 佢地終於肯玩番 D 原始遊戲 Hamburger

堂細佬話會返香港密 D 架喇, 唔會 4 年先返一次喎!  下次見~~