死而復生的天台花園

天台, 一直都覺得用黎曬衫同種花係最理想既地方, 點知我每次上天台都俾蚊咬到變豬腿, 令我對天台卻步, 就算上去都要重裝備著晒長衫長褲, 更要做快閃黨唔會逗留所以冇幫手打理, 秋秋亦要返工做足 12 個鐘對天台既小植物都疏於照顧, 係 day off 先上去望下, 一個冬天就花草凋零慘不忍睹..... 點知, 我地換左個新姐姐之後, 佢極度喜愛我地個天台日日都上去巡幾轉 (唔知點解 D 蚊唔咬佢噃....) 姐姐又幫手淋花除草, 終於, 我地個天台花園在春天翻生喇!!!

怕羞草種子發芽, 落地開花生到成塊葉都係 BB, 玫瑰花茉莉花菊花盛放, 連豬籠草我地諗住佢已經死左, 點知重生不特止, 仲隻隻豬籠有十幾廿隻螞蟻 @.@ 有野食所以美貌更勝從前, 好開心呀!

有次經過花檔嗅到茉莉花好香, $10 買左一扎返屋企, 放左兩三日就冇, 秋秋話 $10 買一扎, $20 可能買到一盤, 自己種咁就長開長有化算好多啦!  好, 經過花墟就買左 $25 一盤返屋企, 燦爛完一個夏天, 冬天我又以為佢死左, 而家又開番喇~~~

弟弟最開心就係我地既盆栽吸引到螳螂不停返黎生蛋, 簡直係變左螳螂養殖場

See?  又有一隻!  螳螂最鍾意士多啤梨盆, 因為香, 吸引好多螞蟻同埋其他小昆蟲俾佢地捉黎食

螳螂所向無敵係昆蟲界既大佬, 所以佢地唔驚人, 經常俾小慈小明放上手心玩

舊年買既小慈生日桃樹, 食晒幾粒小桃之後就無以為繼, 連原本個枝主幹都枯埋仲雜草叢生, 小慈正在傷心之際, 旁邊竟然新生一枝頭, 仲長出許多新葉, 翻生喇!  翻生喇!  小慈好開心, 即刻問幾時再結果子?  好甜好好味 ^^

姐姐咁好, 生日當然要同佢慶祝一下啦!

Happy 1st Birthday in our house!  Happy to have you here, Adora!