今年既生日真係過得好特別, 首先我排除萬難攞左個長假, 攞 7 日放足 14 日, 好耐都冇試過放咁長, 簡直有 D 放產假既感覺, 冇咩野做, 純粹工人姐姐回鄉結婚, 我陪下老公做下賓賓咁, 好 relax~~ 於是約下朋友食飯啦, 完全估唔到佢地竟然擺左個蛋糕出黎! 咁大個人過生日真係冇期望過有蛋糕, 巧驚喜 ^^
呢班朋友成 6-7 年冇見, 一見就同我慶生真係好開心, 多謝你地!
最特別最開心就係最錫我既姨姨返黎香港探我地之餘仲同我慶生！個蛋糕仲要係我細佬買俾我, 真係一個歷史紀錄, 成世人第一次買蛋糕送俾我呢個家姐, 巧感動啊!! 即刻要錄 video 拍低佢地唱生日歌俾我聽既情景 ^^
一個落大雨既晚上, 仲有位高大威猛型男揸電單車送我返屋企, 好爽! 因為冇準備, 所有衫唔防水但慶幸自己冇著裙, 上車時醒目地收埋左個電話係暗格, 果然落車我係由頭濕到落腳指尾的, 對襪真係扭得出水! 勁特別既體驗 :P
正日, 小慈小明要返學, 叫小慈起身時佢一擘大眼就雙手箍住我條頸再錫我一啖同我講生日快樂!! 仲問我想而家要驚喜定放學先? 我都未決定點答就見到老公醒左行出黎, 咩事佢 6:30 am 起身? 正在奇怪之際, 小慈就捧左紥花俾我!! 嘩~~~~~~~~
真係估唔到呀! 我明明成間屋都有行過, 都冇發現有紥花喎! 竟然收得咁埋逃過我既法眼! 原來紥花係老公專登去尖沙咀買既, 趁我出左街時收埋, 3 朵太陽花代表佢地三個, 紥花小慈小明都有份夾錢添呀！小慈仲寫左封信俾我, 好乖好乖, 簽手冊時突然發現佢寫左「生日快樂媽 x 2」 @.@ 作 C 佢, 好在今日老師冇 check 佢本手冊咋! 俾佢嚇死又俾佢笑瓜, 衰妹 ^^ 個個都抵錫, 咁錫我, 收到晒 ^8^
趁小慈小明返左學, 我同老公就去拍拖行街食飯, 閒日既早上商場都人山人海
放學返黎趕佢地快手做完功課一齊出街食餐飯, 生日我唔想洗碗, 休息一天 one day off :D 今晚好想食西餐, 呢間美式餐廳仲有海鮮拼盆, 好好味呀!!
小明極度喜愛龍蝦湯, 唔捨得咁快飲完
小慈就鍾意卡邦尼煙肉意粉, 一邊食一邊叫好好味, 食到一臉滿足, 太攪笑喇!
好飽~~~~~~~~~
沒有留言:
張貼留言