大浪灣

趁有陽光, 天氣報告又話有 32 度, 我地約埋朋友仔一齊去沙灘, Let's Get Wet~~

爸爸掘左一個好深既洞俾佢地玩

捐洞, 捐枱底, 呢埋, 相信都係每個小朋友既嗜好

大浪灣既沙真係滑得好緊要!!  涼涼地軟棉棉, 好舒服!

本來只係去海邊攞水砌城堡, 點知呢兩個小朋友掂到水就唔願走!?

發現外星生物 -- 異形 BB

大浪灣真係好大浪, 唔拖住係企唔穩既!

爸爸話, 一個向左跌, 一個向右跌, 拖住兩個真係好辛苦, 仲唔快 d 停機幫手!!!!

玩大左個膽, 兩個嫌爸爸限制佢地既活動範圍, 決定出走

唔拖住既後果就真係俾浪衝走, 小明成個跌左落水仲俾浪蓋過, 濕晒~~~

海水其實好凍架, 但爛玩既小明聽到坐艇出海又要死跟

出動到 3 個大人先可以扶穩隻艇!   D 浪真係好大!!  小朋友又唔夠力扶住手柄, 小慈俾 D 浪打中塊臉飲左 D 海水, 小明就俾 d 離心力嚇親, 柏弦成個拋左落海  @.@  

講到咁, 你唔好以為佢地唔玩呀, 係佢地全身濕晒我怕佢地冷親先腰斬咋!  上岸個時佢地凍到咬緊牙關, 全身打冷震.... 玩下姐, 唔駛搵命搏!

柏弦媽將今日衝浪情形製作成一條超級精彩既暑期猛片, 票房一定好可觀!!  去片~ http://www.youtube.com/watch?v=QMQExbun6XE&feature=share

弟弟抹乾個身換番件衫, 再玩過!!

 

小慈好開心呀 ^^

爸爸拉完隻艇冇晒力了

兩姐弟投入玩沙, 連最鍾意既狗仔跑緊過黎都唔知....

一班小朋友終於有機會坐埋一齊玩

諗錯晒以為今日天陰唔駛搽太陽油, 全家已經慢慢燴熟左

兩個細佬

大浪灣真係好唔錯, 沙靚, 有 bbq 爐, 士多又多野食, 仲有公園玩, 正!!

今日好開心知道小明已經唔怕衝浪, 小慈亦唔再掩尖怕 d 水整濕佢塊面, 俾浪整到成身濕晒都冇問題, 下次天氣再熱 d 可以教佢地游水了!

小明 2 歲半

2 5 仔小明今日 2 歲半大, 爸爸話: "而家先 2 歲半咋咩?  好似 2 歲半左好耐咁既?"

小明係講野老積, 佢其實仲係好細個架咋 :)

語言方面:

佢除左講野仲有 bb 音之外, 講野既內容其實同小慈好相似!!  例如....

- 點算好呀?  我地一齊諗個方法出黎先!

- 好難聽呀, 小慈家姐!  你講呢 d 說話我覺得真係好難聽呀!

- 我好叻架!  我已經吞左啖飯, (個口) 有位可以飲湯!

- 食飯既時候唔好講野, 多謝合作!

- 而家天黑唔駛返學, 天光就要起身飲奶奶, 擦牙, 換校服!

- 工人姐姐問弟弟 "Blanket smell good?"  

弟弟會奸奸地答: "Smelly~~" 

攪到姐姐即刻好激動答: "No~~~"  識玩人添呀衰仔!

唱歌方面都有唔錯既進步, 識唱何家公雞何家猜, 太陽伯伯, 波兒波兒, 天父我愛你, 熊人熊人快樂笑, 仲有好多學校老師教既歌!  佢會玩玩下玩具自己爆出黎, 好在我又聽得明!  佢又可以咬字清晰地背晒成首謝飯禱, very good!

情緒方面:

弟弟一直都係一個易話為又好易笑既小朋友, 不過近來就好黐身, 鍾意人讚, 想像力豐富成日自己同自己講野, 玩玩具時仲會角色扮演, 經常當獅子鯊魚係壞人, 成日都叫人打佢拉佢坐監, 都幾暴力下 @.@  話佢呢就會大喊, 好在弟弟都講道理, 會知錯, 肯 say sorry!  未有耐性, 想要一樣野就會出 "鵝功" 鵝到你俾佢為止, 非常堅毅!  同佢講一陣先, 佢就會即刻講: "已經好耐喇, 等左好耐架喇!"  真係令人啼笑皆非~

大小肌肉方面:

會快跑, 急停, 雙腳離地跳, 自行上樓梯, 推車, 踢波, 掉波, 碌波, 會用叉匙筷子, 可以自行進食, 用杯飲水, 著鞋除襪, 手眼協調 ok!  識扭蓋, 開門, 插鎖匙, 拉拉錬, 砌積木, 執筆可以寫 1 字, 打圈, 點點點, 填色塗鴉

社交方面:

弟弟屬於活潑開朗唔怕生保非常主動既小朋友, 非常鍾意同人玩, 但一定要我 or 爸爸在場佢先放心去玩, 可以跑到無雷公咁遠得閒先返黎!  表現獨立, 咩都夠膽試, 都好識捍衛自己, 會保護自己既 "財產", 但都知規矩, 會同人分享!  易妒嫉會呷醋, 我攬住小慈 or 爸爸, 佢一定會攝埋黎一齊攬住唔會蝕底, 都需要我注意佢! 

老師話佢係學校都古靈精怪!!  例如排隊會攪人啦, 手多多啦, 瞓醒晏覺會夾埋其他同學仔一齊爬床玩啦, 上堂八卦, 聽同學仔講三講四會搭嘴, 又會撩人講野啦, 有時又會帶頭做衰野, 有時又會和應融合跟埋其他人一齊做添!  話佢兩句就大喊, 不過好快收聲知錯!  坐唔定, 但上堂又會好投入好多反應, 有時真係攪到老師哭笑不得, 冇佢修!

2 歲半既弟弟身高 92cm 體重 13.6kg (30 磅) 著 95 碼既衫褲,   腳仔 15cm 

一早起身見佢個頭瞓到好似風間同學咁, 真係好攪笑 XDD

弟弟好鍾意食肉, 雞脾更加係佢既至愛

弟弟已經識叫去廁所, 暫時日片叫做戒左, 下星期係學校都唔再著片, 要帶定幾套替換衫, 因為佢有時掛住玩就唔記得去廁所  @.@  

有一次可能太急, 爸爸同佢去廁所褲都未除完佢已經屙到一地一腳都係, 斟茶俾爸爸飲仲讚自己射程遠, 真係冇佢咁好氣 XDDDDD

We love you very much ah 可愛活潑攪笑既恩明 B!

兄弟生日會

今朝個天簡直係倒瀉水, 落雨落到出紅色暴雨警告真係好誇張!! 好在柏弦柏橋生日會係會所舉行, 落幾大雨都冇有怕!! 一定唔會去錯地方, 淨係門口都咁靚, 應該整埋嘉賓提名冊俾我地簽名麻 :)

今日 dress code 係 party dress, 即是御准小慈再扮多次公主, 開心到暈 :)  壽星仔柏弦超靚仔, 佢今日係一個堅毅的士兵黎架!!  

自從搴搴做左游泳健將, 真係高人一等

小明今日都好靚仔架, 著西裝背心配波鞋, 一個字 -- 型

整又靚又好味既甜品係柏弦媽媽既嗜好, 仲要今日整既芒果杯 and cheese cake 係我既飛弗, 真係睇見就開心!!!  再加上呢個場真係好靚, 又大又光猛!!  Well Done Bessy :)

美食之餘仲有小丑哥哥助慶

小丑哥哥扭左個巴斯光年俾弟弟, 好得意呀!

小慈好鍾意小丑哥哥對鞋

小丑哥哥話公主一定要戴皇冠

弟弟戴仲攪笑

小丑哥哥好識攪笑, 氹到大家好開心!

小朋友何其投入!

小慈笑得好開懷

小丑哥哥叫小朋友扮獅子影大合照, 非常攪笑呀!

由細識到大既朋友仔影張合照先

Party 完仲可以去會所放電, 超正!

小明好鍾意呢架火車玩左好耐, 仲邀請巧巧仙子一齊遊車河

小朋友有小朋友玩, 我地班媽咪終於可以坐低休息下, 圍圈傾下偈

今日真係玩得好開心, 呢個暫時係我參加過咁多個生日會之中最開心既!!  多謝柏弦媽媽, 柏橋爸爸!  好叻呀你地!!  祝柏弦柏橋生日快樂, 開開心心, 身體健康, 一家人齊齊整整幸福美滿!!

VIP

聽日係年票會員免費帶朋友入樂園既死線, 我地終於係死線前約到我地心目中既 VIP  琳琳 & 美芝姨姨一齊入樂園玩!  飛天巡遊其實麻麻地好睇, 不過佢首歌 "飛起! 飛起!" 就幾好聽

小明見到 Woody, 小慈見到白雪公主, 幾熱幾曬都即刻唔記得!

睇完巡遊睇 Golden Mickey, 再去小小世界 & 咖啡杯, 非常順路!  我地已經係識途老馬

小明今日自己一隻杯, 好 high

估唔到我地玩完咖啡杯出黎就落傾盆大雨 @.@  等停雨期間, 小明仲爭取時間瞓一瞓叉電, 我地就乘機食 d 野, 食完弟弟都仲未瞓醒就唔等佢去玩巴斯光年 lu~

玩完番黎小明已經瞓醒, 雨又停左, 一齊用爆谷餵麻雀仔開心到不得了 :)

麻雀仔真係食, 食完唔知會唔會甩毛呢?

唔好餵得咁興奮叫得咁大聲!  嚇走晒 d 麻雀仔喇~

等緊玩小明既最愛 -- 森林河流之旅!  佢地扮鬼臉好攪笑

以假亂真, 以為去左非洲

估唔到天文台今日咁準, 4:00 pm 開始落雨, 停一陣又落一陣, 連雷暴警告都出埋!

橫掂都濕, 唔爭在玩埋噴水壺, 兩個家姐明蝦弟弟, 噴到小明成頭濕晒!!

擊鼓鳴怨乎?

各人 pose 不同

我地平時好少玩幸會史迪仔因為排隊每次至少 30 分鐘, 不過今日琳琳好想去, 有小朋友一齊排隊仲有 iPad 2 / iPhone 解悶, 30 分鐘又過得好快

聚精會神

爸爸抱有 iPhone

2:00 pm 攞 fast pass 要等到 6:30 pm 先有得玩 Pooh Pooh, 真係一 D 都唔 fast....

嘩~  兩位靚仔  (心心眼中)

雨越落越大連煙花都停埋, 我地都係時候返屋企

今日天氣由陽光普照曬到出晒汗, 到 4:00 pm 開始落驟雨, 再到 7:00 pm 越來越大雨完全唔停真係估唔到!!!  我地仲要好大意留左把傘係架車度, 又唔憤氣係迪士尼買, 小童傘都賣 $160 簡直搶錢!!!  我地早半年買都係 $100 左右, 竟然加價 50% @.@ 

於是我就做左一個明智既決定 -- 差派偉大既爸爸犧牲自己冒雨跑去停車場攞傘再返黎樂園接我地!!  見爸爸返黎時全身濕晒, 我地一班女人一齊拍手大叫.....

"英~~雄~~~~~"

真係好多謝你, 辛苦晒你喇, 爸爸  ^8^