今晚有朋友仔上黎探 Jimmy 仲送見面禮!
小慈問: "呢 d 咩黎架?"
朋友答: "係 Jimmy 既波波池呀!"
其實係 d 沙沙石石, Jimmy 完全有保護色混為一體
小慈話 Jimmy 微微笑鍾意呢個波波池呀!
弟弟望到眼定定, 我估佢忍得好辛苦先唔伸手攪
我地都換左個大缸俾 Jimmy, 佢大得太快唔夠位轉身
小明將自己既手仔腳仔印係神奇畫版上面, 細細隻好 cute 呀
開心的一晚
2011年8月17日 星期三
2011年7月9日 星期六
夜釣墨魚
呢個玩意都興左好耐, 每年 5 月開始已經周圍聽到人地話出海釣墨魚, 我同秋秋都參加過幾次, 第一次最開心, 成船人釣左超過 20 斤, 每人至少有 10 條以上, 釣到攰唔想釣拉番條魚絲上黎時都可以勾到一條, 多成咁!! 仲要 d 墨魚超大隻, 有成個水樽咁肥呢, 真係超開心!! 不過呢次係唯一最多既一次, 最低紀錄係成船人得 5 條炒埋都唔夠咁多人食.... 食白果, 仲要成晚重複做拉線既動作當舉左一晚啞鈴, 係船上面做健身 @.@
舊年都有釣, 成績麻麻不過當同老朋友聚舊冇所謂, 今年有朋友又落力組團, 本來諗住全家出席, 但個心就好忐忑不安, 一來小慈未試過出海唔知佢會唔會暈船浪, 不過前年帶佢去沙巴坐大飛就冇事, 但成晚坐係船上面又唔同, 二來掙扎左好耐唔知帶唔帶小明好?! 佢真係太細, 成日橫衝直撞好怕佢跌落海, 唔帶佢去又怕佢扭計喊, 佢試過夜晚唔肯瞓等我地門, 又投訴我地做咩唔返屋企?!!!
考慮左好耐, 基於安全理由都係決定帶小慈一個!! 奇蹟地, 小明今晚超乖!!! 我同佢講佢太細個會跌落海危險, 等佢大個 d 好似小慈家姐咁 5 歲先去釣墨魚, 小明又非常明白, 連聲 "知道" "好" 仲非常愉快, 非常順灘咁同我地 say bye bye!! 實在太太太太太乖喇!! 我地即刻去得好安樂 XD
舅父 & 彤彤姐姐都有參加, 佢地第一次釣墨魚呀 (呢張相係小慈影既)
小慈知道自己有份釣墨魚開心到不得了, 今日差 d 唔肯瞓晏覺要快 d 出發!
點解隻船咁耐都唔黎架?
見小慈咁愁, 咀佢一大啖等佢開心番先 ^8^
YEAH!!! 我地隻船出現喇~
坐船尾穩陣呀
望著海一遍
我地停係橋咀島對開海面既牛尾海, 小慈手執魚排開始釣, 都似模似樣架!
YEAH! 釣到呀! 拉上黎先知係雞泡魚, 識 "嘰嘰" 叫架佢!
小慈好興奮, 不過要鼓勵好耐先肯同雞泡魚影相, 有 d 驚
發脹與未發脹既雞泡魚
應該已經脹到極限, 勁 cute! 玩左一陣就放番落海, 希望佢大難不死必有後福
連續釣左兩條雞泡魚之後, 終於都有墨魚上釣喇
全船 29 人既收穫 -- 墨魚 12 條, 雞泡魚 8 條
由於海面突然有大浪, 成隻船一高一低好似玩海盜船咁刺激!!! 就係最刺激既時候, 原來 d 浪整濕左船既發電機仲燒埋, 成隻船即刻漆黑一遍, 船長打開船艙維修之際又有一個大浪, 我地其中一桶墨魚仲跌左落船艙沾染左 d 機油唔食得 @.@
今晚冇得食避風塘炒墨魚仲要提早回程, 好在隻船有後備發電機可以捱到返碼頭咋! 如果唔係大家今晚就要係船上面過夜.....
大人頂得住, 小慈已經眼瞓!! 10:30 pm 係佢既極限, 唔怕! 幾時都有爸爸攬住 :)
美中不足呢!
2011年7月8日 星期五
貓貓
好掛住舅父, 亦都好掛住佢 10 隻貓, 今晚帶埋小慈小明去探佢地
舅父慷慨獻貓, 10 隻貓入面有幾隻都好親民
舅父教用電筒同貓貓玩, 等佢地追住 d 燈黎撲, 追到撞埋牆真係好攪笑!
小慈鍾意用貓棒因為比較易控制, 玩到捐枱底
太近喇, 小慈! 你要扮雀仔飛引貓貓撲埋去麻
呢個角度好 D 嘞!
小明都學識俾隻手手貓貓嗅下, 交個朋友
細細力摸~ 今次再冇暴力扑貓貓, 冇嚇親! 不過都係太興奮, 兩姐弟既超高頻尖叫, 大笑, 都係嚇到 d 貓貓靜雞雞走晒
想摸
又驚! 仲嚇到走埋, 都係小慈大膽 d
舅父既貓玩具真係好多, 今次出釣魚竿弟弟都識玩
貓貓唔 show 弟弟, 佢就上枱追佢俾反應, 攪到黑貓健健起身走, 笑死!
親吻瑟瑟, 佢 d 毛好滑呀
親吻 BB, BB 係舅父最錫既貓
小明使出招牌豬咀
同舅父影下相啦
外甥多似舅?
多謝舅父俾左一個愉快既晚上小慈小明, 佢地今晚好開心!!
2011年7月2日 星期六
第一次參加聖樂部就職禮
小慈參加兒童詩班已經一年有多, 今日第一次參加聖樂部就職典禮, 有晒程序仲要上台獻詩, 所有指揮, 司琴, 助教都有聘書, 認真, 有組織又有規模!! 就職禮開始先由手鐘隊 (12 歲以上) 序樂, 手鐘既聲音好好聽
神是個靈, 所以拜祂的, 必須用心靈和誠實拜祂 (約 4:24)
兒童詩班 (3-7歲) 及初級詩班 (8-11歲) 一齊獻詩 -- 天天讚美
泰語詩班獻詩 -- 聖經. 神的言語.領導生命
佢地全部都係泰國人, 但能夠唱普通話, 英文, 廣東話既歌, 好厲害呀!!
人才濟濟既聯合詩班 (16 歲以上) 獻詩 -- 救主為王
少年詩班 (12-15歲) 獻詩 -- Take These Wings
婦女詩班獻詩 -- 願教會頌聲不絕
主席及聖樂部長帶領大家誦讀委身聖樂事奉禱文
座無虛席!! 一間教會有咁多詩班真係好勁
最後由管弦樂隊殿樂, 禮成~~ 榮耀頌讚歸神!!
整個就職禮小明都好留心欣賞, 小慈獻詩個首歌弟弟都識唱
一夠 3 歲就係時候參加兒童詩班喇, yeah!!
訂閱：
文章 (Atom)