2010年12月2日(THU)
今日都仲係我請假陪小明返學, 為方便照顧, 都係一家四口一齊出門口
我唔駛再觀課, 可以由頭到尾陪住小明, 於是工人姐姐留係屋企攪衛生, 有小慈真係好好多, 弟弟見小慈換衫佢又肯換, 見小慈揹書包佢又即刻揹住, 仲渣實張學生證唔放, 佢實左太鍾意個史迪仔套了 ^^
不過入到學校已經想玩滑梯唔肯換鞋, 氹完佢換鞋要入課室擺書包就唔肯去, 企左係度唔郁! 慢吞吞放完書包已經要洗手食早餐, 弟弟已經抗拒唔肯坐低, 我氹佢食早餐佢竟然問我要 oreo , 好在今日早餐食瑞士卷岩小明口胃先肯乖乖地坐定定食晒, 但唔鍾意飲美綠奶, 用叉技巧有待改善不過好肯自己餵自己, 食完要收拾杯碟, 唔駛人教都識分門別類放杯叉碟, 又幾叻仔
依然未肯坐地墊點名, 不過聽到老師話可以出去玩車車就雙眼發光, 佢恨左好耐架喇, 明明日日接小慈家姐放學都可以玩, 點解著左校服就唔玩得呢? 相信呢個疑團會係小明心中一段時間, 連老師已經超級就佢, 本來係分組做唔同既野, 老師問小明想玩車車, 玩滑梯 or 想玩平衡木? 小明答車車, 於是全隊綿羊組就玩車車先 ^^ 10分鐘後轉組, 連老師又問小明, 想再玩車車定係想玩滑梯? 小明話玩滑梯就全組轉玩滑梯, 真係太攪笑喇~~~~~~~ 連老師仲同我解釋話唔想太多規則嚇怕左恩明, 所以會對佢容忍寬鬆 d, 慢慢黎, 嘩~~ 老師你真係好呀, 希望小明唔好有風駛盡𢃇
玩完又係排隊 - 洗手 - 排隊 - 食水果, 等候其間小明扭抱, 係學校我唔會抱佢於是小明想喊, 輔助老師馬老師見到就過黎幫手, 點知小明唔鍾意馬老師抱佢竟然打左馬老師一巴!!!!! 嬲得我即刻捉住小明隻手鬧佢, 要佢講 sorry!! 衰仔竟然答我: "唔 sorry!!" 太過份喇! 我發火都唔係人咁品架, 即時目露凶光壓低把聲惡佢, 僵持左一陣小明都肯 say sorry, 我仲要佢摸番馬老師添.... 小慈個時就算幾唔鍾意都係大喊打自己姐, 真係冇諗過我個仔會打人 @.@ 馬老師仲係新入職, 都唔知會唔會嚇到人地妹妹仔轉行添呀 >.< 此風不可長, 我大大話話之後全日都鵝住小明唔准打人, 一定要佢學識摸人, 唔係打人, 要同小朋友握握手做個好朋友, 要錫老師云云.... 仔呀仔, 乖乖地醒醒定定呀....
一出學校門口心情靚晒, 拉我去公園玩
2010年12月3日 (FRI)
今日係小明農曆 2 歲生日, 我請唔到假, 連老師又覺得小明未 ok 於是今日由工人姐姐陪小明返學
今日早左返到學校, 本來小明攬住左我對腳唔俾我走, 好在我同連老師夾計引佢入班房玩玩具引開佢我就即閃~
由工人姐姐陪讀, 佢匯報小明今日有食晒麥皮早餐同埋香蕉, 肯自己坐, 係唔想排隊要自己去玩, 知道我返工就冇搵我, very good! 今日冇再打人 @.@
星期一就靠佢自己喇, 好緊張呀~~~ 希望順順利利!!!
沒有留言:
張貼留言