小明 2 歲半

2 5 仔小明今日 2 歲半大, 爸爸話: "而家先 2 歲半咋咩?  好似 2 歲半左好耐咁既?"

小明係講野老積, 佢其實仲係好細個架咋 :)

語言方面:

佢除左講野仲有 bb 音之外, 講野既內容其實同小慈好相似!!  例如....

- 點算好呀?  我地一齊諗個方法出黎先!

- 好難聽呀, 小慈家姐!  你講呢 d 說話我覺得真係好難聽呀!

- 我好叻架!  我已經吞左啖飯, (個口) 有位可以飲湯!

- 食飯既時候唔好講野, 多謝合作!

- 而家天黑唔駛返學, 天光就要起身飲奶奶, 擦牙, 換校服!

- 工人姐姐問弟弟 "Blanket smell good?"  

弟弟會奸奸地答: "Smelly~~" 

攪到姐姐即刻好激動答: "No~~~"  識玩人添呀衰仔!

唱歌方面都有唔錯既進步, 識唱何家公雞何家猜, 太陽伯伯, 波兒波兒, 天父我愛你, 熊人熊人快樂笑, 仲有好多學校老師教既歌!  佢會玩玩下玩具自己爆出黎, 好在我又聽得明!  佢又可以咬字清晰地背晒成首謝飯禱, very good!

情緒方面:

弟弟一直都係一個易話為又好易笑既小朋友, 不過近來就好黐身, 鍾意人讚, 想像力豐富成日自己同自己講野, 玩玩具時仲會角色扮演, 經常當獅子鯊魚係壞人, 成日都叫人打佢拉佢坐監, 都幾暴力下 @.@  話佢呢就會大喊, 好在弟弟都講道理, 會知錯, 肯 say sorry!  未有耐性, 想要一樣野就會出 "鵝功" 鵝到你俾佢為止, 非常堅毅!  同佢講一陣先, 佢就會即刻講: "已經好耐喇, 等左好耐架喇!"  真係令人啼笑皆非~

大小肌肉方面:

會快跑, 急停, 雙腳離地跳, 自行上樓梯, 推車, 踢波, 掉波, 碌波, 會用叉匙筷子, 可以自行進食, 用杯飲水, 著鞋除襪, 手眼協調 ok!  識扭蓋, 開門, 插鎖匙, 拉拉錬, 砌積木, 執筆可以寫 1 字, 打圈, 點點點, 填色塗鴉

社交方面:

弟弟屬於活潑開朗唔怕生保非常主動既小朋友, 非常鍾意同人玩, 但一定要我 or 爸爸在場佢先放心去玩, 可以跑到無雷公咁遠得閒先返黎!  表現獨立, 咩都夠膽試, 都好識捍衛自己, 會保護自己既 "財產", 但都知規矩, 會同人分享!  易妒嫉會呷醋, 我攬住小慈 or 爸爸, 佢一定會攝埋黎一齊攬住唔會蝕底, 都需要我注意佢! 

老師話佢係學校都古靈精怪!!  例如排隊會攪人啦, 手多多啦, 瞓醒晏覺會夾埋其他同學仔一齊爬床玩啦, 上堂八卦, 聽同學仔講三講四會搭嘴, 又會撩人講野啦, 有時又會帶頭做衰野, 有時又會和應融合跟埋其他人一齊做添!  話佢兩句就大喊, 不過好快收聲知錯!  坐唔定, 但上堂又會好投入好多反應, 有時真係攪到老師哭笑不得, 冇佢修!

2 歲半既弟弟身高 92cm 體重 13.6kg (30 磅) 著 95 碼既衫褲,   腳仔 15cm 

一早起身見佢個頭瞓到好似風間同學咁, 真係好攪笑 XDD

弟弟好鍾意食肉, 雞脾更加係佢既至愛

弟弟已經識叫去廁所, 暫時日片叫做戒左, 下星期係學校都唔再著片, 要帶定幾套替換衫, 因為佢有時掛住玩就唔記得去廁所  @.@  

有一次可能太急, 爸爸同佢去廁所褲都未除完佢已經屙到一地一腳都係, 斟茶俾爸爸飲仲讚自己射程遠, 真係冇佢咁好氣 XDDDDD

We love you very much ah 可愛活潑攪笑既恩明 B!

兄弟生日會

今朝個天簡直係倒瀉水, 落雨落到出紅色暴雨警告真係好誇張!! 好在柏弦柏橋生日會係會所舉行, 落幾大雨都冇有怕!! 一定唔會去錯地方, 淨係門口都咁靚, 應該整埋嘉賓提名冊俾我地簽名麻 :)

今日 dress code 係 party dress, 即是御准小慈再扮多次公主, 開心到暈 :)  壽星仔柏弦超靚仔, 佢今日係一個堅毅的士兵黎架!!  

自從搴搴做左游泳健將, 真係高人一等

小明今日都好靚仔架, 著西裝背心配波鞋, 一個字 -- 型

整又靚又好味既甜品係柏弦媽媽既嗜好, 仲要今日整既芒果杯 and cheese cake 係我既飛弗, 真係睇見就開心!!!  再加上呢個場真係好靚, 又大又光猛!!  Well Done Bessy :)

美食之餘仲有小丑哥哥助慶

小丑哥哥扭左個巴斯光年俾弟弟, 好得意呀!

小慈好鍾意小丑哥哥對鞋

小丑哥哥話公主一定要戴皇冠

弟弟戴仲攪笑

小丑哥哥好識攪笑, 氹到大家好開心!

小朋友何其投入!

小慈笑得好開懷

小丑哥哥叫小朋友扮獅子影大合照, 非常攪笑呀!

由細識到大既朋友仔影張合照先

Party 完仲可以去會所放電, 超正!

小明好鍾意呢架火車玩左好耐, 仲邀請巧巧仙子一齊遊車河

小朋友有小朋友玩, 我地班媽咪終於可以坐低休息下, 圍圈傾下偈

今日真係玩得好開心, 呢個暫時係我參加過咁多個生日會之中最開心既!!  多謝柏弦媽媽, 柏橋爸爸!  好叻呀你地!!  祝柏弦柏橋生日快樂, 開開心心, 身體健康, 一家人齊齊整整幸福美滿!!

VIP

聽日係年票會員免費帶朋友入樂園既死線, 我地終於係死線前約到我地心目中既 VIP  琳琳 & 美芝姨姨一齊入樂園玩!  飛天巡遊其實麻麻地好睇, 不過佢首歌 "飛起! 飛起!" 就幾好聽

小明見到 Woody, 小慈見到白雪公主, 幾熱幾曬都即刻唔記得!

睇完巡遊睇 Golden Mickey, 再去小小世界 & 咖啡杯, 非常順路!  我地已經係識途老馬

小明今日自己一隻杯, 好 high

估唔到我地玩完咖啡杯出黎就落傾盆大雨 @.@  等停雨期間, 小明仲爭取時間瞓一瞓叉電, 我地就乘機食 d 野, 食完弟弟都仲未瞓醒就唔等佢去玩巴斯光年 lu~

玩完番黎小明已經瞓醒, 雨又停左, 一齊用爆谷餵麻雀仔開心到不得了 :)

麻雀仔真係食, 食完唔知會唔會甩毛呢?

唔好餵得咁興奮叫得咁大聲!  嚇走晒 d 麻雀仔喇~

等緊玩小明既最愛 -- 森林河流之旅!  佢地扮鬼臉好攪笑

以假亂真, 以為去左非洲

估唔到天文台今日咁準, 4:00 pm 開始落雨, 停一陣又落一陣, 連雷暴警告都出埋!

橫掂都濕, 唔爭在玩埋噴水壺, 兩個家姐明蝦弟弟, 噴到小明成頭濕晒!!

擊鼓鳴怨乎?

各人 pose 不同

我地平時好少玩幸會史迪仔因為排隊每次至少 30 分鐘, 不過今日琳琳好想去, 有小朋友一齊排隊仲有 iPad 2 / iPhone 解悶, 30 分鐘又過得好快

聚精會神

爸爸抱有 iPhone

2:00 pm 攞 fast pass 要等到 6:30 pm 先有得玩 Pooh Pooh, 真係一 D 都唔 fast....

嘩~  兩位靚仔  (心心眼中)

雨越落越大連煙花都停埋, 我地都係時候返屋企

今日天氣由陽光普照曬到出晒汗, 到 4:00 pm 開始落驟雨, 再到 7:00 pm 越來越大雨完全唔停真係估唔到!!!  我地仲要好大意留左把傘係架車度, 又唔憤氣係迪士尼買, 小童傘都賣 $160 簡直搶錢!!!  我地早半年買都係 $100 左右, 竟然加價 50% @.@ 

於是我就做左一個明智既決定 -- 差派偉大既爸爸犧牲自己冒雨跑去停車場攞傘再返黎樂園接我地!!  見爸爸返黎時全身濕晒, 我地一班女人一齊拍手大叫.....

"英~~雄~~~~~"

真係好多謝你, 辛苦晒你喇, 爸爸  ^8^

一天一天長大

La La La La~~  我一天一天一天長大~~  歌詞都有得唱!  只係每日都對住兩個小寶貝唔係好覺, 但會因佢地一 d 異常既舉動 / 忽然爆出既說話, 驚覺佢地長大左!!

事件一:

屋企既電腦換左張 wall paper, 就係我地一家四口同米奇老鼠既合照

小慈: "你睇下我地一家人幾開心!  弟弟仲笑到唔見左隻眼!"

我: "係呀!  媽媽好鍾意呢張相, 米奇都笑得好靚啦!"

小慈: "我知米奇老鼠其實係人扮架!  可能入面係一個叔叔黎架!"

我: "啊?!  你點知既?"

小慈: "我梗係知啦!  我拖住佢隻手摸到佢入面有手指架!"  XDDD

事件二:

已經係上星期既事, 逢星期一都要帶被袋返學校, 小慈突然係被袋度攞走由 N1 陪到佢而家既枕頭!!  問佢做咩事?

小慈: "郭老師話我地已經係大哥哥大姐姐, 唔要再攬住 d 野瞓覺架喇!"

我: "咁個枕頭點算呀?"

小慈: "送俾弟弟囉!  我而家有 2 個枕頭呀!"

(終於俾佢發現有兩個枕頭, 枕頭係佢命根, 我地好怕得一個會唔見 or 整污漕要洗就麻煩, 於是嫲嫲整左個 A 貨枕頭俾佢用左兩年架喇!!)

我: "其他小朋友用咩黎瞓覺架?"

小慈: "有 d 攬毛巾仔啦, 有 d 要大張被啦, 有 d 都好似我咁要枕頭架!  郭老師話邊個小朋友唔駛攬住 d 野瞓覺, 放學就會有大貼紙架!"

我: "你有冇信心可以攞到?  冇枕頭喎?"

小慈: "放心啦, 媽媽!  我一定得架!  我唔駛聞枕頭都可以瞓得著, 因為我可以聞被架麻!  我張被好香架, 媽媽!"  哈哈哈哈~~~

事件三:  座枱畫

老老實實, 我第一眼望呢幅畫既時候我真係以為小慈整左隻帆船, 我仲問佢點解唔係海上面既?  當然小慈既反應就即刻好激動啦!  

小慈話: "係一隻七彩雀仔黎架!!! 佢全身都好開心所以全部都係笑樣!  佢好大隻, 好似 UP 入面個隻烏嘴咁, 大過棵蘋果樹, 棵樹係媽媽黎既, 生左好多蘋果!"

我: "Sorry!  Sorry!  我下次會睇得小心 d......"

小慈: "後面呢 3 個波係由佢細個開始畫起, 慢慢長大變左個綠色大波, 又係好開心笑到見到 d 牙齒, 最後佢仲識變魔術, 變左一片西瓜!  係佢隔離係一棵 BB 蘋果樹, 佢好細個, 所以得一粒蘋果!"

小慈既說話令我諗起小王子, 都係怪大人唔識睇小朋友既畫, 扭曲左佢既想法, 要小朋友好勞氣咁解釋俾愚蠢既大人聽!!!

有紋有路!  我個女長大了~~~

兒童詩班生日會

等足一年, 又到兒童詩班慶祝 4-6 月既生日會!!  舊年既呢個時候, 小慈岩岩返兒童詩班仲未適應, 喊到死死下未識 enjoy@.@  今年唔同晒喇, 仲要呢日咁岩輪到小慈收奉獻, 雪瑩姐姐問小慈識唔識做奉獻祈禱?  我估唔到小慈會答識, 仲肯用咪開聲祈禱, 非常驚喜~~

4-6 月生日既小朋友請站出來!!  有小慈, Jeremy, Jason & 樂悠

生日之星有禮物收

我都估小慈會揀 Elmo

你睇小慈幾開心

好朋友予予

感謝神一直以來既保守帶領!  多謝主俾小慈適應及投入教會生活, 多左一班好朋友仔一齊玩, 一齊長大!  呢一年小慈既轉變真係有目共睹 (對我黎講絕對係神蹟黎架!)  求神繼續保守看顧小慈, 讓佢時常都有平安, 喜樂, 在主內成長, 與主同行!!

戒片

好多朋友都問我小明戒左片未?  話佢講野咁叻應該好易戒架喎?!  我都以為係架, 奈何, 小明有去廁所恐懼症, 一叫佢去廁所就喊, 攪到我唔敢逼佢!!!

跟住, 學校老師就話小明肯跟大隊去排洗, 都肯除褲仔, 但未成功屙過 1 次!  不過唔緊要, 提議我地試下係屋企換片之前都同佢去廁所, 等佢習慣要除褲仔, 總有一次會屙得出!  於是, 努力左差不多一個月, 由好抗拒完全唔肯入廁所, 到我威逼利誘肯坐下, 再到工人姐姐認為我地屋企個坐廁可能太高令弟弟卻步, 於是出秘密武器 -- 痰罐仔!

Da La~~~  真係成功屙得出喇!!  係屋企獻出左第一次, 係學校就更加順利, 今晚返屋企小明仲已經冇著片片添!  不過唔著片既後果就係要非常勤力咁帶佢去廁所, 半個鐘頭去一次, 又真係次次都有喎!?  工人姐姐話秘訣係按下佢肚臍下面既肚仔, 好似禁制咁即刻有水出 XDDD  Yeah!  應該唔駛一個夏天就會識叫屙 wee wee, 好快就唔駛再買片幫爸媽慳錢!

咁開心同佢地玩吱先!!  小慈小明好怕吱, 一吱就笑唔停, 佢地一笑我就繼續吱, 因為佢地既笑聲真係好好聽 XDDDDD

小明既笑聲, 去片~~

https://youtu.be/ZdapeSnF6c0

小慈的, 去片~~

https://youtu.be/w-p_MMI_Rvs

有時都覺得自己陪小明既時間真係唔係好夠!  每日放工返黎, 小明第一時間就拖住我叫我陪佢玩, 但我又要睇小慈做功課, 好醒地坐中間諗住一箭雙雕啦, 點知小慈會投訴我唔專心, 小明又覺得我唔係陪緊佢, 兩邊不討好  V___V

逼我揀, 我梗係會睇小慈做完功課先啦!   醒目既弟弟於是出絕招.....

"我好掛住你呀, 突然間!"

講完仲要熊抱我, 頭仔伏晒係我膊頭度, 唔郁..... 唯有俾佢攬一陣, 之後都要恨下心腸話: 

"乖~~  媽媽同小慈家姐做完功課即刻陪你玩!"

久而久之, 小明覺得做功課係一件至高無尚既事!!  因為小慈家姐一做功課, 大家就要肅靜迴避!

小明仲會問我: "幾時到我做功課呀?"

*********

每個星期四放工返黎都趕頭趕命咁帶小慈出去興趣班!  有時一入屋鞋都未除就要拖小慈走

小明呢兩個星期好明顯唔滿意, 今日仲嘴扁扁同我講:

"拖住我!  媽媽你唔好走, 應該係爸爸走先岩架!"

意思係想爸爸帶小慈家姐出去, 我留係屋企咁啦 @.@  擾攘一輪都未甩到身, 爸爸唯有出 iphone / 開電腦聽歌 / 玩遊戲引開佢....

********

今晚上床瞓覺時

弟弟: "媽媽你頭先去左邊度呀?  我明明見到你架喎, 突然間唔見左?"

我: "冇突然間唔見左啦, 我有同你 bye bye 架, 媽媽同小慈家姐出去上堂麻!"

弟弟不置可否說: "媽媽拖住我瞓覺!"

我拖住佢

弟弟: "我要你錫我好多!"

我: "點錫你好多?  咁樣?"  

我錫佢左右面仔好多啖  ^8^ 

弟弟: "係!  係!  係!  就係咁喇!!!"

真係俾佢引到笑左出黎, 但我笑完竟然感到啖啖唏噓, 真係陪得佢太少........

果然, 媽媽係孩子的全世界!!!