遠近慈明: 小慈中二

顯示具有 小慈中二 標籤的文章。顯示所有文章

2020年6月25日星期四

端午糭

復課之後既第一個公眾假期簡直萬眾期待! 尋晚已經講到明大家要瞓到自然醒, 辛苦命既媽媽都只係瞓到 6:45 am 跟住賴床做下腰部運動, 小明瞓到 8:00 am, 小慈 9:00 am.... 真係估唔到!

今日冇出街因為小慈乖囡要準備考試, 老師一 D 都冇減到範圍, 仲要教書教得超快, 一個星期要背 3 課書, 小慈有一晚仲擔心到狂喊第二朝對眼腫晒, 真係冇陰公.... 知道佢壓力好大, 好乖先至會擔心, 會喊代表緊張自己學業, 抵錫!! 都冇辦法啦, 每個人活在世上都有不同程度既壓力, 唯有盡力做, 做好左自己本分, 問心無愧就算架喇, 我好肯定好多同學其實都一樣, 課業上好多唔識亦唔想考試, 網上學習效果真係好差, 幾個月以來都唔知上左 D 咩..... 點都好, 都要收拾心情準備下, 要考就一定要溫, 唔係科科炒晒就真係後悔

至於弟弟, 學校一開始就講左話唔會考試, 只會有 3 次持續評估, 仲叫家長不用花太多時間同子女溫習, 等佢地輕鬆面對, 但又有範圍又有考試時間架喎.... 我本來真係好輕鬆冇理弟弟, 只係臨考前一晚問下 check 下佢 d 野仲記唔記得, 好明顯唔係好熟, 但佢又話得架喇咁, 果然強項 Science 都考得麻麻地! 常識我就唔放過佢, 之前上堂都冇教過咁滯, 而考既野唔背我好肯定佢係絕對唔識既! 當而家水深火熱咁講緊一國一制, 我就好似精神分裂咁教弟弟一國兩制, 高度自治.....

Anyway, 剩番一科英文星期五考就算罷啦, 本應六年級既呢個時候係最開心等放暑假既日子黎架, 已經因為疫情咩都冇晒.... 唉.... 玩啦玩啦玩啦! 今日弟弟已經約左同學一早 online 打機, 聽到佢自言自語, 嚇得我去裝下, 原來佢同同學一邊講電話一邊打機 :DDD

熱屎辣辣開住個冷氣完全唔想郁, 更加唔想入廚房煮晚餐, 好在有四叔四嬸送自家製既家鄉靚糭, 梗係留番端午節先食啦!

小慈小明最鍾意沾白砂糖食, 仲要點到好似反砂芋咁先至夠正!

減肥的媽媽梗係食藜麥醋沙律啦 ^^

呢款糉我就食 :DDDDD

學校隻火雞都扎到成隻糉咁, 好應節

以前話未食五月糉寒衣不入籠, 今時今日全球暖化, 我 3 月已經攞曬 D 夏天衫出黎, 4 月已經日日開冷氣喇.....

2020年6月8日星期一

終於復課

縱然爆出兩次荃灣 & 沙田既群組本地感染個案, 都無阻學校復課既決心! 復課既安排幾頁紙咁長, 又要分批返學, 又要自備足夠既抗疫用品食水食物, 又話學校增添好多衛生設施防疫, 如自動水龍頭消毒噴霧等.... 如臨大敵一樣去面對今日小四至中二既復課!

我地都唔敢鬆懈, 第一時間 check 下功課有冇做晒做齊, 班主任話要跟時序釘好一科一科咁交, 好在小慈小明一直都乖有準時上堂, 每朝都做好功課先玩, 所以執書包話咁快就攪掂! 跟住又試番件校服, 放完個悠長假期之後, 小慈高左, 校服裙要放腳先蓋到膝頭! 肥左 4.5KG 既小明好在仲著得落套校服, 不過兩個對黑鞋就完全唔岩, 弟弟又要剪頭髮, 小慈手錶又冇電, 拿拿聲出街預備喇喂~~

食飽先有力行街街! 成個新城市咁多野食, 佢地都係想揀壽司, 我遊說左一陣先肯去食石頭鍋飯咋

鍋飯既精髓就係飯焦, d 餸其實佢地係唔食既 @.@ 小慈被爸爸感染愛上食泡菜添!

我最鍾意既畫面 ^^

旁若無人

由細到大都幫襯呢間買鞋因為有得驗腳! 弟弟開始有扁平足, 每日要做 15-20 次腳趾撐高運動, 亦都要繼續跳繩刺激腳踭, 腳板仲要大左兩個 size 要著 37 號鞋了

小慈仲厲害要著 39 號鞋 @.@ 腳型又長又窄, 有姆指外翻問題

職員介紹小慈買兩粒 separator, 攝係腳趾公同二腳趾中間再著襪同著鞋, 等佢行路既時候唔會腳趾疊腳趾! Bio-Gel 非常柔軟舒服又軟綿綿, 小慈鍾意到不得了話想要呢 D 野好耐!! 另外又買左個拉腳趾運動橡筋俾佢, 每日拉 20 次, 希望改善佢既姆指外翻問題, 之前已經預約左睇醫院骨科, 排期排到2021年6月, 而家自己做住 D 野等佢唔好惡化先啦 @.@

由星期六開始落雨落到又黑雨又紅雨, 地對空閃電唔知幾多萬次, 到今日開學都仲落緊, 天氣好差呢....

2020年6月8日星期一, 歷時 4 個半月既疫情假, 在狂風大雨, 戴住口罩, 成個書包都係抗疫用品, 終於都可以再返學喇~~~~

疫情前

疫情後, 小慈肥左差少少 4 KG, 弟弟就肥左 5 KG, 好勁呀! 雖然佢地仲係好輕磅, 但我已經抱唔郁佢地喇! 弟弟話肯定開學好快瘦番喎, 下? 唔好啦!

祝大家開學順利健康! 萬事小心唔好鬆懈!!

2020年2月29日星期六

2月29日

教育局於2月25日宣佈, 根據疫情的最新發展, 全港學校會進一步延長停課, 不早於小慈生日 4月20日復課, 即是話仲未可以返學呀~~~

趁住 4 年先一次既 2月29日, 爸爸終於的起心肝維修下我地兩部摺車, 泊係露台都會被風吹雨打生鏽發毛, 不過一輪搶救後都仲踩到

可惜後呔漏氣吹佢唔漲, 唔知邊度可以配過條呔呢?

對於將來仍然有許多未知之數, 我覺得 4月20日都未必開到學, 可能都係分階段上課, 中學生復課先, 但小學同幼稚園應該未必應付到. 隨遇而安吧! 當知道所擁有的一切皆非必然, 要好好珍惜, 心存感恩

2020年2月13日星期四

漫長的停課

1月21日開始放新年假可怕地遇著武漢肺炎, 教育局勒令全港停課, 初時話 2月17日復課, 跟住改到 3月2日, 不過疫情不受控制差不多每日都有新增個案, 口罩又唔夠, 於是又要再延長停課至 3月16日或以後到時再評估形勢, 連小六第三次呈分試都取消埋..... 小明好唔開心, 佢好掛住 D 同學, 擔心小學生涯就咁完結, 畢業營都凍過水..... 事情要咁發生都冇辦法, 保住條命仔緊要!

當打邊爐, 燒烤都會霧化傳播受感染, 潛伏期最長 42日, 周圍都可能有好多隱形患者時, 你真係唔敢出街啦! 放成兩個月假做咩好呢? 梗係食飽瞓, 瞓飽食, 做隻肥豬仔啦 :DDD

小慈最愛既臭芝士, 弟弟最愛既巴拿馬火腿!