教會 12月13日有福音主日, 我地又報名幫手派單張宣傳一下喇! 疫情反覆, 可以返教會就盡量返教會, 可以幫教會做野就盡量參加!!
出發前先祈禱再影張大合照先!
我地今次被安排係人流密集既九龍城廣場開工
加上今次派發單張連同防疫物資, 非常受歡迎呀
等過馬路就係收野既好時機啦 :DDD
主耶穌愛你呀!!
十幾分鐘就派晒 8 袋, 每袋 15 個防疫包!! 大成功!!
這是我從一切勞碌中所得的報償! 大快朵頤
願大家身體與心靈都健康快樂!! 主耶穌愛你! 快來認識衪!
2020年11月8日 星期日
一周年
唔係有面書大人提醒, 都唔記得去年今日秋秋打籃球跌斷手!
有後遺症架! 秋秋而家隻手有 D 風濕痛, 有時又唔係好用到力, 真係一次意外足以有後遺症!
為左補償下呢隻損手, 秋風又起, 我地今晚決定食蟹補補佢!!! 呢兩隻 $360 既大肉蟹爆晒羔真係好抵食, 大過我塊面架!
小慈小明同兩隻蟹玩左半日, 親自放佢地落鋼盆又同佢地沖涼又摸晒殼咁, 仲以為會培養出感情唔捨得食, 原來係唔會架 :DDD
意猶未盡, 再加埋個爸爸黃金臘腸炒飯, 真係大滿足!!!!! (太好味唔記得影相 :P)
近來天氣真係超級靚, 每次上天台都睇到唔同既景色 ^^
呢兩張日落相係小慈影架, 小明非常滿意仲用黎做 profile picture 添!
兩姐弟日漸長大有愛惡有主見, 今日仲幫手處理 D 蟹同幫手洗米煮飯, 爸爸媽媽都覺得欣慰~
見你地咁乖, 得閒又請你地食好野啦!
2020年11月7日 星期六
牧師的家
做左咁多年基督徒, 都係第一次受到師母既邀請去牧師屋企食飯! 促成今晚既飯局更係因為我地竟然有教會以外既共同朋友!! 我地前教會既弟兄又巧合地係師母前同事既老公, 咁奇妙都俾我地連繫到, 唔一齊食飯都唔得啦 :DDD
師母今晚親自下廚, 我地點能夠兩手 fing fing? 於是買左脆卜卜波波提同埋請牧師飲靚茶
解釋下先, 左起: 阮牧師, 阮師母, 我, 秋秋, 阿 Le, 嘉敏
師母同嘉敏係前同事, 我, 秋秋同阿 Le 以前返同一間教會, 而家我地係城潮浸人, 阿 Le 就跟太太嘉敏返教會! 至少十年冇見, 咁都可以人搭人連繫番仲一齊食飯, 一齊聚舊, 真係好奇妙, 充滿神既恩典!
今餐真係超級超級豐富!! 擺得靚又好味! 辛苦晒師母~
仲有阿 Le 買既甜品, 經師母灑上糖霜同襯埋雪糕, 成件事唔同晒!
孩子們既年齡層分別係中一, 中二, 中三, 中四 & 中六, 非常投契岩玩
玩魔力橋玩到搵爸爸們救命, 玩 UNO 又嗌到喉嚨痛非常肉緊刺激, 俾佢地笑死了！
牧師屋企連跑步機都有, 岩晒我地食到咁飽去跑番轉! 我要消脂!! 我要健康!!
今晚真係好開心! 多謝牧師師母既招待, 玩到傾到唔捨得走 :DDD
2020年10月31日 星期六
成績單
學校終於舉辦到家長會了! 之前試過改期, 又試過網上分享, 今日終於可以如期舉行家長教師會周年大會暨派發中英數成績單, 鑒於限聚令人數, 每個家庭只可以有一位家長參加同埋唔可以帶學生, 小慈當年我有出席, 冇理由到弟弟唔去架麻! 今日仲有講座聽添, 由社工分享大家都好關心既問題 "Phone.唔瘋 -- 家長如何走出管教困局"
睇見仔女機不離手有時真係會火遮眼, 但原來當我地發嬲 (Anger) 既時候, body heat diagram 顯示我地對手同把口既溫度係最高! 所以嬲既時候好容易亂講野, 出口傷人, 出手打人! 要好好控制自己既脾氣
唔好因為一部電話賠上了寶貴既親子關係! 馬克吐溫 (Mark Twain) 係美國既幽默大師, 小說家及作家, 亦是著名演說家, 他回顧他的一生時說: "生命如此短暫, 我們沒有時間去相互爭吵、道歉、 發洩、 責備, 時間只夠用來去愛!"
青少年之所以沉迷打機, 因為打機真係好好玩囉! 虛擬世界入面所得既榮譽同滿足感係現實世界永遠得不到的! 協助青少年逐漸離開沉迷, 可以試下認識多 D 朋友取得友伴的關懷, 孤獨的人最易沉迷, 亦可以發展多方面的興趣, 探索不同的事物都係方法!
小慈小明好細個接觸智能電話之時, 我地已經約法三章, 玩之前講明玩幾耐, 夠鐘就會收機, 佢地都試過撒賴, 發脾氣要繼續玩, 我一次都冇就範, 發一次脾氣既後果係幾日都冇機打, 好聲好氣問都或者會俾你玩多 5 分鐘 10 分鐘, 久而久之, 小慈小明係叫得停既! 而家大個左, 返學亦都需要一人一部手機去傾功課呀, check email 呀, 同朋友聯繫等... 打機就更加唔駛講啦, 幾多遊戲係聯線同朋友一齊打先得架, 好難一刀切! 如果我唔想佢地打咁多機, 咪同佢地一齊玩家庭遊戲囉, 大富翁呀, 打麻雀呀, 鋤大 Dee 呀, 一齊玩, 甚至一齊睇電視欣賞電影, 再唔係就一齊上天台, 淋下花, 種下野, 睇下雲, 傾下偈.... 當你 band 佢一樣野時總要俾番 D option, 更好既提議先得既, 如果唔係百無聊賴好自然又會攞部機出黎㩒㩒㩒
講者吳淑華姑娘真係講得好好, 俾個 like 佢! 之後到科主任出黎講解下 7 月註冊時係中學考既分班試成績, 中文數 3 科最高分既都考得唔錯, 不過平均分大家都係合格多少少
中文英文都合格既只係得 30.8%.... Oh No! 怕且大家都係 hea 考, 好在今年疫情, 分數唔會影響師弟師妹
分批入課室, 呢間應該係視藝室, 家長單向坐等雙班主任暨中數老師派番分班試成績及欠交功課紀錄, 由開學到而家, 貴子女究竟欠交幾多樣功課呢? 一張紙一目了然!
小明子欠交 6 樣! 佢大呼冤枉話自己有做只係科長冇收 / 遲左收就當佢冇交! 不過班主任話有個洗底計劃, 呢張紙係唔會紀錄既, 一筆鈎銷重新黎過, 星期一開始就正式黎料, 欠交 5 次會收橙紙! 15 次記缺點 @.@
至於入學時考既分班試成績, 弟弟中英文都合格, 就係頭先講既 30.8%, 不過數學就差少少要再努力!
See? 英文考得唔錯啊~
數學 Quiz 仲史無前例地高分!
都係衰唔小心
7 月既分數同而家開左學兩個月已經好唔同, 分數只係參考, 不過中英數對整個升學都非常重要, 要多加努力! 下星期就統一測驗, 佔整體分數 40% 架, 加油! 加油!!
我一直覺得弟弟係讀書既材料黎架, 記性好又聰明, 上堂專心 D, 溫下書寫筆記, 做卷小心 D, 係有可能名列前矛架! 加油弟弟! 爸爸媽媽期望你讀書開心, 記住學到既知識係永遠屬於你自己架!
新技能解鎖! GET!
2020年10月25日 星期日
調理農務
秋天, 係播種既好時機! 咁岩爸爸又抬左一大包泥返屋企, 係時候上天台調理農務喇 :D
加泥! 加泥! 盆盆都唔夠泥露晒根就死架喇.....
天氣乾燥要常澆灌, 弟弟好溫柔咁 mist 緊 D 盆栽
我地個菠蘿園由 2 變 7 了 ^^
原本俾我地採摘左既菠蘿頭, 果然係旁邊再生多一棵新既! 今次仲唔駛兩年就會有收成添!
小慈學校團契有位弟兄去農莊帶左粒大豆返黎送俾小慈, 小慈又真係試種, 原來佢係刀豆種子, 生得超快仲結出巨大果實 @.@ 望住佢, 非常有 Jack and the Giant Beans 既感覺, 係咪可以直上天庭呢?
試種菜心, 今次非常成功!
於是即刻加碼, 發晒所有菜心苗再買好多個盆黎種, 希望佢地全部生得大大隻隻, 摘埋可以炒到一碟黎食 :P
我地仲有玩種通菜, 將下半段帶根既莖整束插在泥土裡, 呢種叫 "插枝法", 生得好好, 仲開花添呀!
第一次見咁白咁靚既通菜花
豆豆開花, 好靚呀佢!
結出既果子非常得意, 好迷你, 原來佢係眉豆呀!
蕃茄花
青 BB 既蕃茄! 先有花, 再結果
開始要諗方法保護, 好怕佢地會俾雀仔食呀!
種下種下先發覺佢係大種番茄唔係蕃茄仔
我太掛住怕羞草又買左兩盆, 要開枝散葉呀!
Suddenly 開花 @.@
一枝獨秀換左盆係唔係好靚呢?
執左幾個發泡膠盆玩埋種生菜
加泥加到成地污漕漕, 係時候清理乾淨
洗地洗到變玩水
終於成身濕晒
體力勞動後特別肚餓
呢 D 下午茶係唔係特別正先?
仲有自己氣炸栗子
先浸半個鐘, 個頂開一刀, 用糖水煲 15 分鐘, 抹油再氣炸就有糖炒風栗既效果, 超甜! 弟弟仲剝到呢粒心心栗子, 即刻用充滿溫柔甜甜既目光送俾我食 ^8^
小慈都話 Good!
呢張網上圖片好得意
用欣賞感激既目光看世界, 一切都會變得美好!
訂閱：
文章 (Atom)