天灸

弟弟既鼻敏感越黎越嚴重, 每朝起身都包廿幾三十粒雲吞, 成盒紙巾都俾佢用晒!!  小慈又成日手凍腳凍勁怕凍, 胃口細容易暈, 之前聽過天灸採用既藥物屬辛溫之品專門針對虛寒性既疾病如鼻敏感及哮喘, 擴張局部皮膚毛細血管以改善血液循環, 好似好岩小慈小明, 經過中醫診所見到單張又趕得切報名, 就試下三九天灸睇下會唔會幫到佢地啦!

「三九天」就係冬至後冬天最陰盛的日子, 中醫認為呢兩個時期進行中藥敷貼療法效果最好

小慈小明第一次睇中醫都有 D 緊張

中醫師替小慈小明把脈, 問診, 根據佢地既體質選取特定既穴位進行藥物敷貼, 一般選擇既穴位以背部為主, 也用於腹部及四肢, 小慈小明貼既位都差不多, 呢度係第一粒

雞翼位兩粒同背脊 4 粒,  總共 7 粒貼 45 分鐘, 一貼小慈就話好熱, 膠紙位扯住唔舒服成日問我夠鐘撕走未 @.@

好在撕走左都冇起水泡 (醫師叫敷 45 分鐘就 45 分鐘, 唔好貪心以為越敷得耐越抵), 敷貼位少少紅係正常, 抹乾淨塗番少少 lotion 就 ok, 2 個鐘內唔好沖涼, 當然要戒口啦, 牛肉蝦蟹海鮮, 生冷野唔食得凍野唔飲得, 仲要每日下午飲黑糖 / 紅糖薑茶, 就算唔日日飲都係最凍個幾日飲, 薑茶有辛辣刺激性香味, 能促進肢體末端的血液循環, 利於治療流感咳嗽和預防感冒

針對小慈胃口細問題, 中醫師仲建議我地用北芪黨參淮山煲雞, 當湯咁全家飲都得

做完天灸又有戒口又有煲湯又有飲薑茶, 小慈真係冇咁怕凍, 摸佢手仔又真係暖笠笠同以前好唔同!  弟弟朝早乞嚏鼻水又真係好似少左!  得得地呀!!  Very Good!!