係愛呀!

小慈小明成床都係公仔, 實在係太多, 已經用高清袋裝起一大堆, 但佢地點都要寵幸十幾廿隻陪瞓, 鑒於小明鼻敏感日益嚴重, 小慈對腳亦長左俾公仔包圍瞓到成隻蝦米咁窒礙生長, 真係要諗下辦法!!  望住佢地張床, 我忽發奇想, 可唔可以利用空位整 D 層架放公仔, 咁小明唔會咁容易吸到公仔毛, 小慈又可以伸直對腳黎瞓噃!  

上網搵左一輪都搵唔到岩心水, 突然諗起我身邊有個達人, 用木板就可以自製家具, 於是影相問下佢意見先

呢位達人就係 Peter 了!  佢話影相睇唔真, 上門同我地度尺造櫃, 造好之後仲親自抬黎我地屋企!

親自安裝

我真係超爆感動!  一定要同高手達人影低呢個值得紀念既時刻

小明超級開心話想係呢個閣仔度瞓, 我地話承托唔到佢先改為係度做功課 :D

唔夠光仲識開電話燈

跟住到小慈, Peter 叔叔話咁大個位唔止可以整層架, 直情整個入牆櫃俾小慈放書放書包

實在太好用, 放晒公仔仲有位剩

小明都做完功課放好晒佢 D 寶貝, 張床即刻大左好多!

小慈小明, Peter 叔叔出錢出力送兩個櫃俾你地做生日禮物, 真係超級錫你地, 係愛呀!!