急症室

弟弟尋晚無端端發燒, 星期日冇醫生睇唯有食屋企 D 藥頂住先, 食左又退燒喎, 但一唔食藥就即刻燒番, 仲燒到 39.5 度 40.2 度  @.@  我已經返左工, 即刻打去診所掛號, 點知家庭醫生一聽到我話發高燒佢竟然唔睇, 叫我直接去急症室唔好去診所!!!......  我估係因為岩岩又有 2 宗 + 3 宗本地感染個案, 患者兩夫妻住沙田瀝源村, 睇左幾次屋村入面既私家醫生都唔好要入醫院先知道自己確診, 仲傳染埋俾送佢入院既救護員, 攪到 D 私家醫生唔敢再睇有發燒既患者有關

既然醫生要我地去急症室, 我就即刻同公司請假帶弟弟睇醫生啦, 都預左急症室有排等, 如非必要真係非常非常唔想去睇急症的, 無可奈何冇辦法....

一入醫院大門就 scan 到弟弟有發燒, 排隊等登記掛號都要佢坐開一邊既發燒隔離區等候

有備而戰, 弟弟已經帶左叉足電既電話同埋士啤電, 一邊打機一邊等叫名, 佢精精神神仲有氣力打機即係情況唔算太差  :p

大堂等候區都幾多人, 一陣又要去分流站, 一陣又要去護士站, 由攞籌號開始計到見到醫生, 我地屬於次緊急都等左差不多 2 個鐘  @.@  醫生見弟弟有感冒病徵又流鼻水又發燒又有肚瀉, 二話不說安排佢照肺部 X 光, 又要佢驗尿, 亦都要做深喉唾液測試睇下佢有冇中 COVID-19

排隊照 X 光, 排隊驗尿, 再排隊見醫生..... 呢 3 個過程真係最耐, 又要用多 2 個半鐘 (做幾多樣野就要排幾多次隊)  @.@  之所以要再見多次醫生原來係第一個醫生聽左好耐都聽唔到弟弟個肺, 一時又話聽唔到聲, 一時又話有雜音, 佢又趕住收工 (連幾點收工都同我講), 於是交帶俾下一更既醫生, 呢個醫生又再聽多次弟弟個肺, 好在佢即時睇埋弟弟張 X 光片, 話個肺都清應該唔係肺炎, 但始終係高燒都要做深喉唾液測試, 留口水樣本化驗

弟弟一直都好擔心個深喉檢測要撩佢個喉嚨, 所以係醫院咁耐都唔肯食野又唔肯飲野, 怕食左一撩佢會嘔!  前前後後我地已經留係醫院 5 個鐘頭, 之前食左退燒藥先出門而家已經冇晒藥效, 等到弟弟又發燒又發冷, 睇住佢牙關打震, 仲要等埋攞藥先走得, 真係心都痛埋呀......

臨走前先知道個深喉唾液測試原來唔係醫院做, 要自己返屋企, 第二朝一瞓醒唔擦牙唔飲水即刻做既, 有埋彩色影印看圖識字咁俾你跟..... 扯~~~  早響丫!  攪到弟弟係醫院唔飲唔食咁等, 何其陰公......

一早瞓醒就捉弟弟做檢測, 要佢好似伯伯咁 Kruuua 一聲吐一篤口水出黎, 都好順利!  佢都係仲有燒, 不過冇尋日咁高燒嚇死人!!  衰仔呀, 一飲醫生開既咳藥水就嘔晒出黎  @.@   唉~  睇唔慣急症室醫生, 唔識同醫生講開咳藥丸唔好開咳藥水就攪成咁 (其實我唔知佢開咩藥要去到藥房先知)... 為怕弟弟再嘔晒 D 藥, 呢支咳藥水唯有放棄....

簡直係一場誤會, 尋日護士同我講做完個檢測就交番去急症室入口登記處, 於是我計好晒時間早 D 出門口, 7:15am 交完就返工, 點知我去到登記處佢只係收左個袋面頭個張紙話入記錄, 個檢測樣本要我另外交去門診樣本收集處, 不過人地係開 8:30am @.@  我幾想放低係門口就走呀, 點知有婆婆同我講佢地要面對面交收同對資料, 就咁放低佢地唔會理個樣本會掉添架.....  於是我死死氣等佢 8:30 開門, 同公司講要遲 D 先返到去..... 仲要心掛掛唔知幾耐先收到檢測結果, 雖然我都幾有信心弟弟係凍親感冒發燒, 希望真係咩事都冇啦!  Pray Pray Pray!!!

P.S. 原來唔駛 24 小時就有檢測結果喇!  咩事都冇, 一天光晒!  感謝天父!!!

弟弟, 非常時期發高燒真係好叉麻煩, 乖乖地快 D 休息多 D 快 D 好番!