愛回家

教會由我生日之後開始網上聚會, 到 6 月先開始番現場崇拜, 相隔 3 個月, 我地終於返番屋企了!!!

主日學仍然網上授課, 既然一場返到黎教會, 我地決定殺入牧師房睇住牧師現場直播 :DDD

小慈既主日學要下星期先復課, 於是好乖咁坐係出面等我地, 之後我要做招待, 今日既崗位負責為弟兄姐妹量體溫及登記, 突然見到位會友好面善, 原來係我個仔!  佢補完習自己搭巴士出黎搵我地, 仲幫我手射槍添!  呢支體溫槍又快又準, 非常好用!

之後崇拜, 教會跟足晒安全指引, 大家保持社交距離

禮堂兩邊樓梯加裝左扶手, 方便弟兄姐妹上落講台

我地之前仲請到劉江老師同大家講呢 D, 佢既生命見證真係聽到唔想佢停呀

好耐冇見過靖僖喇!  個個戴晒口罩佢差 D 唔認得我地

馬不停蹄, 崇拜完左我地同頌恩 Stanley 一齊食飯, 跟住就返提摩太團, 我地亦都恢復番實體團契了, YEAH!

傾下講下分享近況, 回顧與展望, 我地仲同遠在海外既會友 Keynes 交流添

4 -6 月之星 Tim Sir, 劉會佐, 嘉麗, 小慈, 仲有加拿大佑佑

培茶蛋糕, 啖啖地健康 D

加港團友大合照!  真正主內一家 ^^

我愛既家人, 大家都要健健康康, 擺上時間返教會啊~~

端午糭

復課之後既第一個公眾假期簡直萬眾期待!  尋晚已經講到明大家要瞓到自然醒, 辛苦命既媽媽都只係瞓到 6:45 am 跟住賴床做下腰部運動, 小明瞓到 8:00 am, 小慈 9:00 am.... 真係估唔到!

今日冇出街因為小慈乖囡要準備考試, 老師一 D 都冇減到範圍, 仲要教書教得超快, 一個星期要背 3 課書, 小慈有一晚仲擔心到狂喊第二朝對眼腫晒, 真係冇陰公.... 知道佢壓力好大, 好乖先至會擔心, 會喊代表緊張自己學業, 抵錫!!  都冇辦法啦, 每個人活在世上都有不同程度既壓力, 唯有盡力做, 做好左自己本分, 問心無愧就算架喇, 我好肯定好多同學其實都一樣, 課業上好多唔識亦唔想考試, 網上學習效果真係好差, 幾個月以來都唔知上左 D 咩..... 點都好, 都要收拾心情準備下, 要考就一定要溫, 唔係科科炒晒就真係後悔

至於弟弟, 學校一開始就講左話唔會考試, 只會有 3 次持續評估, 仲叫家長不用花太多時間同子女溫習, 等佢地輕鬆面對, 但又有範圍又有考試時間架喎.... 我本來真係好輕鬆冇理弟弟, 只係臨考前一晚問下 check 下佢 d 野仲記唔記得, 好明顯唔係好熟, 但佢又話得架喇咁, 果然強項 Science 都考得麻麻地!  常識我就唔放過佢, 之前上堂都冇教過咁滯, 而考既野唔背我好肯定佢係絕對唔識既!  當而家水深火熱咁講緊一國一制, 我就好似精神分裂咁教弟弟一國兩制, 高度自治.....

Anyway, 剩番一科英文星期五考就算罷啦, 本應六年級既呢個時候係最開心等放暑假既日子黎架, 已經因為疫情咩都冇晒.... 唉....  玩啦玩啦玩啦!  今日弟弟已經約左同學一早 online 打機, 聽到佢自言自語, 嚇得我去裝下, 原來佢同同學一邊講電話一邊打機 :DDD

熱屎辣辣開住個冷氣完全唔想郁, 更加唔想入廚房煮晚餐, 好在有四叔四嬸送自家製既家鄉靚糭, 梗係留番端午節先食啦!

小慈小明最鍾意沾白砂糖食, 仲要點到好似反砂芋咁先至夠正!

減肥的媽媽梗係食藜麥醋沙律啦 ^^

呢款糉我就食 :DDDDD

學校隻火雞都扎到成隻糉咁, 好應節

以前話未食五月糉寒衣不入籠, 今時今日全球暖化, 我 3 月已經攞曬 D 夏天衫出黎, 4 月已經日日開冷氣喇.....

結婚 17 周年

好近呀!  好近呀!  今年父親節同我地既結婚周年孖住上, 尋晚已經出左街食飯仲要食到咁飽, 連續兩晚出街真係攰攰地又唔知食咩, 要揀我都係會食西餐, 經商量後, 我地決定自己煮留係屋企慶祝 ^^

整薯蓉, 整藜麥醋沙律, 煎牛扒 easy easy :)  

最開心係弟弟, 一來我地留係屋企食飯, 二來今晚有特別野食, 佢一早已經係廚房偷食薯蓉同埋蕃茄仔喇!

爸爸仲係天台捉左隻自來螳螳俾佢, 爸爸話佢自己跳上手背俾佢捉, 好得意

好耐冇見呀螳螳!  弟弟好掛住你!!  同佢玩左一陣就放番佢上天台覓食, 我地食飽螳螳都要開餐, 記住要開枝散葉, 生養聚多呀!

結婚 17 年快樂呀, 老公!  你似水一樣不可缺少, 同埋你知道我幾鍾意飲水先得架 ^8^

I Love You!!  老公!!!  17 年有人叫玫瑰婚, 好浪漫~~

解令下的父親節

一日都係我, 椎間盆突出, 醫生勸籲臥床休息, 鑒於今晚約左爺爺出街食飯, 秋秋唔想我咁瀕撲就留係屋企繼續參與網上崇拜, 冇得企係教會禮堂接受為人父親既掌聲....

小慈小明非常識做, 一早送禮物俾爸爸氹得佢好歡喜

小慈你大件事喇, 寫 Kiss Kiss x 20 次冇死線, 即每次你都要 kiss 20 次咁解?!?  錫到咀都歪.... 哈哈哈

我好鍾意呢首詩歌, 願我家基督化堪稱完美家庭的典範

父親節獻唱係教會既傳統, 今年呢首 <父親寫的散文詩> 歌詞簡直催淚

今日陽光普照, 熱辣辣我地做咩咁傻係天台曬?  事出必有因, 我地睇日偏蝕呀!  當然唔好咁傻用眼直視太陽, 我地隔住張玻璃枱反光咁睇

完全影唔到, 只影到個藍影, 奇怪得黎好特別

高手在民間, 好多朋友仔影得好靚

解令後第一次全家出街食飯, 大家好似好耐冇見咁!  今晚我地去油麻地食蒸海鮮, 老細介紹架

食材非常新鮮, 生蝦咁跳, 小明一邊叫殘忍一邊細心欣賞

樣樣餸都好好味呀!!!  我就梗係歡喜食龍蝦, 爆晒羔超正!  弟弟等左成晚食蒸手切肥牛, 個人食左 8 塊, 又極欣賞最後既芋頭排骨粥, 食左 7 碗!  我地都係食唔晒, 小慈要求打包返屋企明天當 lunch  :D

弟弟捕捉到爸爸既奇怪表情, 仲俾佢影到相, 好似發現新大陸咁開心, 爸爸表示無奈

即刻整 sticker

一呼百應, 小慈又整埋一份, 笑到肚攣呀佢兩個

好飽, 又開心, 大家對今餐飯非常滿意, 爺爺都笑咪咪, 要 encore 啦!

祝三位父親身體健康!  笑口常開!

清淨西貢海岸

2018 年山竹之後, 我同弟弟一齊清潔沙灘, 但礙於當時年紀小只能安排弟弟執樹葉, 弟弟耿耿於懷...

機緣下我地認識左西貢小茜, 佢同西貢社區中心轄下既社會企業有合作, 2019 年1月更加得到環保基金資助而開展清淨西貢海岸既義務工作, 我地今次跟住小茜, 已經係佢第 25 次, 共 414 人次, 為 12 個偏遠既海岸執垃圾, 何等大既毅力與愛心!  叫得做西貢小茜, 佢梗係好愛呢個地方啦!

每人要揹 2 公升水, 帶泳衣, 替換衫, 傘, 太陽油, 雨衣, 防蚊用品, 午餐.... 一大包咁, 小慈小明話輕過書包好多, 完全冇問題喎 ^^

分發物資, 每人一個環保袋入面包括: 鐵夾, 4 個大垃圾袋, 勞工手套, 助浮衣, 便利雨衣

而家一號風球, 時晴時雨, 我尋晚又突然腰痛, 知道活動冇取消, 我亦唔想小慈小明失望, 於是食住止痛藥起行啦

由西貢遊艇會花園起步, 步行山間小石路, 落雨落斜我地要打橫行, 龜速, 目的地係麻南笏

我地終於黎到喇!!

一個人都冇既沙灘, 仲連名都冇添!  小茜叫佢做老虎岩

離遠已經見到岸邊有垃圾

地下仲一大堆

我地既隊友仔為大家撐起帳篷, 怕突然落大雨我地 D 袋會濕晒, 食物又會變壞, 辛苦晒!

小朋友可以休息一陣, 回一回氣先

弟弟話去濕下條毛巾, 終於大半個身連鞋都濕埋, 由細到大都知佢見水就會忘形, 有帶衫換 ok 啦~

Briefing 講解下附近環境, 注意事項

開工!

每人揀一個範圍執垃圾

大家都好努力, 目標係每人裝滿 4 個大垃圾袋

小慈執到無數咁多膠樽膠袋, 車碌都執埋, 仲有 D 橙皮添

翻開 D 石頭就會發現垃圾, 大量打火機, 膠飲管, 膠樽, 紙包飲品, 生鏽既較剪

小茜執到一包必理痛, 用過既 M 巾, 膠鞋, 米袋都有......

呢個口罩係由海度撈上黎架

全新既紅白藍都撈到 @.@

小慈的成果

弟弟的成果, 細細粒既發泡膠粒最難執, 但係成個沙灘都係喎 @.@

終於停雨出太陽, 弟弟耐唔耐就落海濕下條毛巾

發現小螺, 佢啜住弟弟隻手, 好得意

發現大膠筒, 弟弟孔武有力咁推佢上岸, 等佢唔好變微塑膠俾魚仔海龜誤吞

鑒於岸邊太多垃圾, 小慈小明忍唔住換泳衣落水執

拖左個膠袋上黎, 仲有好多魚網

垃圾撈極都有

小慈發現鳥類頭骨!!!  好特別呀!  唔知係咩雀黎呢?

大型垃圾執到7788, 係時候摸下海底同玩下水 :D

嘩~~  發現榴槤殼!!!  唔可以俾佢留係海底架!

海岸乾淨左好多 ^^

天文台話會好快掛三號風球, 為免危險我地要收工!  時間太短, 今日只係執左 9 袋垃圾咋.....

同我地辛勞既成果影張大合照先

要做紀錄, 抽查其中一袋垃圾睇下佢有幾重, 呢袋 8 KG

仲要攤佢出黎分析佢既成份

點算記錄, 呢袋最多既係包裝袋同發泡膠

小茜授課中

膠袋對動物及魚類既影響係你完全想像唔到咁厲害, 越聽越慚愧

真係好可憐呀... 我地污染緊佢地既屋企, 間接殺死佢地

三號風球逼近雖然一 D 都睇唔出, 但我地要回程以策安全, 不過我地其實好唔想走的

上山下海體力透支, 小慈小明兩個極速食晒 2 舊飯團! 

回程路艱辛, 上斜仲攞命, 大家都冇晒聲了

返遊艇會等的士

邊忽似三號風球?!?  藍天白雲曬到不得了

多謝嘉麗姨姨幫我地報名參加今次咁有意義既活動, 為地球先生出一分力!

非常多謝小茜無盡既分享, 佢真係咩都識, 行山潛水咩到掂, 好厲害, 又有愛心, 有意志有毅力, 係我地學習既好對象, 認識你係我地既福氣 ^8^

望住自己執既垃圾, 好多都熟口熟面, 感覺好似自己有份掉落海咁.... 如果冇人執, 佢地就永世都留係海灘, 被巨浪由岸邊拉入海洋, 再衝番上岸, 又再拉入海洋..... 循環不息咁由大舊撞到變細舊, 再化成微粒, 膠類製品更變成微塑膠被魚類吸收, 我地又進食魚類.... 生生不息, 其實就等如我地自己食垃圾 @.@

好好的一課!  如果真係要製造垃圾, 學小茜話齋真係要用到佢殘, 用到佢盡, 用到佢冇得救, 先至好真係掉佢落垃圾桶......