年宵花市

通常第一印象非常重要, 感覺良好之後就會繼續下去.... 我講既係小慈小明, 舊年行年宵超級開心於是今年不停問我幾時再去?  我問佢地有野想買咩?  小明即刻話要拖番舊年隻狗, 小慈仲指明要行維園添, 真係識揀 ^^ 

今年天氣好好, 又唔算太多人, 自拍都冇俾人撞 :)

雞!  全部都係雞!

呢檔雞脾好逼真, 話連宇宙最強既人都買番屋企喎

雞不可失... 好得 Chick.... D 名真係好攪笑

埋黎睇埋黎買, 好靚既炒栗子呀喂~~~

呢個機械人我細細個都有呀!!  好得意, 幫襯佢地買左條吹波膠, 細時吞唔少落肚架我

毛記電視既毛記劣食真係笑爆嘴, 佢 D 名真係正到..... 唔敢食呢

年宵亦有不少政治色彩, 傳聞楊岳橋 $38 同人合照一張幫個黨籌款, 可惜今日見唔到, 只見林日曦在毛記賤貨寫大字

 整串冰糖葫蘆穩陣, 仲有小慈小明最鍾意食既糖蔥餅

未行晒就已經俾呢檔兒時玩具吸引住, 咁鍾意摺東南西北既兩姐弟, 點都要買返去啦!

仲有佢地由頭恨到尾既氫氣球, 弟弟揀左隻企鵝, 說好的拖狗呢?

我地逗留得最耐既一檔係叫「正品派發」, 初初係有個叔叔派抹布, 又黑色又白色又示範埋點用, 派派下就派一個有包裝既袋, 話係超市、家品有得買, 跟住又派密實膠條, 又長又短咁, 又數人數話要預幾多條去派, 又送出打唔爛砧板又話成袋 pack 好晒送俾在場每一位, 仲話見大家咁留心咁好反應要送出鎮店之寶 $1688 既鑄鋁陶瓷鍋, 話老細寧願擺檔派試用裝都好過用二三百萬請名星賣廣告喎, 做示範要大家留心睇, 答岩問題就送 $1688 既鍋...... 到最後做心理測驗, 話如果係好既野要你俾錢你都會買云云, 真係有十幾廿人買左特價 $498 既鍋....  學到野呀!  3D 納米技術呀!  人既心理拿捏得非常到位!  我地都買左一個, 因為個湯煲爛左, 秋秋想買黎蚊牛腩, 如果唔係一早拉我地走左啦!  於是買到大包細包咁返屋企  >v<

行左咁耐又肚餓, 拉大隊去食我恨左好耐既花園餐廳 ^^

3 個餐 3 杯飲品, 最爽係我 3 杯都有得飲

滿載而歸!

山火團年飯

爺爺同姑媽姑丈農曆新年去日本旅行, 於是我地提早食團年飯, 突如其來既寒冷天氣警告, 姑媽決定打邊爐一家人圍埋一齊團年 :)

小慈乖乖為大家灼蝦滑, 好好味呀!

特別版長罐可樂好攪笑

點知食食下飯工人姐姐傳來一張照片, 我地屋企後面座山成個山脊燒著左, 原本救熄既山火死灰復燃仲乘風勢燒埋我地條村...... 拿拿聲返屋企, 一落車就見到火光熊熊, 十幾廿架消防車在山下駐紮, 我地即刻閉晒全屋既窗上天台睇住, 真係好近, 我地聽到樹木被山火燒到壁瀝啪肋, 堅驚  @.@

警察同消防員入左村戒備, 最近山既一排屋好似燒緊屋頂咁要疏散, 我地唔知要唔要, 唔敢瞓, 差不多全村既居民都出晒黎.  聽村長講, 16 年前都發生過山火, 燒足 3 日, 暫時睇風向吹山頂應該唔會太危險, 但太大風太乾燥都應該要燒好耐

等到 11:XX  小慈小明已經捱唔住, 叫佢地著住出街衫瞓覺, 萬一要疏散就即刻走!  佢地驚, 瞓唔著, 唔怕!  天父係大廳!  我地將擔心交託俾天父, 天父必定看顧, 亦為到辛勤通宵工作既消防員祈禱, 求天父加添佢地既力量, 越夜越凍, 求天父保守佢地

一早已經俾直昇機聲叫醒, 山火已經熄滅!!!!  哈利路亞!!  飛行服務隊大清早再向山淋水, 預防第二次既死灰復燃, 由星期五開始佢地已經擲左 58 個水彈, 真係好辛苦!  我地就第一次親眼睇住佢地投彈, 好近、好大聲、好有型!

好難忘既經歷

辛苦晒所有消防員、飛行服務隊、警察及所有公職人員, 你地為左我地既性命、財產、家園不辭勞苦, 感激你地呀!!!

基督女少年軍宿營

今日應該係好日子啦, 中國舞比賽同基督女少年軍宿營撞正同一日, 老師都非常緊張事前打電話俾我問我會唔會退宿?  因為跳舞比賽到 5:00 pm, 需要我到比賽場地接小慈再直接送到營舍, 好在我都攞到假去睇小慈比賽同埋做人肉 uber, 當老師同我講在高山劇場比賽時我真係鬆左一啖氣, 幾怕佢話去屯門大會堂比賽我真係唔知點送佢入西貢!?

人肉 uber 飛的士, 連的士司機都唔知邊度係香港青年協會賽馬會西貢戶外訓練營, 冇地址, 冇街名, 攪到要出動導航, 最後車資 $150 比我想像中平, 飛車入去仲見到少少日落 ^^

小慈剛剛趕得切入營 BBQ, 今年終於冇落雨燒得成  :D

老師可能有愧於我地咁辛苦入營, 私下幫小慈影靚相晨早 send 俾我 :)

GB Girls 大合照

幫小慈落晒妝先入營, 但佢 gel 到個頭箭豬仔咁真係冇計, 西貢青協 camp site 出名企理, 於是吩咐小慈放心沖涼, 用護髮素洗一洗先再用洗頭水, 衰妹足足洗左 3 次頭先覺得乾淨, 第二朝仲非常自然咁唔紥辮就出營, 話俾頭髮休息下喎  ^o^

燒左麵包腸仔雞翼牛扒, 玩左羅馬炮架, 同隊友去空中花園傾偈食零食玩鬼口水, 開心到不得了~~

抵媽媽咁辛苦人肉 uber 運你入去  :D

第 53 屆學校舞蹈節

今日只係正式比賽既第 2 日, 小慈就要代表學校出賽喇!!  好在聖誕節有加操, 不過都係時間緊迫, 上星期先排埋謝幕咋, 唔係太熟, 小慈都表示有 D 擔心練習唔夠, 佢有個動作要碌過方蔚個背脊, 好怕失手, 唯有祈禱交託天父保守一切順利啦!

今年得 12 個妹妹比賽, 又係星期五既下午, 學校老師話攪得掂唔駛家長義工幫手, 於是我直接去會場支持小慈啦 ^^

比賽舞蹈: 苗族舞「辣椒紅了」, 講述三位苗族姑娘慶祝辣椒大豐收, 其他小姑娘設計偷走辣椒, 究竟佢地成唔成功呢?

我淨係睇都緊張到手心出汗!!  最少 8 個人比賽小慈隊得 12 個, 人家最多 32 個編舞上人少較蝕底.  不過好感恩, 佢地冇失手, 仲吸收左上年經驗, 個個都笑住黎跳舞, 好好睇呀!!!  套衫同個妝都好靚呀!!!!  多謝老師幫手影相!

第一次在高山劇場新翼比賽

小慈好靚女, 忍唔住係咁同佢影相 ^^

襯晒新年 look  :D

比賽結果得到超過 80 分有「甲級獎」, 真係好開心!  排練咁倉卒都有咁高分, 如果 3 月先比賽可能有優等獎添呀!!

超感官暴龍展

2013 年, 科學館舉辦「巨龍傳奇」, 一隻隻活生生既恐龍呈現大家眼前, 淨係門口隻腕龍都有2層樓咁高, 好好睇, 好精彩!

事隔 4 年, 科學館再次用恐龍做主題舉辦「超感官暴龍展」, 我地梗係捧場啦~~

不過今次冇「真」恐龍睇, 全部用 iPad 對住指定地方, 恐龍就會在螢幕出現

用螢幕研究暴龍, 頭比人類大但不及我地聰明

好多資訊, 不過會場太暗 D 字有 D 難睇

呢個虛擬新體驗要 13 歲以上先有得玩, 小慈小明好失望, 於是就由我同爸爸玩完話佢地知係咩, 其實係 VR 技術, 戴左副好重既眼鏡就有立體效果, 故事話我地搭降落傘飛左去暴龍住既地方作近距離觀察, 點知意外墜下差 D 俾暴龍食左, 遇上空氣污染冇太陽冇植物生長令所有恐龍冇食物漸漸滅亡

我地玩緊 VR 既時候, 小慈小明就走左去同大電視入面既恐龍玩

參加工作坊「尋找恐龍足跡」, 係砌番隻恐龍腳板出黎, 俾弟弟發現 puzzle 後面有號碼, 跟 number 所以砌得好快

恐龍展好快參觀完, 好在科學館仲有其他野玩

光線折射同鏡係好好玩架

砌潛望鏡

入左森林

咁大個顯微鏡連條鬚都睇得好清楚

好有型既虎斑蝶

爸爸加以講解

呢幅昆蟲標本牆, 超靚!

弟弟而家當然最鍾意螳螂啦 ^^  屋企個兩隻係草綠色既唔似係呢幾款

弟弟拉左隻貓既 DNA 出黎, 小慈拉左人既 DNA 長度

Jimmy 骨呀!!

度高磅重!

小慈小明身高都岩標準, 不過重量就差得遠, 輕飄飄將來唔駛減肥 :P

今次超感官暴龍展冇上次咁驚喜, 我地都係鍾意 D 大大隻隻既恐龍夠震憾, 攞左塊 iPad 睇電視咁都係差 D D