小慈乖乖為大家灼蝦滑, 好好味呀!
特別版長罐可樂好攪笑
點知食食下飯工人姐姐傳來一張照片, 我地屋企後面座山成個山脊燒著左, 原本救熄既山火死灰復燃仲乘風勢燒埋我地條村...... 拿拿聲返屋企, 一落車就見到火光熊熊, 十幾廿架消防車在山下駐紮, 我地即刻閉晒全屋既窗上天台睇住, 真係好近, 我地聽到樹木被山火燒到壁瀝啪肋, 堅驚 @.@
警察同消防員入左村戒備, 最近山既一排屋好似燒緊屋頂咁要疏散, 我地唔知要唔要, 唔敢瞓, 差不多全村既居民都出晒黎. 聽村長講, 16 年前都發生過山火, 燒足 3 日, 暫時睇風向吹山頂應該唔會太危險, 但太大風太乾燥都應該要燒好耐
等到 11:XX 小慈小明已經捱唔住, 叫佢地著住出街衫瞓覺, 萬一要疏散就即刻走! 佢地驚, 瞓唔著, 唔怕! 天父係大廳! 我地將擔心交託俾天父, 天父必定看顧, 亦為到辛勤通宵工作既消防員祈禱, 求天父加添佢地既力量, 越夜越凍, 求天父保守佢地
一早已經俾直昇機聲叫醒, 山火已經熄滅!!!! 哈利路亞!! 飛行服務隊大清早再向山淋水, 預防第二次既死灰復燃, 由星期五開始佢地已經擲左 58 個水彈, 真係好辛苦! 我地就第一次親眼睇住佢地投彈, 好近、好大聲、好有型!
好難忘既經歷
辛苦晒所有消防員、飛行服務隊、警察及所有公職人員, 你地為左我地既性命、財產、家園不辭勞苦, 感激你地呀!!!
沒有留言:
張貼留言