學期尾

今次派成績表, 真係一啖砂糖一啖糞, 我講既係小明呀!!!  份份卷都識, 但每科都豪 10 分以上俾老師!  最離譜係聖經, 耶穌既說話同魔鬼既說話調轉填, 12 分呀 (怒吼~~~~) !!!  明知佢衰唔小心, 於是考試之前用佢最想要既千歲鷹利誘佢, 考到 4 科 A 就送, 小明記性好又一里通百里明, 其實好容易, 門檻非常低, 中英數 Science 常識聖經計埋普通話體育啦, 音樂佢就差 D, 但點都會攞到 4A, 我仲諗住就算佢攞 3A 都賣大包送俾佢既, 點知.... 佢自己唔爭氣, 真係一地眼鏡碎, 好失望下架我  T___T  最後, 小明唯一一條 A 竟然係音樂 @.@  郭小弟真係好難估計!  於是, 千歲鷹飛走左, 黎緊既暑假就同小慈家姐一齊補習啦, 一日做幾份卷寫錯字要改十次, 改到你變小心謹慎為止, 我問你死未!

班主任既評語係話佢「多言好動」, 好在 3 項操行都有 B, 算乖

講完啖屎, 都有 D 甜野, 小明因為積極參與校內活動, 老師頒左個服務良好獎狀俾佢!  佢呢個搬簿生都真係好落力為同學服務架

另一啖砂糖係人仔細細既郭小明真係被老師選中當上全校最細既領袖生!!  我話, 梗係我篇自薦信寫得好感動左老師啦!  點知小明話係佢抄得靚先成功喎 :D

之後仲同小慈家姐一齊參加領袖生訓練日營添, 沾沾自喜

4 至 6 年級原來都有好多領袖生, 能夠成為其中一份子都係開心既, 要以身作則呀!  小慈到而家都未擇過小朋友名, 次次都係好言相勸架

至於小慈, 佢真係好乖好乖!  佢要溫習既野真係好多內容又深, 我工作忙都分身乏術冇時間教佢, 於是去補習社補晒中英數, 差不多日日補到 7 點幾 8 點都毫無怨言, 好想追到成績好想自己進步, 我同爸爸當然看在眼內啦, 於是為小慈呈分試日日祈禱!  天父呀, 小慈咁努力, 可唔可以俾佢試下成功既滋味, 俾佢付出與收入成正比, 俾佢有動力繼續撐下去呀?

上帝聽禱告, 小慈科 Science 史無前例攞左 96 分全班最高分, 開心到不得了!  考試返黎佢已經話份卷好淺, 我仲以為係老師出得淺, 原來係佢識晒所以覺得淺!!!  其他科全部都有增長, 唯獨係科數都仲差 D D, 本來有 63 分破紀錄合格架麻, 點知, 老實過郭靖既佢出去自首話俾老師聽改錯卷.... 雖然好肉赤, 但我非常自豪我個囡有高尚既品格!  我自己都未必做得到, 所以小慈真係好乖好乖!!  補習老師都話佢進步緊, 第二次呈分試有信心小慈攞到 70 以上!! 不期望你名列前矛, 中中挺挺, 開開心心, 有盡力做好就可以了, fighting!!

太乖, 爸爸送左一盒大 Lego 俾小慈!  另外隻千歲鷹就繼續 keep 住引弟弟, 嘩卡卡卡 :DDDD

五年級好多科既長題目都興問小朋友感受或意見, 溫習時見到小慈咁答, 小慈真係坦白得好可愛!

估唔到小慈雖然成績平平, 但老師都睇得出佢乖, 在結業禮俾左個驚喜佢, 上台攞獎!!!

太肯幫人, 參與多個崗位, 班長, 領袖生, 基督女少年軍.... 於是得到「服務獎」!!  由校長頒授 ^^

小慈實至名歸, 爸爸媽媽真係替你好高興!!  We really proud of you!!

愛錫佢地既班主任仲同佢地開大食會, 慶祝放暑假

小慈既好同學

品學兼優, 小慈你個「品」真係毋庸置疑, 「學」就一定追得上既!  做得好好, 繼續加油!!!

小慈參觀立法會

五年級既常識好深, 今次考香港既歷史、經濟, 何謂高度自治、一國兩制, 特區既行政立法司法機關, 三司十三局..... 背到吐血咁滯, 不過就令小慈突然對立法會瞭如指掌, 當知道自己幸運地抽中可以去參觀立法會綜合大樓時, 真係開心到跳起!

溫書時要舉例一個議員, 長毛易認易記, 梗係背左佢啦, 今次俾小慈見到真人, 開心到即刻話俾我知!

仲派咭片添 ^^  小慈話長毛好好人, D 頭髮真係好長 :D

導賞團開始了, 每人一張 pass

終於見到議事廳了, 小慈話佢呢張相影得好靚!

仲有幸抽獎抽中本「字典」返黎, 非常難忘~~

讀萬卷書都要行萬里路, 鞏固所學既知識, 記足一世 ^^

班長

恨左 5 年, 終於俾小慈恨到做班長!!!

一二年級班主任, 三四年級班主任, 不約而同要全班成績最好個一位同學先可以做班長, 小慈望門輕嘆, 因為佢四年都同全級考第一個位同學同一班....

又做班長又係領袖生, 仲有基督女少年軍, 風頭真係一時無兩 ^^  班長要負責 D 咩呀?  小慈話要維持轉堂時既秩序, 有需要就要擇名, 黑板個「班長」 list 就係小慈寫既, 以佢善良既個性, 應該都係勸退曳曳同學而唔會擇名啦!  做咁耐領袖生佢都未擇過名, 令我諗起個支善良的槍添 :D

如願以償既感覺真係好開心!  恭喜你呀, 小慈!

4.14 《籠》主. 我憂患的主

受難節 . 晨更祈禱會籌備多時, 今日正式演出, 全世界 7:30 am 返教會 stand by!

 作為家人, 我地梗係鼎力支持小慈啦!  全家一齊出動 ^^

換衫、化妝、set 頭、戴咪..... 小慈做番自己所以好快 ready

小明好似人地初入片場參觀咁興奮!  發現道具組寫左句「死人包租婆」笑開懷了 :D

Live Band~~  弦樂組係佈景後面發聲, 真係太正了!

一切準備就緒, 等觀眾入場

[主, 我憂患的主] 現今仍在我們當中承擔我們的罪孽

演出 40 分鐘, 觀眾非常投入

演出成功!  牧師話提名小慈攞最佳新人獎 :D

 震撼既一幕, 兩母女一齊喊住演出!  Good Show!!

小慈好乖, 教佢既野都有做晒, 很有潛質, 甚至有人讚佢有童星味, 我地以你為榮 :D

打擊後既獎勵 -- 食小慈最鍾意既軟殼蟹手卷, 大滿足!!

相對於主耶穌釘十架既痛苦、受盡世人既唾棄辱罵, 人算甚麼?!

Final Run

由 3月尾到而家, 由一個星期綵排一兩次, 到一個星期綵排三四次, 再到呢個星期晚晚綵排, 睇住小慈每次都有進步, 真係幾開心, 排劇仲有好多難忘既經驗, 小慈已經同我講超過一次覺得話劇好好玩, 唔覺得辛苦, 仲話出年如果再有機會都想再參加 ^^

影宣傳照, 竟然話小慈個樣 95% 似爸爸  @.@

有晚綵排時誤撞喉管, 洩露煙霧觸響警鐘連消防員都黎埋, 呢個經驗真係勁難忘

教會弟兄姐妹原來臥虎藏龍, 音響、燈光、攝影、配樂、道具樣樣都有人識, 今日佈景組真係砌左個籠屋出黎!!  勁逼真!

超勁正!  嘆為觀止!!

呢一格就係小慈與劇入面媽媽既床位

好狹窄, 小慈感受好深

借錢梗要還, 咪俾錢中介!  道具組好野!!

一有時間就對戲, 有埋佈景更加投入, 大家都好認真, 小慈被感染了

第一次見 Walkman

今晚要化妝、換衫、run through, 攪掂晒既小慈自己玩等埋位

趁呢個空檔, 我梗係幫佢集郵啦!  Up to You 高手如雲, 連媽媽我都學到野

每個哥哥姐姐姨姨叔叔都對小慈愛護有加, 俾左佢一個非常非常愉快既體驗, 開佢既眼光, 多謝你地!

大咪哥真係好好笑!  聽得多睇得多, 小慈已經背晒成套劇所有人既每一句對白

今晚仲有 Up to You 之寶既寶哥黎幫手執排, 學到野呀!  寶哥話小慈做得好, 遲下有套兒童劇都會搵小慈幫手 :D

影劇照

攝影師 Dan Dan 真係高手, 影得好好呀!!

掌握每個角色既神韻

我好鍾意呢張台前幕後既大合照, 大家都笑得好開心

好開心有機會參與事奉, Up to You 你地每一個既認真, 令我深深感動, 我們原是要將最好既獻於主, 不論時間、才幹、金錢、愛心....... 就是要獻上最美!!