腸臟腫瘤一直都係度, 太黏連西醫話完全冇野可以做, 於是秋媽搵到一個非常好既中醫為佢調理, 令佢行得食得訓得肥左之餘, 癌指數仲去到 frozen 狀態, 縱然揹住一個造口袋, 秋媽都可以同我地一齊去旅行, 更加可以返鄉下住左兩個星期
今年中秋節, 秋媽開始唔舒服, 肚脹冇胃口但一食野就瀉, 我地都覺得似翻發, 但秋媽一直好硬撐話睇中醫就得, 終於秋爸見勢息唔對痛得咁辛苦二話不說車左佢入醫院, 再一次入聯合急症, 10月29日, 一入院就上左病房急救, 醫生話腹膜炎過唔到今晚, 好大打擊, 好突然, 於是我地即刻請來教會黎牧師為秋媽灑水禮
原先秋媽都上緊慕道班準備 12月7日受浸, 而家牧師俾佢打尖
我地一家人見證下, 秋媽受洗正式成為基督徒, 天使都一同歡喜快樂!
神既恩典夠我地每一個用, 本來以為秋媽過唔到 10月29日, 仲叫晒 3 個孫黎見最後一面, 但神恩待秋媽, 俾秋媽有一個好溫柔好盡責既女醫生, Annie 趙, 由安排落強心針嗎啡針, 到停強心停嗎啡到可以飲湯, 再到腸塞抽針放積水氣喘, 當中試過 3 次話捱唔到, 由絕對唔捨得, 到睇住秋媽一日比一日辛苦, 我地日以繼夜咁出出入入醫院已經 3 個星期都開始頂唔住作病..... 終於, 11月16日星期日安息日, 風和日麗陽光普照, 係我地全家人陪伴之下, 秋媽要見到主耶穌先肯合埋眼一無掛慮地回到天家, 跟主耶穌一齊, 再沒有痛苦, 再沒有眼淚
醫院呢三個星期, 所有心底話都跟秋媽說過了, 佢完全冇野放唔低, 因為佢話我地有主耶穌照顧冇野好擔心, 唯獨是始終都係中國人, 唔肯講佢要土葬定火葬, 但肯用基督教儀式. 秋說很久很久之前當新聞報導話香港骨灰位好緊張要唔要後生買定, 秋媽就話佢唔怕, 最多咪返鄉下葬係佢媽隔離, 大把位! 家姐聽完之後話媽媽好少吹水, 於是我地即刻著手籌備回鄉安葬事宜, 打個電話. 原來, 婆婆的墓地十多年前已售罄, 咁岩呢幾日就有一個位放番出黎, 原先呢個人十幾年前買落俾佢爸媽, 但呢十幾年佢爸媽仲健在之餘, 呢個人亦越來越有錢, 覺得呢個墓地唔夠堂皇, 就放番個位出黎自己起過個新墓地, 都係呢幾日既事, 就咁岩俾我地買到最後一個位, 仲要係孖位, 將來秋爸都有著落, 真係好奇妙呀!!!
好多神蹟發生在我地身上, 來讓我數算主恩! 由於秋媽受洗加入教會, 整個喪禮由播道會負責, 殯儀更有一站式服務, 令到咩都唔識既我地好放心, 要我地預備既野真係好少, 只要搵衫及搵相. 當秋秋話要搵相時, 我心目中已經有一張, 點知換左電腦搵極都搵唔到 @.@ 最後感恩秋秋知道我一直都好緊張每一張相, 耐唔耐 back up 完又 back up, 終於係唔知邊個 back up 度搵番呢張, 係小慈 2 歲時我地邀請嫲嫲爺爺一齊去影樓影既靚相, 秋媽笑得好靚好靚, 全家一致通過用呢張 :)
你睇秋媽幾靚~~~ 都要預備吉儀, 要入紙巾 $1 及糖, 話說舊年秋公司 X'mas Party, 秋中獎出去玩遊戲一手捧到幾多 $1 就係你既, 羅左成大袋返黎, 早前搬屋先搵番出黎唔知點洗, 我本來仲想去政府個架換錢車度換左佢點知唔岩時間擱置左, 原來就係要用黎做吉儀, 數量仲要岩岩好, 真係好奇妙呀! 感謝神 ^^
12月5日就係安息禮, 小慈小明昊昊岩岩好考完試, 時間非常配合, 神知道我地既處境, 恩典一定夠我地用
我一直都好懼怕殯儀館, 好怕死, 見過人跳樓成日都發惡夢, 中三時都係因為怕伊拉克打仗再加有個好同學媽媽過左身, 令我思想人死左究竟係點? 去邊度? 於是跟同學返教會. 我信得好投入好火熱, 16 歲就受浸正式成為基督徒, 有左主耶穌之後, 我呢個好容易緊張, 好易擔心驚青經常心跳過快既人, 都仲係會驚, 但每次驚都祈禱, 祈禱完就有平安, 每次祈禱神都幫我, 神係好真實好慈愛既! 今次再要踏足我好恐懼既殯儀館, 但今晚整個過程都好平安, 因為神係呢度掌權作王!
安葬禮地點在和合石, 我第一次黎, 呢度好靚好舒服
陽光普照, 天晴溫暖, 安葬日同秋媽離世時既天氣一模一樣, 好奇妙! 一步又一步, 這是恩典之路, 神愛世人, 賜平安祝福凡愛慕衪顯現的人, 哈利路亞
嫲嫲, 我地好唔捨得你, 好掛住你, 但我地知道你已經同主耶穌一齊, 沒有痛苦, 沒有眼淚, 沒有造口袋, 已經釋去世上一切勞苦, 忘記了世間一切憂愁, 我地為你感恩, 將來我地一定會再見面
小慈唔捨得嫲嫲, 最後煲俾小慈小明食既燕窩, 小慈竟然唔捨得食, 我話唔留得咁耐會壞, 個傻妹一路食一路流眼淚
小明話: 「雖然嫲嫲已經死左, 但其實佢係上左天堂同主耶穌一齊, 佢唔駛再咁辛苦, 將來我地再會見到嫲嫲既, 我會記住嫲嫲對我既好！」
硬朗爽直既秋媽, 一直係我地既好榜樣! 我要學似你一樣堅強, 將最好既都俾家人朋友, 對人特別寬待包容無私!
永遠記住快樂既時光
愛是永不止息
永遠懷念您, 天家再聚!
沒有留言:
張貼留言