維園年宵

今年係小明最後一年跟幼稚園去行維園年宵花市, 往年都會出張通告問家長參唔參加親子年宵, 但今年租旅遊車過海好貴亦唔想滾攪家長要請假, 於是由老師帶 K2 & K3 既學生出去, 小明好失望呀!  老師話每個小朋友要預備 $50 學習買野, 小明好擔心....

小明: " 冇媽媽係度, 我唔識買架!"
我: "咁你想買咩先?"
小明: "我好想買個 d 識行既汽球狗呀!"
我: "下?  個 d 氫氣球好貴架喎, 我怕你 $50 唔夠買呀!"
小明: "咁點算呀?"
我: "一係咁, 你去問下先, 你問下汽球老闆平 d 得唔得, 我得 $50 可唔可以買一個?  買唔到都唔駛失望, 媽媽應承買俾你, 我地會一家人再行年宵花市架麻, 到時再買 ok?"
小明: "咁我唔買汽球去到做咩好呀?"
我: "你可以同老師周圍行下睇下野買其他野羅, 今年馬年可以買 d 同馬有關既野, 但要買 d 冇咁易爛架喎, 唔好買屋企已經有既野就得喇!"

於是, 小明歡歡喜喜地跟老師出發, 放學返黎, 小明真係買左隻狗返屋企呀 ^^

弟弟話呢隻狗 $25 咋!  狗都有好幾款, 仲有長頸鹿, 恐龍, 企鵝, 好多同學仔都有買!  我想像到佢地回程時成車都係動物汽球就好好笑  :)

弟弟好鍾意呢隻聖伯納犬造型既狗狗, 仲幫佢改左個名叫 "咖啡"