小二家長日

升上二年級後, 小慈好開朗, 同班同學既感情好好, 成日你送零食俾我, 我畫番張咭俾你, 返黎同我講話班同學仔叫佢做 "提子" 因為提子英文 grape 同佢既英文名 Grace 好似, 所以咪叫佢提子羅.... 哈哈哈... 改得一個, 其他同學梗係不能幸免啦....韋美樺 - 雲妮拿; 楊迪恆 - 羊扒; 莫恩冕 - 棉花糖; 張君義 - 將軍澳; 傅旭謙 - 豆腐; 黃柏陶 - 蘿蔔; 吳君翹叫香蕉因為佢好瘦

又有一次返黎同我講話佢食午餐前 "領詩", 帶領全班同學仔唱謝飯歌!  吓? 咁有型?  係咪因為你係詩班呀?  小慈娓娓道來

話說有一日上中文堂, 阮 sir 見小慈郁來郁去 (小慈話佢整緊條校服裙黐住大脾好唔舒服喎), 就問韋美樺: "郭恩慈上堂郁來郁去, 唔代表佢冇優點格?  你覺得佢優點係咩?"  韋美樺答: "我覺得恩慈唱歌好好聽!"  之後, 阮 sir 一有機會就要小慈唱歌, 小慈推左好多次, 直至心血來潮走去問阮 sir: "係咪想聽我唱歌呀?"  就帶大家唱謝飯歌!  唱完阮 sir 既反應係: "又真係幾好聽喎!"  小慈開心到不得了!  我問佢係咪每日都有人領唱架?  小慈又話唔係, 佢係第一個!  吓?  咁勇?  你唔係好驚表演架咩?  小慈答: "祈禱黎架!  D 同學個個合埋眼冇人望到我架!"  真係俾佢笑死 ^^  佢話好鍾意上阮 sir 堂, 阮 sir 講野好好笑, 佢普通話唔好所以上堂會講廣東話, 好似讚人咁, 如果佢唔講廣東話冇人識聽唔知佢讚緊人, 所以一定要講廣東話 @.@

今日係家長日, 一大早就要著晒整齊校服返學校

呢個係小慈既班房

范老師非常好心機影左班照

撞到好朋友鍾欣潼!  小慈已經話唔想咁快升三年級, 因為佢唔捨得班同學, 好怕三年級要分開晒

等緊入去見老師, 似唔似大人國與小人國呀?

小慈二年級既成績一般, 不過都叫有進步至少中英數全部合格, 我幾驚佢又有科紅色呀!  中文做剩 2 頁紙我真係驚架, 合格都偷笑  >.<  全級名次 60-70 / 120, 全班名次就 10-20, 岩岩中間水平, 不過不失咁啦!  梗係可以再好 d 既, 班主任用左好長既篇幅講小慈上堂唔留心  :(  同同學關係好老師固然開心, 但佢要學識分配好時間, 玩還玩, 應該要做好晒課堂上既野例如抄好手冊先玩!  老師話佢試過有一日導修堂落堂都未抄好手冊, 就係掛住玩左先!  仲因為成日同隔離位莫恩冕傾偈而俾老師調位, 而家小慈係坐係課室正中間仲要第一個位望住老師 >.<  范老師話佢可以好專心, 不過佢專心既時間好短, 小小聲就引左佢去, 亦都唔可以俾佢對手得閒, 平面學習如中英數科, 佢好容易雲遊, 佢要有 d 野攪住, 例如分組學習佢就好醒神, 仲經常性地做一個領導者既角色, 會分配工作俾同學!  如果小慈可以改善 "唔專心" 呢個問題佢一定有進步!

唉~  老師未講其實我地已經知架喇, 有時放工返黎見佢整書籤畫生日咭俾同學都知出事, 但我又唔想打擊佢識新朋友至冇出聲, 只係提佢上課時上課, 遊戲時遊戲, 至直近來見佢寫手冊甩漏, 有一日仲俾老師大大個紅筆圈住漏寫一份功課, 再加埋親耳聽到老師用左 10 分鐘家長日時間黎話你唔專心 >.<

小慈呀, 小慈, 要改喇!!!!!  功課已經唔係叻仲要老師勞氣, 要不得!