迪士尼黑色世界

今日小明教師發展日唔駛返學, 小慈又測驗周放半日, 於是我決定入迪士尼黑色世界, 其實唔想去因為唔鍾意哈佬喂,只係貪佢開到 11:00 pm 就算放半日入去玩都夠時間, 不過兩姐弟好易受驚大聲 d 都怕, 要再三應承佢地唔入鬼屋先肯去

今日天氣好得不得了, 26 度有太陽有微風, 仲唔算多人添

好多次都冇機會入怪獸大學, 今日見條隊短短地入去參觀下

俾小慈小明個樣笑死

呢度其實好細, 絕對係一眼見晒, 不過影相出黎就好靚

佢兩個呢張扮院長, 小慈超似呀!

毛毛嚇人呀, 嘩~~~~~~~~~

 好少機會一家合照, 我地今日既 dress code 係白色, 型嗎?  :)

就腳, 我地順便去埋隔離畫大眼仔米高

唔同時段畫唔同角色, 都幾好玩

出黎岩岩好睇飛天巡遊, 食住麵咁等幾爽呀

係我衰, 教識佢地洗手唔好抹住用 d 水花彈人, 而家自食其果

小朋友既開心真係好簡單, 呢個過冷河佢地玩左好耐, 笑聲震天, 成頭濕晒

指定動作一定要睇獅子王, 小明終於明白呢隻係機械長頸鹿, 唔係真既

森林河流之旅係小明最愛

因為要玩到 11:00 pm 怕佢地捱唔住, 坐低食餐飯先

呢間河畔餐廳出奇地好食, 生日月我地張 a/p 仲有 65 折, 超抵!!

個月亮現場睇大好多架, 天氣真係好好, 好鍾意秋天 ^^

等緊睇夜光鬼魅巡遊, 你睇我地件衫幾夜光

南瓜王阿積出場弟弟向佢大叫: "我地頭先已經食左你喇, 我地飲左南瓜湯!!"

米妮教跳舞 -- 伸直拳頭, 然後前面交叉

周圍都係南瓜裝飾, 弟弟話食晒你地!

試新野, 難得見到車仔排 30 分鐘, 小慈對上一次玩都未夠 4 歲 一 d 印象都冇, 小明更加係未玩過, 完全唔知有呢樣野添  :p

勁開心!  超鍾意玩渣車, 未落車已經想玩多次

本來想玩小飛象, 點知打蛇餅越夜越多人, 爸爸話係要排隊都去玩 Woody 啦

都要排 20 分鐘, 兩姐弟越夜越精神

未試過夜晚黎呢邊 d 光好詭異

真係玩到 11:00pm 關門先走, 小明出奇地捱得, 超勁!!