士多啤梨

除夕, 代表新的一年即將來臨, 有咩攪好呢?  帶小慈小明去邊度玩好呢?  除夕倒數佢地咁細個邊度捱得住 @.@  望出窗外萬里無雲天朗氣清, 不如去   摘士多啤梨!!!!

上網搵資料, 每年 12 月至 4 月士多啤梨當造, 農場主要集中係新界區, 唔想入到粉嶺元朗咁遠, 近近地揀左 "大埔親親大自然農莊"  落車已經聞到陣陣又香又甜既士多啤梨味, 眼前盡是綠油油一片農地~  正呀!!!

免費入場, 免費泊車, 想玩幾耐都得!

好多士多啤梨!!  第一次見士多啤梨花 ^^

超大士多啤梨

又紅又甜又香

大家努力搵靚既士多啤梨!  細粒都唔緊要, 鮮紅色就一定好味

兩姐弟埋頭苦幹

小明非常鍾意把較剪摘左唔少

小慈開心到問我可唔可以聽日再黎呢度玩, 佢要做農夫伯伯呀!

小慈仲問點解我同爸爸唔係農夫伯伯?  佢好想我地係!   農夫伯伯咁易做既咩, 傻妹

剪左一個鐘, 填滿左 1.5 個大盒!  原來我地摘左 7 磅, 每磅 $40, 老闆娘收我地 $230 我覺得 ok, 有機士多啤梨黎架!  

洗完即刻食, 真係好味到你唔信!!  超市賣 $6x 既長柄士多啤梨拍馬都追唔上, 真係好好食!  食到停唔到口個隻!!  好耐都冇食過咁好味既士多啤梨  :D

士多啤梨園旁邊有個小小動物園, 可惜負責人已經走左 (可能要出去倒數)!   與小動物緣慳一面冇得餵佢地食野添

隔住鐵絲網見到小白兔一 d 都唔小, 證明好食好住

有隻山羊 BB 非常活潑, 見到人好興奮不停咩咩叫~~

冇得餵小動物, 隨遇而安係呢個殘殘舊舊既公園仔玩

都玩到唔捨得走

返到屋企小慈即刻幫手洗晒 d 士多啤梨服侍全家人食, 乖到不得了!!

之後姑媽一家上黎食飯, 估唔到昊昊會專登帶本琴書黎彈琴俾我地聽

由細玩到大, 每星期見一次面, 感情深厚

表姐小慈大昊昊半年, 好岩玩

弟弟細個未融入到, 暫時小慈昊昊做咩, 佢都唔執輸死跟!

小慈突然話要洗白白, 手上面個塊係番梘喎

弟弟又試下

今日好開心~

改名

小明係一個好為食既小朋友!!  岩岩食完飯都未吞就話要食餅食紫菜食朱古力, 但又唔見佢肥喎!? 

上次 Studio 相大家都話佢瘦晒, 可能運動量太多, 成日跑跑跳跳都好難肥 @.@  全身仲要冇忽好肉, 唔係呢度整損就係個度撞瘀, 唔到沖涼都唔知佢受左傷!!  佢忍痛能力超高, 就算 "劈拍" 一聲趴落地下都好少喊架!!

有次好好笑, 明明見到弟弟踎低想執野, BOOM 一聲就見到佢個頭撞左落地郁都唔郁!!  埋去問佢有冇事?  佢會識答我: 

"弟弟暈左!"

今晚為食又要攞餅, 要小明先學識分享, 於是弟弟非常闊佬咁派晒俾全家人, 我話仲有爸爸呢?  弟弟竟然大叫 : 

"郭恩秋~~~~~~" 

就衝左入房搵爸爸!!  真係笑瓜我呀!!  佢自己叫郭恩明, 小慈叫郭恩慈, 佢就理所當然地叫爸爸做 "郭恩秋" 名都幫爸爸改埋, 真係笑瓜我喇~~~~

唔知弟弟會幫我改咩名呢 ?  可能都係郭恩媽  XDDDDD

見佢嗌餓就攞塊 pop corn 出黎同佢地玩, 全日文, 睇晒 d 漢字大概都估到點整, 為求熱力平均我用埋隔熱墊

小明等得好心急

開始脹就撕走銀色貼紙, 聽到 d 爆谷 pop pop 聲真係唔係浪得虛名!

食得喇~~  原來 d 爆谷係咸架, 我最鍾意咸爆谷!  

極速被小慈小明掃清!!

團契聖誕派對

尋日星期六有聖誕感恩崇拜, 今日星期日依然有主日崇拜, 聖誕對基督徒黎講真係好熱鬧, 好多慶祝活動!!  完左崇拜, 提摩太團邀請我地一家參加聖誕派對, 又有得玩唔好俾佢停!!  一班小朋友係天台係咁跑~

予予大姐姐

團契暫時得佢地兩個係女孩子, 所以好岩玩!

小慈指揮中

小明都有跟住跟住

玩玩下, 雋雋眼瞓唔係好開心

一班小朋友埋去慰問佢

一齊氹番雋雋笑, 好溫馨既場面

團契開始, 要認識多新朋友!!  玩遊戲抽咭我地要講 7 件感恩既事, 已經好多年冇咁 "正式" 同身邊既人講主既恩典, 亦都好多年冇聽過秋秋講, 好感動!!  感謝神一直帶領我地一家, 我地有既所有野都係神俾既!!  能夠一家四口一齊返教會都係祝福, 真係一 d 都唔容易!  少 d 堅持都返唔到!! 

小明都好自得其樂, 頂到 3:00 pm 先扭眼瞓已經係佢既極限

今年收到好多好多聖誕禮物, 淨係 Bear Bear 熊都收到 5 隻!  加埋屋企原本有既, 真係有一座山咁高 ^^

多謝大家!  小慈小明好開心!  聖誕果然係小朋友同大人都最歡樂既日子!

聖誕感恩崇拜

收到通知 12 月 25 日 (六) 兒童詩班暫停, 仲以為教會攪笑地公眾假期休息?!!  原來只係停下午既詩班, 朝早就有聖誕感恩崇拜!  雖然尋晚平安夜玩夜左, 怪左早睡早起既我地今朝都一家四口齊齊整整返教會參加崇拜, 小朋友亦有兒童感恩崇拜, 歡迎所有 12 歲以下既小朋友參加, 小明都有份呀!  我終於可以賣甩佢~

抽獎人人有份, 小明都唔例外, 開心既弟弟將自己份禮物周圍俾人睇

個個小朋友都已經有禮物, 小慈望穿秋水等到頸都長仲未有呢....

嘩~~~~~~~  原來小慈有壓軸大獎呀!!

你睇份獎品大到小慈差 d 攞唔起

應承 Annie 今日著紅衫返黎, 梗係要影番張合照啦

今日實在太開心, 滿載而歸~

返完教會瞓醒晏覺就去買餸預備今晚既聖誕大餐!!  雖然天氣急劇轉冷仲有微雨, 小慈小明竟然要求去公園玩仲要踏單車!  好啦~~  聖誕節普天同慶, 玩啦玩啦玩啦

單車得一架就會學識輪流玩

小慈玩完就會落車推弟弟玩, 錫到燶

弟弟未識踩單車, 用腳 "推" 當係豬仔車

特備聖誕節目 -- 裝飾 Gingerbread Man

材料齊備, 只需要用牛油 + 牛奶 + 糖霜做忌廉

小慈開心到不得了, 非常認真製作

小明都有俾心機, 不過一邊放朱古力豆一邊偷食, 連薑餅人都俾佢咬左一啖!

發現左 d 忌廉好好味之後就唔肯正經裝飾, 不停撩 d 忌廉食, so ugly 呀~

唔夠快手, 忌廉遇熱開始溶, 越吱越稀唔似樣了

不過小慈小明都玩得好驚喜開心

係兩姐弟忙碌地玩緊 Gingerbread Man 之際, 我已經係廚房煮好聖誕大餐 ^^  

自從買左個 grill pan 非常好用又易用令我信心大增, 小慈小明鍾意食牛扒亦都係我既主要動力!!

Angus premium rib eye 肉質鬆軟又有肉汁, 超級好食呀!! 

夜晚安頓小慈小明覺覺豬時, 小慈同我講....

小慈: "有時夜晚弟弟會大喊因為佢發夢呀!"

我: "係呀, 佢細個未識講俾媽媽聽發生咩事所以喊喊囉!"

小慈: "我都會發夢架!  我發青蛙夢都好驚架!"

我: "如果你瞓覺好驚既時候, 爸爸媽媽唔一定係你身邊陪住你, 你可以同天父祈禱, 同主耶穌講求佢保護你, 陪住你趕走晒 d 青蛙佢!"

小慈: "........... 主耶穌岩岩出世咋喎!!!"

我.... 呆左 2 秒......  好想大笑, 不過忍住!!!!!!

我: "聖誕節係紀念耶穌出世, 係主耶穌生日, 好似小慈今年生日係 4 歲, 出年生日係 5 歲咁囉!!  今年係 2010 年, 主耶穌已經 2010 歲架喇, 佢唔係 BB 喇...."

小慈望住我, 個腦仔消化緊我講既野冇出聲, 佢真係超爆笑, 童言童語, 好可愛呀^^

聖誕係我最喜愛既節日!  主耶穌 2010 歲生日快樂!!!