弟弟 13 個月

弟弟已經 13 個月大, 可惜仲病緊 @.@  有痰啦, 有鼻水啦, 間唔中發高燒啦, 連續 3 晚唔肯飲最夜個支奶, 餓住個肚咁瞓天光..... 足足病左 1 個月有多, 究竟幾時先好番?

不過弟弟心情就幾好, 仲開始識性, 同小慈爭玩具搶輸左會好惡咁大叫, 拍枱, 仲會掉野, 一拍兩散咁款!!!  見佢咁既態度梗係鬧佢曳曳啦, 一聽到曳曳知人鬧佢, 仲識即刻喊添  \ _ /  不過我地既一貫作風係大喊冇人理既, 連弟弟都唔例外, 所以當佢大喊冇人理, 喊一陣佢就會自動收聲, 仲當冇事發生咁扮晒野爬番去我地度....

13 個月既佢仲係維持行 3 步既階段,  計過度過知你距離超過 3 步就一定會用爬, 真係精甩尾, 近來積極教佢既野已經漸見成果, 就係:  

打關斗 - 同弟弟講打關斗佢就會識雙手按地 dup 低頭預備俾我同佢打關斗

開手合手 - 同佢唱開手合手係會跟住你郁手, 仲會拍手添

騎小馬 - 上落都好穩陣, 坐左上去自動自覺會向前向後移動

開櫃門 - 經常推開電視櫃門取 VCD 開 DVD 機玩遙控, 見到飾物櫃入面既 duckie 仲已經自己識開門, 有時仲會偷入廚房拉開就手既櫃門將所有罐頭掃出黎

掉垃圾 - 見過我地掉垃圾落垃圾桶之後就將放係地下既門塞呀, 叉電器呀通通掉晒, 見到個垃圾桶含住條電線就知佢今日又學掉垃圾 @.@

熄燈 - 抱住弟弟叫佢幫手開燈熄燈係次次都禁中

Twinkle Twinkle Little Star - 聽到呢首歌就會手仔開下合下扮 twinkle

This Little Pig - 聽到呢首歌係會將隻手放去腳趾度, 因為呢首係腳趾仔歌, 基本上弟弟開始表現出佢既音樂感, 聽到我唱歌係會 fing pat, 扭手, 郁身郁勢, 笑晒咁真係好可愛, 如果我唱到口水乾停左, 弟弟會即刻用手指住我大叫一聲, 示意我繼續唱添呀~~ 笑死 ^^

用飲管 - 弟弟 6 ,7 個月時開始唔肯飲水,  我地用左好多方法氹佢, 其中包括教佢用學習杯, 話就話係 5 個月大可以開始用, 但弟弟都唔係好識, 我地照俾佢玩玩下咁用, 到左 9 個月個月大開始教佢用飲管, 第 1 次用, 失敗, 弟弟將條飲管當牙膠咁咬, 好奇怪, 小慈當年都係 8 個月開始用飲管, 我仲記得我係用飲管俾佢啜可樂, 一飲就識, 教都唔駛教, 點知弟弟唔得, 咁過幾日又試下點知一教就教左 4 個月弟弟都係未識用 @.@  

真係咩方法都試過: 

用細既紙包維他奶吱出黎俾佢引佢啜啦 / 抽起支飲管俾小小佢飲啦 / 壓實支飲管要佢自己用力啜先吸到啦 / 嘟起佢個嘴教佢吸啦 / 夾實佢既上下唇教佢合埋口吸..... 全部 fail  V__V  每次都係弟弟 lam 到少少就停左, 狂咬支飲管, 一係吱得太多俾佢唔識吞全部流番晒出黎!  唉~  我都唔識點教佢勒, 唯有等.... 終於, 今日我抱住弟弟坐大脾飲綠茶, 為食弟弟見我飲佢又想飲, 好啦, 又俾佢試下啦, 依依依~~~ 佢識嘟起個嘴咕咕咕咁吞喎!  我拉番支飲管出黎又冇流到濕晒, 真係 ok 喎!!!  即刻換番個弟弟私家飲水杯俾佢試下, 真係識呀~~~ 終於都識勒~~~ 好感動!!