"我想瞓爸爸媽媽張床啊!"
而家只要係小慈提出但唔過份既要求, 仲要講得有禮貌既話, 我地通常都應承/滿足佢 :) 小慈愛上我地張床既一個原因, 我估係因為我地換左張 Elmo 被被, 個日一攞出黎小慈已經嘩一聲話好靚, 果然就想瞓, 哈!
小慈好攪笑架, 佢會指定我同秋秋瞓邊度, 有時佢要自己瞓出面, 有時又要瞓中間, 一時又話要留番個位俾爸爸咁! 仲會同我地講:
"合埋眼睛, 唔准偷睇呀下!"
有時玩佢專登唔合埋眼望住佢, 小慈就會好激動咁再講多次, 再摸我個頭叫我乖, 真係笑死我 :DDD 有時星期六日既朝早佢瞓醒會入房搵我地, 見我地仲瞓緊佢會自己爬上床, 係我地中間再瞓過!
上星期六就係咁樣出事, 佢爬上我地張床時條片都應該好 full, 再瞓到 10:00am 就漏尿啦!! 我張床 & 被都濕晒, 即刻咩都要換晒, 之所以換左張 Elmo 被, 好在我屋企有勁多張被, 唔係就磅洗都洗唔切 @.@
今朝返學又係, 平時我會拖住佢行既, 但今日我隻手揪住好多野, 我叫小慈跟住我一齊行, 小慈望住我對手一陣, 跟住隻手仔就握住左我手腕, 同我講:
"呢度有位呀!"
嘩哈哈哈~~~~ 小慈, 你真係太可愛勒!
可愛得黎又古靈精怪既小慈, 今晚將玩具杯套係對腳黎行, 攪到自己好似 d 清朝人咁
放工我入屋就聽到小慈就話自己好乖, 食飯食得好快, 果然真係淨番少少湯, 正想獎佢之際, 小慈似有心靈感應咁話:
"食得快爸爸俾我食朱古力!" 於是大叫 "爸爸~~" 同時走入房問爸爸羅貝殼朱古力, 念念有詞話 "我要....." 隻手指仔係咁係 d 朱古力上面打圈, 左揀右揀先揀到一粒, 慎而重之咁, 未放入口已經話好味
開飯時, 小慈又話自己會安靜等爸爸媽媽食完飯, 真係喎,自己坐係凳仔玩玩具, 爸爸岩岩放低個湯碗, 小慈即刻話:
"爸爸飲完湯未呀? 食完飯勒, 係唔係呀? 小慈有安靜等爸爸! 一齊玩玩具好唔好? 唔可以一個人玩架, 知知道呀?"
真係俾佢笑死, 一輪嘴咁, 不過佢真係講得出做得到, 好乖~~
但係弟弟就曳曳啦, 食飯前大喊, 明明係眼瞓, 抱住噯佢都係喊, 嬲嬲地放佢落床仔拍佢算數, 點知越喊越大聲!! 真係唔想屋頭行屋尾咁噯佢瞓.... 工人姐姐都頂唔住弟弟大喊出黎望下, 我問佢弟弟日頭係唔係咁? 佢話弟弟會喊, 不過冇喊咁耐, 佢會俾 d 水弟弟飲咁就好快瞓著...... 係?!! 有 d 咁既事? 即刻試下俾 d 水佢飲先! 果然呀!! 一路飲水一路合埋眼, 真係瞓左 @.@
真係估佢唔到! 弟弟都會扭計, 不過通常 5 分鐘收聲, 今晚唔知發生咩事喊到咁淒涼.... 我估個衰仔係好大引食手, 近排唔俾佢食手就會喊, 又要食玩具, 紗巾都照咬@.@ 如果咩野都冇就會 dap 自己上唇 / 咬自己下唇, 口痕得好緊要, 所以一俾水佢就當奶嘴咁 "梅", 有野咬下就好安心咁瞓.....
姑娘之前都講過話男仔既吸啜需要會大過女仔, 中晒啦! 但我點都會企硬, 小慈個時我又係唔俾佢食手, 寧願半夜佢成日喊醒要抱住攞安全感我都唔俾個奶嘴佢等佢瞓番! 公平起見, 弟弟都一樣!
唔勒, 食手食奶嘴, 戒又辛苦, 牙仔又會唔靚, 我情願而家辛苦左佢!
沒有留言:
張貼留言