弟弟今日 5 個月大勒! 媽媽好開心, 因為弟弟呢個星期表現大躍進! 令媽媽最開心既就係弟弟已經連續 3 日一覺訓天光勒!! 唔知係因為開冷氣定因為個米袋, 總之呢幾日就算弟弟 8:00 pm 已經訓左都好, 佢都係最早 6:00 am 起身, yeah~~~
飲奶又叻左, 可以一條氣 10 分鐘飲晒 200ml 奶先掃風, 1 日 5 餐依足鐵罐指示! 而掃風係一坐直拍幾下背脊就 "urk~~"一大聲!! 而家餵奶係好有成功感, 弟弟又成日笑, 望住佢單下眼 / 飛吻 / 整 d 古怪聲佢就會笑得好燦爛, 好可愛架佢! 真係越黎越得意呀 ^^
最攪笑係弟弟扭肚餓大喊時, 我地一放低佢係尿片墊同佢除衫換片, 弟弟就會喊緊都即刻笑, 萬試萬靈! 可能弟弟習慣換完片就有奶飲, 條件反射對張尿片墊發生感情?! 換完片我地去完洗手返黎一定會見到佢反左身, 弟弟真係好把握機會運動運動架!
暫時令人比較苦惱既就係弟弟既口水問題, 真係濕得好緊要啊 @.@ 流口水都唔係問題, 但弟弟有時係一堆口水咁 bu 出黎呢! 抹都抹唔切! 已經戴左口水肩再落埋紗巾都可以連底衫都濕透~~
弟弟開始識玩玩具, 放玩具係佢眼前會望到實, 用玩具貼下佢隻手會張開手指爪玩具, 然後用 9 秒 9 時間放入口咬! 又鍾意食手, 有時拉佢手唔俾佢食都開始發脾氣喊喊, 不過捉住佢對手一陣佢又會冷靜番唔再食, 但要嚴密監管先得!
同弟弟出街都好有滿足感架, 係人見到佢都會撩, 又讚佢靚仔 ^^ 街坊講得最多既係話佢 "抵打!" 我估大約意思都係話佢肥, 得意, 但傳統上唔會直接讚 BB 怕佢小器, 所以講反話啦?! 媽媽我就梗係情人眼裡出西施覺得弟弟有咁可愛得咁可愛既, 爸爸就成日話弟弟似佢細個一樣咁靚仔! 小慈就似我, 成日忍唔住 non-stop 咁錫弟弟, 趁弟弟未識反抗, 錫得幾多得幾多先! 哈哈哈~~
每次叫爸爸幫手湊弟弟, 佢都必定抱弟弟入房打機, 不過弟弟會毫不客氣咁大大力拍 keyboard, 完全知道 keyboard 係用黎拍既!! 莫非咁都有遺傳?!
為免俾弟弟拍爛個 keyboard, 爸爸都係抱弟弟出廳玩 :DDD
話弟弟肥, 逼佢做 sit up
食得是福呀 ^^
幫佢換衫換片準備出街同小慈家姐上音樂班, 跟住去姑媽屋企食飯, 小慈見弟弟換完片反左身就埋去哄佢玩, 兩個頭仔互踫好 sweet
弟弟坐 car seat 好乖架, 一撩佢就笑, 好可愛~~~
勁得意仔!!!!
沒有留言:
張貼留言