弟弟第一個除夕夜

弟弟呢幾日都係 keep 住每日飲 10 餐以上, 每 2 個鐘飲 1 次奶, 又要飲又要嘔, 日日都要抹佢 d 嘔吐物, 換幾次衫, 嘔完又要食, 飲奶時間亂七八糟! 

有一餐竟然可以飲到 190ml!!!  佢真係飲到呀!  6 安幾呀大佬, 你只係 1 個 36 日大既 BB 黎架咋!!  太過份!! 

更過份既係 190ml 係 8:00 pm 飲既, 弟弟夠膽死 10:30 pm 又開始喊....

最後由秋秋頒布禁奶!!  宣佈呀仔今年冇奶飲!  一定要過左 0:00 踏入 2009 年先可以飲奶! 

一定要調節番 4 個鐘 1 餐, 於是放弟弟係大脾同佢鬥磨時間, 同佢傾計又好似識聽仲笑添!

我同秋同埋弟弟 3 個係房睇住電視倒數咁一齊迎接 2009 年~~~

真係磨到 12:15am 先餵佢, 呢餐佢係飲到 180ml 人奶既~~

好恐怖啊...... 個肚仔會唔會爆架.....

靚姨姨們探小明

呢班係我讀夜校時既朋友, 不經不覺都識左十幾年喇!  難得聚首一堂 ^^

小慈今晚有狗仔 Chocco 玩, 表現得好興奮呀!  好快已經學識左叫 Chocco sit 同埋等一陣先有野食, 玩到好 high~~

美麗姨姨就對 BB 愛不釋手仲要求餵弟弟飲奶添!  可惜弟弟都係唔生性, 又表演噴射式嘔奶, 好在冇整污漕姨姨件衫咋  @.@

肥仔是這樣練成的!

竟然飲左 14 餐

弟弟今日 33 日大, 我會用恐怖形容佢今日既表現.....

1:30am 人奶 140ml

5:10am 森永 140ml (噴射式嘔奶)

6am 森永 60ml

7am 森永 40ml (嘔)

7:45am 森永 60ml (嘔左要飲番)

11:20am 人奶 140ml

12:30pm 森永 60ml (唔肯訓要補奶)

2:45pm 森永 110ml

3:20pm 森永 50ml (唔夠皮喊)

6:20pm 人奶 140ml

8:45pm 森永 100ml

9:15pm 森永 50ml (唔俾佢飲一直喊)

10:30pm 森永 30ml

11:55pm 森永 140ml

唔當佢嘔左, 今日飲左 14 次奶, total 1260ml   @.@

每 2 個鐘就喊一次, 補極奶都喊, 俾佢飲又嘔, 嘔左又喊要飲番, 唔俾佢飲就一直喊...

好嘈呀弟弟你 !!!

爸爸餵奶

放聖誕假既好處, 就係我多左個家丁, 好駛好用毫無怨言 ^^

不過攪到弟弟咁樣

係咪玩野呀老爹?!!

Boxing Day

滿左月要做既第一件事就係幫弟弟剪指甲喇!!

終於可以拜拜佢 d 三角形指甲了, 忍左佢地好耐

滿左月, 我都開始將弟弟交俾工人照顧, 日頭由佢餵奶, 夜奶都係我負責啦, 怕姐姐唔夠精神做野, 咁樣既安排令我可以多 d 時間陪小慈玩麻!  衰妹已經開始表現出佢既 attention seeking, 成日都叫我放低 BB.... 岩既, 都係時候要放低

本來唔想出關架, 不過靚媽團去搴搴屋企開 X'mas Party, 咁近我, 小慈都需要娛樂啦, 所以一家 4 口帶埋工人姐姐去做快閃黨, 玩一陣食少少野就走, 不過小慈都好開心

普世歡騰弟弟滿月~~

2008年 12月 25日 (星期四) 20度 66% 天晴溫暖

聖誕快樂~~ 郭恩明先生滿月喇!!

呢個月好似過得好快, 但真係發生左好多事!  照顧一個初生 bb 已經唔容易, 再加多一個放聖誕假唔駛返學既小慈家姐真係去廁所都唔得閒啊~~ 

好在有秋秋同工人姐姐幫手, 3 對 2 咁都叫做應付得來, 不過真係好辛苦!  對我黎講已經少左好多時間休息同埋泵人奶, 之前弟弟訓覺我都可以跟埋一齊訓, 但有小慈係屋企佢點會想我同佢玩架啦!  雖然如此, 我都有堅持每日至少泵 3 次奶, 截至今日, 我已經泵左 90 支奶 ^^

不過弟弟呢個星期好恐怖, 好似搶奶咁飲極都唔夠皮!  個頭飲完 140ml, 半個鐘至 1 個鐘內一定喊住要補奶先肯訓覺!  最快 15 分鐘飲晒成支奶, 最慢 1 個鐘零 15 分鐘都試過,  有時掛住喊, 有時掛住訓唔肯飲, 不過唔理佢喊咁質下佢, 訓左就敲樽底都會就範既! 

好在半夜都尚算生性, 通常 11:00pm 飲完半夜 3:00-4:00am 只會醒 1 次, 日頭我地就盡量 3-4 個鐘先餵 1 次, 時間係 7/11/3/7/11, 不過中間會補奶粉, 但佢唔喊得緊要我地係唔理佢!  搶奶仲訓練到弟弟可以一口氣飲 100ml 奶唔駛掃風添!  就係怕佢一條氣飲太多會噴奶先扯支奶出黎幫佢掃風, 不過弟弟好惡架, 飲飲下你搶佢支奶佢真係同你死過, 左扭右扭郁身郁勢仲會好大力出腳撐你唔俾你掃風架 @.@ 

脾仔有肉, 眼睫毛短但有 3 眼皮 -- 呢樣最似我 ^^  鍾意谷紅塊面伸懶腰, 開始識扭抱, 同佢講野會笑, 飲奶掃風訓覺都會發出怪聲好似投訴我地招呼唔到咁!  幫佢換片會腳震震好似好怕凍, new born 片已經開始好逼仲好易漏尿!  用埋 d 貨尾就同弟弟轉細碼片了~~

今日滿月, 加埋聖誕節普天同慶, 我地幫弟弟安排左一連串精彩既節目!

首先請專人上門為弟弟做手印腳印留為紀念 ^^

一個月大整一次, 一歲大亦都會整一次, 佢地 D 手仔腳仔細細隻真係好得意!

一家人出去新城市食餐飯當擺滿月酒

去 Snoopy's World 玩不過弟弟由頭訓到尾

返屋企弟弟終於訓醒, 同小慈一齊影相

爆笑姐弟聖誕裝!

我最鍾意小朋友著夾衣

小慈好錫弟弟好多密計傾, 聽到弟弟一頭霧水

弟弟祝你健康快樂, 我地好錫你架

希望你 D 瘡瘡快 D 好番, 要搵一個乾淨既位錫你都好困難.....

點少得全家幅

我抱完弟弟一定要抱番小慈架, 一定要公平公正

Happy 1st month, Young Man!!!

弟弟第一個冬至 + 全家幅

今日係冬至, 不過弟弟好唔生性呀!!  飲奶餵幾次嘔幾次, 嘔左覺得唔飽就喊食, 補奶都補左 4 次, 今日 total 飲左 11 餐呀!!!  唔計嘔左個 d, 佢已經飲左 1170ml 落肚, 咁食法真係怕撐瓜佢 @.@

星期日冬至出街食飯, 我地影左人生入面既第 1 張一家四口相 ^^

唔少得既就係郭氏家族全家幅 :)

冬至快樂!  一家人齊齊整整, 健健康康 ^^

出浴照

免得同小慈爭廁所加上中午通常較為溫暖, 呢段時間就係弟弟既 bath time 喇!  今日弟弟沖涼終於都冇喊喇, 於是就同佢影下出浴照先 ^^

弟弟已經出左雙眼皮, 頭髮都係啡色!  兩姐弟髮色都似我呢

咩事咁無辜?  沖涼唔夠皮嗎?

放聖誕假既小慈最鍾意入房攪弟弟

偷襲成功

呢個表情簡直笑死我!!!   似唔似就黎窒息?

而家弟弟掃風同臨訓前都好多聲氣, 放佢係大脾同佢傾計仲會笑添!  好可愛~

Day 24 弟弟完全康復~~

今日下晝又要返健康院 check up, 弟弟又有重左呀! 

Day 24 既佢重 3.975kg, 又重左 0.3 磅呢! 

我仲同姑娘講弟弟而家簡直係強而有力, 識得雙腳縮埋再大力撐直咁伸我一腳, 可以扭到掃唔到風架!!  每次重量都有增長, 情況 very good 啦! 

見埋醫生 check 黃有 17, 18 度, 醫生都好滿意, 仲已經好肯定係飲人奶導致黃疸, 眼白既黃都有稍退既跡象!  醫生終於都放我地一馬, 以後再唔需要因為黃疸而返黎覆診喇~~~

脫苦海~~ 逃出生天~~ 正式宣佈弟弟康復喇~~ ^^

弟弟都開心到夢中偷笑

多謝天父一直看顧!!

超快既健康院檢查

上星期五出院, 今日星期二又要返健康院檢查, 監測下弟弟既進度, 黃疸有冇惡化咁, 今日秋秋抽到時間就車我去健康院, 出門前我想泵埋奶先去, 佢又好幫手咁餵弟弟飲奶, 呢個咁經典既時刻梗係要影低佢啦! 

秋秋都算係咁, 我半夜餵奶佢都冇覺好訓, 有時弟弟嘔奶我又要佢起身幫手抹, 日頭又要返工, 爸爸辛苦你喇  ^8^

今次返健康院係最快完成既一次, 前後都只係用左半個鐘頭!  一去到姑娘已經對弟弟既重量表現得好滿意 -- Day 17 重 3.44kg, Day 21 已經重 3.84kg -- 4 日已經重左 0.8 磅, 相等於體重既 10%  非常理想!! 

梗係啦, 弟弟飲奶既狂熱程度簡直嚇親我地!  而家每日都要飲 7 餐, 每次都要 130ml 有時仲嫌唔夠喉隔個零鐘就要我地再俾!  未夠 4 個鐘又餓, 餵到亂晒真係好得人驚  @.@   姑娘都係話要控制住, 至少隔 3 個鐘先餵一餐, 扭得厲害時試下用其他方法氹佢, 唔好咁快俾奶云云...... 我盡量啦.... 弟弟喊肚餓起上黎唔係人咁品..... 

見醫生 check 黃都有 18, 19, 眼白都仲係黃色!  雖則未到警界線要入院, 但指數都唔低星期五再返黎覆診, 就係咁樣 check 左 2 下我就走得, 但感覺好似仲未脫離危險期一樣, 要再努力!

弟弟呢兩日變左暗瘡男, 成面粒粒面油又多, 好恐怖啊~~

呢張相係小慈影既, 我平時就係咁樣餵弟弟飲奶掃風架勒

一有機會小慈就會要求抱弟弟, 好錫佢架!  不過小慈都會呷醋, 會叫我放低 BB or 叫爸爸抱住 BB, 要我陪佢玩!  弟弟又衰既, 成日喊要飲奶, 攪到我好似無時無刻都抱住弟弟咁, 唔呷醋就奇啦....

森永細仔

健康院姑娘講過 BB 轉奶粉一日一餐 or 一日兩餐慢慢轉係 ok 既, BB 適應力其實幾好唔駛太緊張咁話

之前弟弟入醫院話餵奶粉, 醫院 d 姑娘一日內已經餵弟弟 6 餐 S26 都冇俾機會弟弟慢慢適應啦, 都唔見弟弟有事, 便便都冇話屙石仔, 不過因為一直訂開日本森永大仔俾小慈飲, 而小慈細個又係飲森永細仔既, 所以都冇諗過轉其他牌子就買左 1 罐森永細仔係屋企看門口, 又俾弟弟試下先!  森永好貴呀, 散買 1 罐要 $204, 1 箱 8 罐就平 d, 平均 $188, 都好重皮 

今年生 BB 同我當年生小慈待遇方面唔同左, 唔知係因為第 2 胎定係奶粉廠縮左水?  當年我生小慈係好多奶粉 sample 幾罐幾罐咁送去屋企架, 仲要咩牌子都有喎!  唔知點解到弟弟時一罐都冇既呢?!? 

尋日同弟弟出街, 冇可能帶住支人奶周圍搵地方助熱, 亦唔方便搵地方埋身餵弟弟, 於是就開左弟弟人生第一罐奶粉勒!  好在弟弟又乖又唔揀食, 俾咩佢都飲!  咁就好喇 ^^

而家半夜決定唔再徙時間等半個鐘助熱支人奶喇, 直接開奶粉俾弟弟飲, 快~~ 靚~~ 正~~ 仲要靜!  唔會俾機會佢喊到有奶飲為止, yeah! 

黎緊都要俾弟弟飲多 d 奶粉, 因為有經驗既媽媽朋友教我人奶退黃退得慢, 試下俾多 d 奶粉弟弟等佢盡快退左 d 黃先, 之後先轉番全人奶!  所以弟弟係會兩溝 -- 3 餐人奶, 3 餐奶粉

弟弟今日飲左 6 餐人奶 + 1 餐奶粉共 880ml~~  平均一餐飲 125ml, 呢個玻璃奶樽既容量開始唔夠佢飲喇~~











呢 d 就係我努力泵人奶既成果 ^^

圓圈內既數字係代表我泵既第幾次, 勁呢?! 

我都好欣賞我自己係一個奶媽 :DDDDD

Day 18 弟弟第 1 次去街~~

3:08am 弟弟喊, 又開始捱夜餵夜奶既生活, 弟弟習慣飲完奶就會有便便, 但飲完奶要換片, 一抬高佢對腳就會嘔奶!?!  要勞師動眾叫醒熟睡中既秋秋幫手, 佢抱住弟弟, 我低角度係下面幫弟弟抹 pat pat 怕提高佢會再嘔.... 冇第 3 隻手咋, 有手用相機影低呢 d 咁經典既場面將來俾番弟弟自己睇!

12月13日, 今日原先係弟弟既預產期, 原來亦都係嫲嫲既農曆正日生日, 真係有咁岩得咁岩!  忙碌既 1 日開始~~

10:00am 要去小慈學校參加親子聖誕活動日, 我想同秋一齊出席因為小慈最鍾意我地同佢一齊返學架, 仲要去玩喎, 梗係雙倍開心啦!  於是我歷史性地將弟弟交俾工人姐姐照顧, 吩咐佢 10:30am 開始助番熱支 140ml 既人奶, 11:00am 就餵弟弟, 點知我地 12:30pm 玩到興高采烈咁返屋企時, 工人姐姐仲餵緊奶?!??!  11:00am 餵到 12:30pm??!!  工人姐姐話弟弟訓住飲, 咁點解你唔掃風掃醒佢係咁攬住佢訓呢?  真係暈~~~  唉~~ 原諒佢生手 @.@

2:45pm 小慈要去 Mega Box 上 Tom Lee 既 Music Toddlers, 因為之後要出街食飯慶祝嫲嫲生日, 於是全家總動員咁去 Mega Box 先!  我當我自己坐完月出關咁陪小慈上堂, 秋同工人姐姐仲有弟弟閒逛 45 分鐘落堂再匯合我地, 玩一陣再出車去荷里活廣場同嫲嫲食飯

弟弟第 1 次出街 wet 呀~~

嫲嫲好驚喜我地全家出晒黎!  佢仲以為我坐月唔出街添 (我乘機姐)  佢好錫弟弟呀!  仲係錫到燶個隻, 成晚單手抱住弟弟食飯!!  好在弟弟都好乖由頭訓到尾, 開奶粉俾佢出街飲又好肯飲, 仲 15 分鐘飲晒 120ml, 勁乖~~

嫲嫲祝你生日快樂!  身體健康!!

親子聖誕活動日

小慈學校舉行親子聖誕活動日歡迎家長帶埋小朋友返去一齊玩, 雖然我仲坐緊月理應留係屋企唔好出街吹風, 但我知道同小慈一齊返學校佢一定好開心, 仲係返去玩喎!  於是, 我斗膽將只得 18 日大既小明交俾工人姐姐照顧, 我就偷走出關喇  :p

一如所料, 小慈開心得好緊要呀

你睇佢 fing 絲帶都笑成咁!  爸爸的攝影技術 -- 媽媽被去頭  >.<

每個班房都有親子遊戲玩, 你睇小慈同爸爸幾專心

嘩~~~ 中獎呀!!!

獎品係紫菜同棉花糖小慈都好開心

一齊做手工

整雪人同禮物吊飾

個半鐘頭既慶祝會好快過, 臨走仲有禮物派

小慈好鍾意呢個膠箱

爸爸媽媽陪玩最開心~~

Day 17 出院喇

今朝去醫院探弟弟, 姑娘已經同我講晏 d 可以出院喇!  咁快?!  太好喇~~~  媽媽好掛住你呀 ^8^

一場黎到就餵下弟弟飲奶奶, 又叻左呀!  飲得好快!  唔係次次有得餵架, 有時黎到醫院姑娘已經餵飽左佢, 我只可以望住佢訓, 拖住佢隻手仔咁架咋~

因為我 3pm 約左余啟文做產後檢查, 我要出去睇完醫生先可以返黎接弟弟出院!  好在兒童病房既姑娘好理解, 叫我唔駛急, 佢地會一直照顧住弟弟等我黎既! 

其實佢地係好好架, 抽血組既人只係黎抽血, 佢地冇份湊 BB 架, 所以我鬧係應該鬧抽血組既人, 好在我上次都冇亂發脾氣 @.@

弟弟第 3 晚係醫院既飲奶時間表:

11/12/08  重 3.44kg   GS26 -- 115ml x 4hr x 6次  黃指數 178 熄燈 

(1) 11am 115ml / (2) 3pm 120ml / (3) 7pm 120ml / (4) 11pm 120ml /
(5) 3am 120ml / (6) 8am 120ml

Total 715ml Urine x 7    Faeces x 4

5:30pm 弟弟住左 4 日 3 夜醫院, 我地返屋企喇~~

雖然 7B 照顧得你好好, 但我真係唔想再返黎呢度!

Day 16 終於有報告

今日終於有報告喇~~~  醫生話冇事呀!!!  感謝天父~~ 感謝天父~~~

醫生話 BB 係靠屎尿排黃, 即可理解為血入面既血紅素排黃, 黃疸排唔晒會留係血裡面, 所以要抽血驗, 而家報告出左, 內臟功能正常, 只係 BB 排解功能慢, 紅血球分解唔切所以黃, 唔關器官事!  亦都理解為因為飲人奶先咁黃! 

嚇死媽媽喇!!!!  終於證實弟弟係一個健康既 BB, 而家係膚色黃 d 姐, 冇相干, 冇相干

弟弟第 2 晚係醫院既飲奶時間表:

10/12/08  重 3.4kg   GS26 -- 115ml x 4hr x 6次  黃指數 241 

(1) 11am 115ml / (2) 3pm 125ml / (3) 7pm 115ml / (4) 11pm 120ml /
(5) 3am 120ml / (6) 7am 120ml

Total 715ml Urine x 7    Faeces x 2

Day 15 驗血報告花左??!!!

雖然擔心, 但弟弟入院既唯一好處就係我可以訓係床度休息, 可惜我成晚輾轉反側訓得好差非常擔心份驗血報告有咩事, 不過都叫做有眠一眠

訓醒泵奶竟然泵到有 240ml 呀, 泵 1 次夠弟弟飲 2 餐, 又破紀錄呀~~  不過同一時間亦都發現自己生唇瘡!!  好多年冇生過喇, 壓力太大所以復發啦.....

尋日姑娘話今日下晝有驗血報告, 又問左醫生幾點巡房就較岩時間去醫院探弟弟, 想親耳聽醫生解釋下份報告......  點知.....  姑娘竟然同我講話冇報告!!  因為 Grossly Hemolysed unsuitable for test!  抽血抽得唔好, 樣本花左驗唔到, 今日先再抽血驗過, 要聽日先有報告!! 

我嬲到直情唔識反應 @.@  抽血都抽唔好?  一日抽幾百次血你同我講抽唔好?  初生 BB 既血好難抽架你點解唔小心處理, 咁樣浪費左佢??  又要我等多一日?!!  你知唔知咩叫熱鍋上既螞蟻呀?  如果弟弟有 d 咩事, 因為你地既失誤延遲左弟弟既治療, 後果可以好嚴重架!  攪錯呀你地!!....

我真係好想呢 d 說話我真係講左出口架, 可惜我只係盡力碌大左我對眼瞪住我眼前呢個姑娘.....

唔想等都要等, 鬧佢又有咩用呢, 我都仲要靠佢地湊我個仔, 一陣鬧完佢, 弟弟之後喊到拆天佢地報仇唔餵佢咁點算?!  唉......  無奈.... 又要驚多晚....

弟弟尋晚係醫院既飲奶時間表:

9/12/08  重 3.39kg   GS26 -- 115ml x 4hr x 6次  黃指數 278   

(1) 11:30am 100ml by me / (2) 3pm 115ml / (3) 7pm 150ml / (4) 11pm 120ml /
(5) 3am 120ml / (6) 7am 120ml

Total 725ml Urine x 5    Faeces x 5

天父求你保守看顧!

Day 14 弟弟又黃疸要入院

話咁快又到左星期二要返健康院覆診! 

弟弟重左, 上次 Day 9 重 3.07kg, 今日有 3.345kg = 7.36 磅, 重左 0.6 磅咁多, 已經追番出世時既重量, 叻仔呀! 

不過黃指數仲係好高, 健康院 check 有 20, 21, 醫生仲話儀器唔夠準確要入醫院 check 清楚, d 黃唔退怕係內臟 eg 膽管有問題!!

唉~~  我好唔開心, 好唔開心....  點解又要入院?!  已經泵出黎餵佢, 又餐餐 120ml 飲到足晒唔岩咩?  有重到有屎屙點解 d 黃都係唔退?  好費解呀!!!!! 
 
見完醫生見姑娘, 姑娘又開解我, 話 9 成都係飲人奶 d 黃先退得慢, 入院 check 都係穩陣起見姐, 唔好咁快諗到咁差云云....

10:30am 又搭車去威爾斯兒童病房, 又係要入去 7B!!  弟弟喊肚餓, 我又咩都冇準備 (根本冇諗過會入院)  唯有入房餵奶.....  好耐冇入過呢間人奶房喇, 不過弟弟飲得太慢, 醫院姑娘又想快 d 同弟弟攪入院手續於是叫我餵奶粉!  弟弟肯飲, 只係飲得太快岩岩飲晒 100ml 又嘔晒, 唉.....

又要抽血, 隔住塊玻璃睇姑娘吉弟弟腳板底簡直心如刀割, 殺左我罷啦!!!  嗚嗚~~~  而家仲話怕內臟有事要做詳細檢查... 天父呀!!!  求你幫助!!  我唔信弟弟有問題架, 佢一定係一個健康既 BB 黎架, 雖然比預產期早左 3 個星期出世, 但都夠 37 周足月架!!!

快速驗血測試顯示弟弟既黃有 278 !  好高呀佢, 摸摸下仲發現弟弟右耳仔後面有粒瘤仔添?!!  咩黎架?!!

咩心機都冇晒......

靚媽團探弟弟

天氣凍真係唔願同弟弟沖涼怕我手腳慢凍親佢, 不過唔沖又唔得, 因為弟弟個頭好易油仲有頭油味, 好難頂啊 @.@  BB 唔係應該香噴噴有 BB 味既咩?  咩解究弟弟成個佬咁先得架?! 

13 日大啦, 仲係一路沖涼一路喊, 好淒涼咁, 我又衰既, 唔應該係佢肚餓個時先同佢沖涼, 但佢唔肚餓又唔會醒, 佢訓左我又唔想整醒佢沖涼... 真係好矛盾啊~~ 

而家每日最開心就係小慈放學返屋企, 第 1 件事就係衝入房望下弟弟, 同佢講:

"弟弟, 你好呀~~~"  聽到我心都甜晒 ^^

熱情的小慈家姐

今晚好熱鬧呀, 靚媽們上黎探恩明, 送禮物俾弟弟既同時都有送俾小慈等佢冇得呷醋!  不過暫時小慈都表現得好好, 好錫弟弟. 仲有大方咁分享自己 d 玩具俾熙熙同搴搴玩, 熙熙好錫小明, 偷偷地啜左佢一啖添

大合照

弟弟今晚又叻仔, 醒目又乖巧, 腳撐撐手 fing fing 全晚都冇喊冇失禮街坊, 個個讚佢乖啦~~

12 朝喇~~

今日星期日, 嫲嫲知道工人姐姐放假就山長水遠黎我地屋企幫我坐月, 整野俾秋秋同小慈食, 又帶小慈去公園玩等我同秋休息下, 非常唔話得呀嫲嫲 ^8^

小慈今日都好開心, 出奇地跟嫲嫲, 拉住嫲嫲玩呢樣, 玩個樣, 嫲嫲落街買少少野又要跟埋去, 同佢去埋公園玩仲要嫲嫲買雪糕添!  真係一個機會主義者呀, 小慈!

2:15pm 個餐奶, 嫲嫲突然想幫手餵, 本來冇咩野, 弟弟都飲得好快, 不過嫲嫲見弟弟係咁啜唔停就冇 stop 佢掃風, 我岩岩想提佢弟弟唔質得架... 話口未完弟弟就已經噴奶了.... OH NO~~~  一條柱咁噴 d 奶出黎真係 BB 先做到架咋....

4 個鐘後再餵, 飲左 100ml 既弟弟唔滿足係咁喊 8:30pm 再補多 60ml 俾佢, 跟住就犀利喇, 弟弟飲完呢支奶好似昏迷左咁一直唔醒!!  秋話由得佢喎~~

果然呢一覺係訓左 5 個鐘, 真係 1:30am 先再喊肚餓 !?! 

不過弟弟夜晚都係訓住咁飲奶, 餵成個鐘呀!  而家用 chu chu 黃色奶嘴防漏氣既設計係唔會好似 Avent 咁倒轉會滴出黎, 唔啜係唔會出奶所以少風, 但係, 我就質唔到弟弟飲奶羅, 佢唔啜 d 奶就唔出, 咁佢又會含住個奶嘴訓左, 飲得超慢啊~~~

日頭就冇咩野, 夜晚咁樣就攰死阿媽我啦!!  迫我彈佢腳板底整醒佢, 衰仔 >.<

弟弟 Day 11 破 2 項紀錄

尋晚突然心血來潮想半夜起身泵奶, 醒起之前姑娘話最好 keep 住 4 個鐘泵 1 次, 半夜起到身就最好因為份量係可能會 double 既!  於是今日唔係好攰就試下... 嘩~~ 珍珠都冇咁真喎, 我第 1 次泵到 180ml 呀!  A new record~~

不過唔知係唔係泵奶機嘈醒弟弟定係咁岩, 我岩岩泵完奶弟弟就喊肚餓喇!  見你咁有食神就俾你飲鮮榨奶奶啦, 唔駛等助熱 :DDDD 

5:00am 餵佢飲左 100ml, 放床仔都冇一個鐘又喊, 唔知喊咩又試下俾支奶佢, 補 60ml 又飲晒喎~~ 夾埋飲左 160ml 又破紀錄呀! 

人仔細細飲咁多飲到肚仔漲晒!  暫時都係 keep 住 4 小時餵佢 1 次, 而我就每日泵 4 次奶 (4個鐘泵 1 次對於屋企仲有個大 B 要照顧既我, 暫時係 mission impossible)

今日爺爺嫲嫲姑媽姑丈昊昊有上黎探恩明呀!  佢地話係醫院見過 1 眼之後都冇機會抱, 於是大家今日就抱番夠本, 嫲嫲話弟弟個樣真係好似秋秋細個

爺爺抱慣昊昊, 而家抱住恩明覺得佢好輕

昊昊知道自己做哥哥就笑得好甜

錫晒你 ^8^