遠近慈明

2013年10月26日星期六

中國舞三級試

對上一次考中國舞一級試已經係 K3 既事, 事隔兩年, 小慈今日考三級喇 ^^

北京舞蹈學院中國舞三級試指定服裝, 我是 5 號郭恩慈

呢位係小慈既拍檔黎寶淇 Kobe, 兩個身型高度差不多, 成對 twins 咁呀 ^^

呢 6 位小朋友同一組一齊考試

多謝周小玲老師既教導, 小慈好鍾意你架 :)

排排坐準備入試場了

考試順利完成, 要一個月後先知道結果

2013年10月23日星期三

第一隻大閘蟹

未係時候呀!

本年度第一隻大閘蟹未有漿住既感覺, 即是俾多次機會我再食過 YEAH ^^

不過呢餐既其他小菜好好味

2013年10月22日星期二

秋秋生日快樂

22 號, 爸爸生日 ^^

我地全家都係 2 字頭, 7 歲半既小慈終於記得晒我地屋企既特別日子

3月22日媽媽生日
4月20日小慈生日
6月22日爸媽結婚紀念
10月22日爸爸生日
11月25日弟弟生日

買個秋秋至鍾意既 mini mango cake 返去切下, 祝秋秋生日快樂, 主恩滿滿!

無價之寶梗係對仔女獻吻啦, 你睇秋秋個樣霖到 ^8^

蒙褔的一家, 多謝主 ^^

切完個蛋糕, 秋秋好想去二人世界食餐好既, 點知小慈知道我地唔係屋企食飯竟然眼圈紅仲喊咁既聲, 俾我即刻拉佢埋一邊唔准佢掃爸爸慶! 咩叫掃慶? 爸爸明明好高興俾你掃掃掃掃走晒呀! 衰妹即刻笑 >.< 後尾都識做地走入房同爸爸講:

"爸爸, 生日快樂! 祝你有個愉快既晚上, 食得開心 d !"..... 算你啦, 咁先乖女麻! 小慈仲要問喎: "如果聽日唔駛返學你地係咪會帶埋我同弟弟去食 buffet 架?" 如果可以都會係, 小朋友要早訓覺先聰明架~ 弟弟就只係成隻樹熊咁攬下就放生我地, 仔都係爽快 d ^^ 我地去左君綽海逸食自助餐

與其話食自助餐, 不如話係食長腳蟹生蠔餐, 我地全晚主力食呢兩樣野 >v<

芝士都好正, 酒店仲送每人半隻芝士焗龍蝦, 全晚仲有 live band 唱歌, 今日好日子有好多人生日, 我地聽左好多次 Birthday song, 連情人 Happy Birthday 都聽埋, 好正!

多謝咁多位對秋秋既祝福, 收到晒 ^8^

2013年10月21日星期一

葉老師

今日畫畫既主題係畫一個人, 小明一聽到就畫 "葉老師"

畫得好唔錯喎 ^^

我問小明: "點解會畫葉老師既?"

小明: "佢係我老師丫麻!"

我: "咁你畫葉老師, 不如就將幅畫送俾佢啦!"

小明: "好呀!"

放學返黎

我: "點呀? 葉老師收到幅畫開唔開心呀?"

小明: "好開心呀! 佢話好耐都冇人畫過佢個樣喇! 葉老師話羅幅畫返屋企"

執小明書包時, 發現葉老師原來俾左張紙仔我

葉老師有一次教小明做功課時摸到小明手仔, 講左一句

葉老師: "恩明, 好滑喎你!"

小明: "係咩?"

葉老師: "點解你會咁滑既?"

小明: "我都唔知呀?"

葉老師: "不如你返去問下媽媽點解你會咁滑?"

當晚晚飯時, 弟弟真係問我

小明: " 媽媽, 葉老師話我好滑呀!"

我: "係? 點解佢會咁講既?"

小明: "唔知呀? 點解我會咁滑既?"

當時仲有小慈在場, 小慈都滑, 但弟弟個隻係化骨綿掌咁真係又軟又滑仲要白過小慈好多, 我有 d 避忌唔想佢兩個比較, 一陣小慈問我點解生到弟弟咁白雪雪又咁滑我咪死火?! 於是我輕輕帶過.....

我: "你去完沙灘丫麻, 曬黑左跟住甩皮, d 皮膚再出世就會好滑架喇!"

因為我唔知道係葉老師叫佢返屋企問我, 所以我都係諗到就答, 點知第二日返學, 弟弟講番俾葉老師聽

小明: "葉老師, 我返去問過架喇, 媽媽話我咁滑係因為去左沙灘曬太陽甩左皮呀!"

葉老師當堂爆笑!!! 佢估唔到我會咁答, 通常都係話小朋友皮膚嬌嫩 d 所以滑過大人之類, 所以聽到小明咁答真係笑死佢!

葉老師: "啊~ 原來係咁既原因! 葉老師都好想好似你咁滑但我又好怕曬黑喎, 點算呀?"

小明: "搽太陽油咪得羅!"

呢 d 都係事後我有機會返學見到葉老師, 同佢講開 K3 之後, 我發覺小明好上心學校既野, 每日放學返黎都分享學校好多野, 上年都仲係一放學就咩都唔記得晒, 但近來見佢返學好開心, 好積極又好記得老師每一句吩咐咁講開之麻, 葉老師就講返俾我聽呢件 "滑" 事件, 真係勁好笑呀, 弟弟 ^^

做老師勞心勞力好辛苦, 但當愛心有回報, 當中既滿足感難以言喻 :)

我地都多謝你愛錫照顧小明呀, 葉老師 ^8^