遠近慈明

2008年5月8日星期四

小明醞釀中

秋秋一直都話一係唔要 BB, 一要就要 2 個, 因為兄弟姊妹一起成長係一件美好既事! 呢樣我都知, 但湊住情緒化又黐身既小慈其實已經身心俱疲, 真係冇咩勇氣再要多一個 BB, 所有野都要由頭再黎過!

直至舊年突然醒覺 2008 年係鼠年, 如果生隻老鼠仔又係 10 月出世咪同秋秋一模一樣羅 ^^ 而家人人都話小慈似我, 如果生個仔似秋秋都好丫, 咁聰明, 有爸爸一半都已經好好, 於是..... action!!

點都估唔到由 2007 年 9 月開始努力, 一直都冇聲冇氣?! 生小慈實在太容易喇, 真係想要下個月就即刻有左個隻! 冇諗過生完小慈之後自己經期紊亂而影響到我想要多一個 BB 既計劃.... 我本來想要第 2 個 B 同小慈一樣都係做大 B, 6 月出世坐月最理想麻, 天氣溫暖 BB 易湊 d, 點知等下又一個月, 等下又一個月, 秋秋都變人乾..... 非常灰心, 半放棄狀態....

一直都相信小明係我既生日禮物~~ 有數得計架麻, 3 月8 日 last period, 我生日係 3 月 22 日只係 action 過呢一日 (面紅).... 之後一直到 4 月 20 日小慈 2 歲生日會過晒, 大姨媽都未黎我就估到係, 買支棒棒黎驗, 真係呀~~~ @.@ 望住支驗孕棒我第一個反應係 "玩大左!!!" 等左咁多個月, 就係我想放棄唔要時先俾我, 又真係俾我啊~~ 真係有左就唔識反應.... 俾支棒棒秋秋睇, 隻衰佬又係個句 "恭喜晒~~~" ^0^

果然係情緒緊張難以懷孕!! 要無壓力仲要好 happy 先陀到! 一連串既檢查 / booking 要動手了, 好多都唔記得晒!! 岩岩有左又唔可以話俾人聽亦唔可以問人, 怕 BB 小器陀唔穩, 講左俾人聽就會空歡喜一場, 所以一般都係陀夠 3 個月 BB 穩定先公佈消息! 好在現今互聯網非常方便, 資料上網都搵到好多唔駛問人^^ 第一件事就係打電話 book 我上次個私家婦科醫生余啟文, 佢好溫柔細心架, 仲要準過生神仙喎, 當年小慈大約幾時出世, 出世幾重, 我痛幾耐... 佢完全岩晒呀! 不過唔係淨係我覺得佢好, 大家都 mark 佢所以預約要等 3 個星期咁耐呢! 不過我第 2 胎其實有晒經驗唔係太擔心~~

今日就係我第 1 次見余醫生既日子, 計番我已經有左 8 weeks 4 days, 胎 size 1.8cm, 比預產期遲左 2 日, 但余醫生話分別太少唔緊要, 所以維持預產期係 2008 年 12 月 13 日, 照超聲波已經見到弟弟有頭, 有手, 有腳, 睇到弟弟個心仔噗噗噗咁跳先有踏實既感覺, 發展正常, 醫生話我陀得好好呀~~

開心^^

2008年4月21日星期一

小慈 @ Baby Dreamland

小慈其實都影過好幾次 studio 相, 今次去 Baby Dreamland 純粹係因為佢呀媽我係義氣仔女, 當年 0604 BB會夾埋 10 個媽咪就有影相優惠, 於是我都叻架喇, 人地本來係俾 0604 BB 1 歲大時影輯靚相我就拖到 2 歲先影! 咁小慈 1 歲個時係 Baby Face 影左麻, 梗係大 d 個樣多 d 變化先再影啦! 今日攪攪新意思, 約埋爺爺嫲嫲一齊影全家幅 ^^

小慈公主 2 歲生日呀!! 靚靚水手裝

Happy Birthday to me~~~~~~~

小慈今日心情唔錯

表情多多

呢條晚裝裙係我買俾小慈扮公主, 係唔係好靚女呢?

全家幅加埋嫲嫲爺爺感覺好特別

我自己就好鍾意冇背景, 純粹影人最好!

My lovely girl!

Kiss 爸爸, sweet 爆~~~~~~~~~~

一家三口親子裝同款唔同色

小慈最鍾意既 Elmo 呀~~~~~

好得意

我好鍾意呢幾張相

古靈精怪

Package 60 張相 + 相簿 33 張有 design + 相架 = $3380

改左 3 次嘔心瀝血, 呢個就係相簿既 layout~~

留為紀念 :)

2 歲的小慈

2 歲既小慈真係開始醒, 日日都有驚喜俾我地~

認知語言方面 --

識數中英文 1-24, 認到大部份既形狀同顏色, 半圓形 and brown 都識. 識叫自己 "郭恩慈" 仲舉埋手叫 "到", 識晒眼耳口鼻手踭腳跟等身體部位名稱, 識叫晒全家族既稱謂, 唯獨姑媽唔知點解叫 "之媽", 但基本上, 小慈既發音係準既, 講野清楚外人都聽得明白唔駛翻譯! 最醒係唱歌! 音準, 歌詞準, 首本名曲係 ABC song, Hello Hello How are you, Bye Bye Baby, London bridge is falling down. 之前鍾意聽電腦既 flash songs, 近期鍾意睇自己既 video 會話 "睇小慈", 做咩都會加自己個名係前面 -- 小慈擦牙, 小慈坐, 小慈梳頭, 小慈吉 (用叉吉野食).... 有自己主見, 有要求, 例如想我唱歌俾佢聽就會講 "1, 2, 3" or "again" 示意要 encore

自理能力方面 --

未夠 2 歲開始已經咩都要自己黎! 自己擦牙, 梳頭, 著衫, 除鞋除襪, 渣奶樽, 用叉匙, 近來仲已經唔駛我抱到手軟咁噯佢訓覺, 只需要我係床邊陪佢睇一陣圖書佢就會自己訓!! 呢樣最乖令我最感動! 手腳靈活, 識爬上爬落大床, 雙腳離地 jump, 單腳 hop, 鍾意跳梳化, 搬 cusion 玩障礙賽, 企高睇風景等. 所有 2 歲既玩具都識玩, 字咭都識不過答英文多, eg telephone, aeroplane. 對比詞識熱 / 凍, fast / slow, big / small, 開心 / 喊喊, 乖 / 曳, 但次次都唔識分 lion and tiger !?!

禮貌方面 --

係我嚴格監管之下都算乖, 出街識叫人打招呼, 係屋企又有手尾, 所有野都知道放邊度, 玩完會收拾, 手仔污漕又會要求抹抹抹 or 洗手. 知道有咩唔做得, 唔掂得 (eg 開櫃門) 會自己 NO 自己! 幫佢做左 d 野 or 俾野佢問佢點講呀? 小慈會識答: "謝謝媽媽, thank you very much, 唔該" 咩都出齊 ^^ 我又教佢有同理心, 跌左公仔佢會代佢喊, 叫痛痛, 又會錫番公仔, 好乖~~ 有時自己仲會傻笑話 "小慈開心呀!" 聽歌又會話 "好好聽呀~~" 食野又會話 "好味!"

1 歲 8 個月開始為食, 近來由 2 餐奶 3 餐粥改為 2 餐奶 2 餐粥之後, 為食情況嚴重左! 我地食咩小慈都一定要分甘同味, 最鍾意黐我地食飯, 一陣要茶茶, 一陣要飲湯湯, 一陣又話要自己 '不'! 如果佢一時要餅餅, 一時要羊奶片, 山渣餅等即係代表佢肚餓! 終於都識叫肚餓真係令我地好感動! 曾經一度我地以為小慈有厭食症架, 食好少野又從來唔為食唔叫餓我地幾擔心呀! 而家就會食餅餅食唔停! 因為佢為食左, 帶佢出街食飯俾碟青豆花生炸米粉俾佢就會成餐飯坐定定唔會扭抱, 超級乖~~

同昊昊去科大玩

去海洋公園, 搭纜車完全唔驚

上雜誌封面 :DDDD

小慈吉祥物 ^^

真係越來越叻, 越來越生性, 每天都有進步, 好可愛!

爸媽錫晒你呀, 寶貝女 ^8^

2008年4月20日星期日

小慈 2 歲生日超級大 Party

今日係好忙碌既一日, 因為我地既小慈公主 2 歲喇~~~~ 適逢今日係星期日, 我地為小慈預備左一連串精彩既節目 ^^

天陰陰又涼涼地, 小慈今朝訓到 8:45am 先起身, 醒左好安靜咁坐左係床仔, 我同爸爸唱住生日歌入房吻賀壽星女! 我地既小公主 2 歲喇, 媽媽爸爸希望你健康快樂咁成長, 無論何時何地, 爸爸媽媽一定會係你身邊愛護你, 照顧你, 支持你!

小慈都感染到我地言語間既喜悅, 笑不攏嘴! 飲完奶奶就開始執行李! 係, 係行李! 因為今日節目太豐富要帶出街既野實在太多! 尋晚颱風浣熊襲港攪到個天倒瀉水出黑雨警告, 所有 playgroup 要延期連馬會都宣佈星期日賽馬取消咁大件事! 今朝竟然一滴雨都冇仲出太陽!! 完全係神蹟!!!!! 好, 出發去接爺爺嫲嫲過海去位於柴灣既 Baby Dreamland 影全家幅! 車程好長, 我地壞左幾日既 CD 機今日奇蹟地好番! 小慈可以聽住歌又食住餅餅咁心情大好, 如有神助, 神蹟 x 2 ^^

我預備左好多靚衫俾小慈影相架, 點知小慈唔鍾意攝影師哥哥監佢坐前 d 坐後 d 又側身 d 咁擺 pose , 不停 NO 攝影師哥哥完全唔合作, 一係唔望鏡頭, 一係走左出界! 終於係...... 腰斬既 >.< 攝影師哥哥要求好高有 d 藝術家脾氣 (試燈都攪幾個字個隻) 小慈又唔係 BB 唔會坐定定任你擺佈識, 已經識行識走完全隨心所欲睬你都傻! 又唔受氹, 我忍唔住鬧佢就即喊..... 唯有約過時間下次再補影啦....

去姑媽屋企食 lunch 再逼小慈快速叉電訓 45 分鐘就整醒佢 (時間緊迫我地係主人家又冇理由遲到)! 小慈換條靚裙變身小公主就返學校開 2 歲超級大 Party -- 麥當當生日會 :DDD