天陰陰又涼涼地, 小慈今朝訓到 8:45am 先起身, 醒左好安靜咁坐左係床仔, 我同爸爸唱住生日歌入房吻賀壽星女! 我地既小公主 2 歲喇, 媽媽爸爸希望你健康快樂咁成長, 無論何時何地, 爸爸媽媽一定會係你身邊愛護你, 照顧你, 支持你!
小慈都感染到我地言語間既喜悅, 笑不攏嘴! 飲完奶奶就開始執行李! 係, 係行李! 因為今日節目太豐富要帶出街既野實在太多! 尋晚颱風浣熊襲港攪到個天倒瀉水出黑雨警告, 所有 playgroup 要延期連馬會都宣佈星期日賽馬取消咁大件事! 今朝竟然一滴雨都冇仲出太陽!! 完全係神蹟!!!!! 好, 出發去接爺爺嫲嫲過海去位於柴灣既 Baby Dreamland 影全家幅! 車程好長, 我地壞左幾日既 CD 機今日奇蹟地好番! 小慈可以聽住歌又食住餅餅咁心情大好, 如有神助, 神蹟 x 2 ^^
我預備左好多靚衫俾小慈影相架, 點知小慈唔鍾意攝影師哥哥監佢坐前 d 坐後 d 又側身 d 咁擺 pose , 不停 NO 攝影師哥哥完全唔合作, 一係唔望鏡頭, 一係走左出界! 終於係...... 腰斬既 >.< 攝影師哥哥要求好高有 d 藝術家脾氣 (試燈都攪幾個字個隻) 小慈又唔係 BB 唔會坐定定任你擺佈識, 已經識行識走完全隨心所欲睬你都傻! 又唔受氹, 我忍唔住鬧佢就即喊..... 唯有約過時間下次再補影啦....
去姑媽屋企食 lunch 再逼小慈快速叉電訓 45 分鐘就整醒佢 (時間緊迫我地係主人家又冇理由遲到)! 小慈換條靚裙變身小公主就返學校開 2 歲超級大 Party -- 麥當當生日會 :DDD
公主裙 + 花女鞋咁悉心打扮, 係人都話小慈靚呀~~
小慈 d 頭髮仲淺色過我, 天生麗質越大越靚
我地今日有御用攝影師
爸爸今日就做 camera man
所有話黎既大小朋友全部到齊!! 總共有 35 個大人, 7 個小朋友, 8 個 BB = 50 人幫小慈慶祝生日! 多謝你地無懼黑雨, 大駕光臨!!
契媽姿姿姨姨 and 恩恩姐姐
洪展亮哥哥
Connie 姨姨, 家浩哥哥, 瑤瑤姐姐
舅父 and 彤彤姐姐
靚 B 會有可晴, 大熹熹細僖僖, 熙熙 and 柏弦
媽媽既書友仔 Peggy 姨姨, 茜婷茜儀姐姐一家, Norman 哥哥一家, 駿程哥哥一家
爺爺嫲嫲姑媽姑丈表弟昊昊
契家姐琳琳 and 美芝姨姨
契媽 Brenda, Wendy, Cherrie and 何柏曦弟弟
俾人偷影到我肉緊地攬住小慈, 媽媽真係好愛你呀, 女 ^8^
人齊喇, 開始玩遊戲
先玩點紅點綠, 麥當當姐姐考小朋友認顏色, 一講綠色小朋友要即刻係會場入面搵綠色既野然後指住! 哥哥姐姐就玩得好開心, 小慈就唔知發生咩事, 跟住玩狐狸先生幾多點, 請壽星女出去做狐狸小慈, 佢又識玩喎, 仲自己彈左隻勝利手勢出黎話要 TWO 點, 笑瓜我
小慈好開心
最後一個遊戲玩老師話
大家都好聽話 ^^
歡樂小慈派禮物
熱情既熙熙吻賀壽星女
每人一個吹 BB 預備唱生日歌!!
今日焦點 -- Elmo Cake 出場
一打開個蓋全場 "嘩~~~~~~" 聲四起!! 真係好靚呀 ~~
訂呢個 cake 真係千辛萬苦托上托要其他媽媽幫手係香港區運過黎架! 真係好唔話得! 丁橋~~
小慈超級鍾意 Elmo 對眼冇離開過個 Elmo cake 呢! 最緊要小慈公主開心
Happy Birthday to you~~ Happy Birthday to you~~ Happy Birthday to 小慈~~~
We love you ^8^
So yummy~~~~
食到所有人同小慈一樣變左麥當勞叔叔 :DDDDDDD
超級生日 Party 係一遍歡笑聲之下完滿結束! 多謝咁多位俾左一個難忘既生日俾小慈, 仲破費買左咁多禮物俾佢! 真係差 d 連車尾箱都裝唔晒呀, 大家太客氣喇!
多謝大家
沒有留言:
張貼留言