FSS Test

讀左兩年 JMC, 上完 88 堂仲要有個終極測試 -- Yamaha 基礎技能測試 FSS Test 就在今天!!

為左籌備呢個終極考試, 小明破天荒地日日彈琴唱歌跳舞, 好努力架!

對上一次入黎尖沙咀呢個課室係陪小慈家姐考試, 今日輪到弟弟, 時間過得好快

一班小朋友出去一齊唱 We're making music, La Di Da, 苦練左一個星期英文歌詞, 弟弟今日唱得好大聲 ^^

彈兩首自選歌 -- Little Red Shoes & Falling Leaves,  全班得小明一個大聲自彈自唱, 其餘唔知係咪太緊張冇唱到

弟弟今日仲發揮超水準表現竟然一個錯音都冇, 要跳音有跳音, 要連音有連音!  超勁!  連 Miss Lau 都讚佢今日彈得好好呀, 叻仔 ^^

出去接受兩個 Miss 既 「盤問」 考聽唱音 \ harmony \ 睇譜 .....  除左 harmony 弟弟一直都好弱要撞幾次先中之外, 其餘都答得唔錯, 老師仲讚佢把聲好好聽, 唱歌好好聽添  :)

考完喇!  考完喇!!  弟弟今日有超水準表現梗係要獎勵佢啦!  第一時間去佢至愛既九龍公園探 Flamingo

仲有 Parrots

招牌科莫多龍都唔放過

弟弟問我係唔係以後都唔駛上 Miss Lau?  我答係呀之後, 我仲估佢會高興到大叫, 點知弟弟係同我講:

"咁你快 D 幫我報鋼琴啦, 我要跟小慈家姐個琴老師, 佢好靚女, 要繼續彈上去先得架, 我仲想繼續學落去!"

呢個郭恩明真係估你唔到, 可能近來練得多彈得好, 對自己好有信心!  難得你開聲, 就即刻同你報名, 興趣係需要培養的  :)

進步

小慈派左成績表, 順利升上三年級, 好多科都有進步, 中文更加突飛猛進升左兩個 grade, 真係感謝神呀!!!

總平均分大拿拿多左  2.09 分, 真係一點不容易, 我係打定輸數佢要留班, 而家竟然不退即進, 我望住佢張成績表差 D 喊  >.<

小慈呢個小筲箕, 唔到派卷個一刻都唔知佢究竟識定唔識, 教佢個時好有反應, 隔幾日問番佢咩都冇晒, 是為之小筲箕 @.@  臨考數學個日仲差 D 攪到爸爸心臟病發, 無端端加減數全部計錯晒, 平時實食冇黐牙既聖經科擺到明送分題, 小慈成 part 冇做冇左 8 分, 話唔知要做喎, 考試卷有咩可能有任何一 part 印出黎唔駛你做先?  雕花咩?  美化考試卷咩?  做呀媽呢一刻真係嘔血, 突然痴筯交白卷肥佬要留班架阿女...... 真係一額汗

成績有進步, 做父母既當然開心, 至少俾我知道我個女都係可造之材, 我教過佢既野係考試卷都有反映返出黎 (除左冇做個 part 我當佢 short 左之外)  我都要同佢揹飛架, 身邊已經有無數咁多人同我講追得咁辛苦不如同佢轉校啦, 我唔制!  呢間學校係天父為小慈預備既, 我見到我個女有進步, 係就係慢 D 但一直有進步, 要俾時間佢麻

另一個要守既重要原因, 係小慈好鍾意呢間學校, 好鍾意返學, 好鍾意佢班同學老師, 課程雖然艱深  (題外話: 而家呢個世代有邊間小學唔深先?)  見佢讀得開心冇壓力係好重要, 小慈班入面有個神人, 由一年班開學到而家長期咩科都 99-100分, 對住佢真係有壓力架喎, 難得小慈又未試過為分數而唔開心, 100 分開心一陣, 唔合格下次又再努力過, 低分咪低分羅, 同自己比較有進步就得, 低分先有進步空間呀  >v<

小慈既心理質素係幾唔錯既, 讀書叻唔叻只係睇單一次既考試測驗成績去反映, 狀態好有溫書通常都唔差得去邊, 我贊同求學不是求分數, 如果小慈拎 100 分但勁驕傲沙塵的話, 我係唔會讚佢既, 相反, 測驗唔合格但原來份卷超深, 有溫習但錯埋 D 唔小心野 or 答錯晒 D 野, 即係佢唔熟唔識, 我唔會鬧佢, 只係睇成績分數係好危險架, 我反而比較注重小慈學習態度, 有冇努力盡力!  我地亦比較著緊小慈待人接物, 朋儕關係方面, 好在成績表評語寫得小慈好好:

A polite, conscientious and co-operative student.  Responsible and considerate.  Willing to help.

非常多謝班主任范老師既悉心栽培, 多謝你對小慈正面既評價, 時刻既鼓勵, 真係好多謝你呀!

黎緊九月弟弟都一齊升小學, 要做好家姐角色要有好榜樣, 希望小慈自發地著緊自己既學業, 脫離媽媽要我做咩咩咩再做咩咩咩既階段, 讀書幾時都係靠自己穩陣, 知識就係自己最好既裝備!

小慈, 繼續加油, never give up!!

小一新生適應日

全副武裝, 郭恩明先生今日返小一適應日, 好靚仔呀!!!

一望班郭恩明, 到!

排隊, 排隊, 男一行, 女一行.... 呢位小朋友開學都怕且係排第一架喇  >.<

正班主任王老師, 把聲溫柔到不得了 ^^

我最開心就係見到藍老師!  當年都係小慈既副班主任而家又教小明, 好開心呀!

只要有動物既地方小明就會好開心, 乖乖地跟老師上班房上堂

媽媽就上禮堂聽講座

班主任都要現一現身先再上班房上堂

怕大家聽唔真個名, 印埋出黎俾大家睇, 好週到

弟弟話上班房佢坐第一個位 (真係排第一呀  v_v ), 老師有問佢地有冇哥哥家姐係度讀書, 佢有舉手先答問題, 冇係個位度嗌出黎喎

跟住老師俾佢地睇 video 了解學校生活, 弟弟話見到小慈家姐係 video 入面玩緊鬥獸琪 ^^

之後有 D 高年班既姐姐 (小慈話係關懷大使) 同佢地玩 "姐姐話" -- 姐姐話短頭髮既人舉手!  弟弟覺得好好玩, 不過時間太快, 冇機會食小食就放學了

總括而言, 弟弟好似好適應亦都好期待小學既生活, 最大原因都係有小慈家姐係度, 咩都已經話定俾佢聽, 又講定小息會黎探佢等等, 弟弟成個坐享其成咁既樣, Yo!  駛乜驚呀 ^^

親子射擊訓練班

烏溪沙青年中心課程極受歡迎, 如果唔係朋友仔幫手排隊報名, 我地都報唔到

IPSC (The International Practical Shooting Confederation) 射擊訓練第一堂, 開始~~

課室細細五臟倶全, 我地鍾意佢有冷氣呀 ^^

呢支係大人用既 Marui Hicap 5.1 氣鎗

小朋友用 Glock 17

未入 BB 彈仲好安全, 擺 pose 影張相先

流彈冇眼, 載番護目鏡安全 d

呢對父子兵準備好喇

3 隻手指包鎗, 食指拉雞, 4 隻手指扶持, 兩隻手指公輕鬆疊好就係正確執鎗手勢, 爸爸幾有姿勢

用一隻手指公指住一點, 單眼測試邊隻眼中點就係你既主力眼, 射氣鎗不可以單眼, 因為要配合速度及準繩度, 所以一定要搵到自己邊隻主力眼用支鎗去就隻主力眼, 方便瞄準

第一次射紙靶, 第二次試射金屬靶 (人仔), 親子合作以最快時間射低 5 個人仔, 再射埋會亮燈既 Stop Plate 為之完成!  我同小慈瞄得好準, 用左 14 秒, 爸爸同小明超快, 9 秒攪掂!  十鎗 BB 彈好快射晒, 為培養小朋友責任心, 每次射完都要幫手拉彈匣入番 BB 彈及起人仔

小明為大家展示 Classic Paper Target

Ken Sir 為我地介紹 target 計分法, 分區 A / C / D.   A 叫 Alpha 5 分, C 叫 Charlie 3 分, D 叫 Delta 1 分, 冇 B 因為費事同 D 溝亂

小慈準備發射了

分數都唔錯呀!  我同小慈個張好集中, Ken Sir 話我地好準 ^^

好玩呀!!!

小慈升班了!

一年一度聖樂部就職禮就在今天~~

兒童詩班 + 初級詩班合唱 「神袮真好」--  神真美好, 衪看顧我, 我相信衪, 衪這樣愛我

小明唱個「我」字, 口仔擘到好大好圓, 好可愛 ^^

小慈由 4 歲唱兒童詩班唱到而家 8 歲, 升初級詩班了!!

一個亞柔兩個亞慈一齊升「LE」, 要繼續事奉神呀!

教會租左架城巴接載我地 100 位聖樂人員今晚擦餐勁既

好靚既 back drop

小慈幫我整緊凱撒沙律

三位馴龍發燒友

JMC

歷時 2 年, 分 4 個階段, 總共 88 堂既 Junior Music Course (JMC) , 今日終於最後一堂喇 ^^

小明由初初完全坐唔定, pat pat 永遠都得半邊坐櫈, 跌都唔知跌左幾多次落地, 雙手又不停攪個電子琴, 人地唱歌佢講野, 人地彈琴佢完全唔知做咩野...... 每一堂都要我講好多次坐好喇, 望實 Miss Lau 喇, 開琴喇, 放好手手喇.... 好多次, 真係有好多次, 我想放棄唔再同佢一齊上堂, 絕對覺得小明 0 音樂天份, 完全浪費時間浪費金錢, 掙扎左無數咁多次, 後尾都係同自己講, 小明係冇音樂天份, 但如果連堂都唔上, 佢更加冇機會學... 於是, 堅持到今日最後一堂!!!

一班小朋友又唱又跳表演緊 " We're Making Music, La Di Da"

小明自從畢業禮落力排舞, 近來對跳舞好有自信, 今日就企正中間帶領住其他同學仔一齊跳

Solo 彈三首歌: Little Red Shoes, Falling Leaves, The Dove

望住小明自彈自唱, 我真係好感動架!  雖然佢仲係間唔中問我個 DO 音係邊, 嬲得我唔睬佢要佢自己搵之外, 大致上都彈得好平穩,  今日有爸爸同小慈家姐望住佢表演, 特別唱得大聲, 彈得落力添 ^^

最後一關, Miss Lau 問番佢彈左 d 咩野, 要佢識睇譜, 今日除左係最後一堂 Class Concert, 仲係預演下星期日正式有個 FSS Test, 測試小朋友學左兩年 JMC 水平去到邊

好野!!  合格喇!  每一本書既最後一堂先可以貼 Well Done 貼紙

大合照

一班應該 12 位小朋友, Book 1 最多人, 越學越少人, 到而家 Book 4 得番 7 個, 今晚一個冇返

最興奮就係扮鬼臉

多謝 Miss Lau 既教導, 識左 Miss Lau 差不多 4 年, 教完小慈家姐就教小明弟弟, 多謝你包容呢位坐唔定既小朋友, 用大中細貼紙獎勵計劃黎評核小朋友即堂表現, 引發佢地改善上進, 堂堂要贏大貼紙既心, thank you so much!

希望呢兩年培育到小明對音樂有小小興趣, 對音樂有觸覺感, 訓練到佢有隻靈巧既耳朵, 透過聽音認識不同樂器, 和音 (Harmony), 絕對音準 (Absolute Pitch), 音調 (Tones), 節奏 (Rhythm), 基本音樂知識都學到 d d, 識雙手合奏, 睇譜...... 至於將來既發展, 佢想學先繼續學了!  雖然我覺得男仔識彈琴更加型, 但勉強唔黎啦~

2 年來的點點滴滴

仲有一個星期就 FSS Test, 小明, 不得鬆懈!!!

攝影比賽

5月及6月均為父母的大日子, 學校除在恆常的課程中滲入孝順雙親的元素外, 亦希望透過相片讓大家感受「愛」的訊息, 故此舉行「頌親恩  愛父母」攝影比賽........

學校有活動, 我地通常都會無限量支持, 不過搵黎搵去, 發覺全家幅實在太少, 我同小慈小明影既合照更少, 又唔可以太耐之前喎!  好在學校要求相片規格除左同父母合照之外, 同父或母是但一個合照都得  :)

比賽項目包括最似模似樣 / 最有趣扮相 / 最燦爛笑容 / 最表情一致 / 最溫馨家庭....  我搵到呢張相, 應該都算最有趣扮相勒掛?

比賽得獎者由家長投票選出, 可惜我要返工, 冇可能於放學時段去學校投票, 於是叫小明自己投, 呢位聰明既小朋友梗係唔駛教都識投比自己啦!  佢又真係衷心覺得自己張相最好先緊要丫麻  ^^  嘩哈!  真係多謝小明投俾自己既一票, 同埋多謝其他家長既厚愛, 我地真係嬴左 「最有趣扮相大獎」 YEAH!!!!!!

真係好開心呀!!!  得獎者將於結業禮上獲發獎盃及獎品

郭恩明, 你又多一隻獎盃喇 ^^  多謝天父~~~