暑假尾先開始做暑期作業, 跟住就開學, 小慈既進度我用 "漸入佳境" 黎形容
最嘔血應該係岩岩做暑期作業, 玩完 3 個星期 summer camp 真係連 he she it 都唔知係咩
開學到而家差不多一個月, 小慈每日都係我放工之前做晒功課, 仲係不求人添架喎, 問番佢 d 野佢又識, 吩咐佢既野又冇甩漏, 令我對佢信心大左, 又覺得佢醒左!
二年級轉左個中文老師阮 sir, 上左幾堂小慈已經話俾我知阮 sir 係第一年教中文, 佢唔識講普通話, 話佢 d 音唔正, "你真棒 (bang)", 會講左 "你真捧 (peng)", 有時仲會講講下講左廣東話!? 下? 唔識普通話可以教中文既咩? 佢地間學校普教中架喎, 咁都得? 小慈仲話阮 sir 有病. 下? 咩病? 小慈話阮 sir 個怪病係佢好怕嘈, 一嘈呢佢就控制唔到自己隻手, 會不停咁樣寫功課!! @.@ 真係..... 本來我好認真諗緊駛唔駛同學校了解下, 就俾小慈最後個句說話攪到笑左出黎!
星期二要默書, 阮 sir 話要默第二課, 以前一年級藍老師係會有張默書紙俾大家溫習, 而家阮 sir 冇, 有 d 家長就話默課文後面個 d 詞語, 咁少? 新人事新作風, 就係唔知阮 sir 咩作風, 穩陣起見都係成課溫晒啦! 小慈叫苦連天! 我問佢: "你係咪想默書唔合格先? 第二課唔係好長之麻, 好多字你都已經識, 識多幾個字又冇壞.....@#$#%$^&#" 哦到佢冇聲出
呵哈! 縱然阮 sir 普通話唔 ok, 佢效率又好高喎, 即日已經派番本默書簿, 小慈第一次中文默書
94 分!
我仲估佢會 100 分架, 原來錯埋 d 無謂野! 令我更加牙擦擦就係, 我 tip 中左!!! 阮 sir 真係成課書默晒, 仲係調亂晒黎默, 句子仲好長添! 今日有半班小朋友唔合格架! 主因係真係有好多人淨係溫左詞語表, 另外有更多既人係因為聽唔明阮 sir 既普通話唔識默!!!! 小慈話: "我識聽喎!"
呢件默書事件令小慈以後 -- 更加聽媽媽話, yeah!!!!! :)
