學校每年都會舉辦兩次旅行, 上年 11 月上學期旅行小明未正式入學, 今次下學期旅行小明就正式著校服參加喇 ^^
天氣報告話有雨間中有太陽, 小慈好擔心會影響今日行程, 於是我地一齊祈禱求天父俾我地有好既天氣, 就算落雨都係等我地係室內先落, AMEN!!
小明好水皮!! 學校安排小朋友要入課室點名先出發, 小明一入學校門口就大喊以為我送完佢返學就會走 @.@ 玩玩下玩具唔見左我又大喊以為我偷走賣甩佢!!! 弟弟, 你既表現同小慈家姐當年一模一樣, 意味住我唔可以送返學啦???!!!
有我拖住就成個生鬼晒, 你睇佢同澄澄影相個樣幾好笑?!! 其實 5 分鐘前先喊完....
之後去小慈班房, 小慈即刻帶我地參觀課室展示佢既作品
我有冇睇錯? 隻狗係咪凌空跳起? 可能係開心到彈起
小手肌幾好喎, 冇貼出界
今年用門徒做組名
同學仔許樂瑤
出發喇~~ 小明係好鍾意搭巴士, 旅遊巴都唔例外
小明戴呢頂 Tigger 帽真係出晒位, 係人都攪佢條尾 XDDD
學校係搵旅行社幫手帶團, 領隊非常識攪氣氛係車上面問問題, 請小朋友鬥快講學校名, 老師名, 又有 IQ 題, 數學題, 攪笑題... 等, 小慈非常踴躍參與, 贏左唔少獎品! 其中一條問題仲全車冇人估中但非常好彩俾我撞岩左!!
題目係: 1 隻公雞 + 1 隻母雞等於 3 個字..... 答案係 "2 隻雞" XDDDD
行程第一站 -- 天水圍綠田園! 先黎一張大合照
熱愛動物既小慈第一時間去餵牛
呢度唔算好大, 不過一樣有農場, 田園, 魚塘, 大型遊戲
半年來都冇進步, 弟弟都係怕左山羊, 牛牛!! 話佢地好大隻好惡唔肯埋身! 點解會越大越驚呢?
都係坐船仔餵魚開心 d
小明好滋陰, 魚糧都係逐粒餵, 所以 d 魚去晒小慈度
幾震撼!!
見到賽車場雙眼發光
型
小慈家姐去左片車, 弟弟腳仔唔識踏就擺 pose 影相算啦!
中午氣溫 31 度, 就算慢步都出晒汗!!
呢個大波唔知係唔係可以入去扮倉鼠呢?
行程第二站 -- 錦田紅磚屋
呢度好多特色店鋪, 有時間慢慢行應該會發掘到 d 好野! 不過唔係好岩小朋友
你睇小明搵到呢隻醜樣豬鍊到佢眼都突埋開心到暈
有小慈最鍾意既冰震菠蘿
行左 45 分鐘, 冇買野, 不過出左好多汗
呢位係馬老師, 佢真係錫小明錫到出晒面, 竟然買左本貼紙簿俾佢!! 馬老師吩咐小明 要乖, 媽媽先可以貼一張貼紙係心口!
龍椅?!
行程第三站 -- 龍堡酒店自助餐! 真係好自助, 小慈自己攞野食, 自己食到清碟! 今日超乖!!
飯後大抽獎! 今年係我地第 3 年參加學校旅行, 食白果食左 2 年, 估唔到一係抽唔中, 一抽就全家中晒!!!! 多謝校長!!
三位好朋友
小慈回程要求同弟弟既同學仔澄澄坐, 兩個女孩子玩到笑到收唔到聲! 點解咁鍾意同澄澄玩? 小慈話: "我覺得澄澄好可愛呀~~"
瞓醒晏覺又食到飽飽, 回程時聲震屋瓦, 開心到跳起
笑瞇瞇, 周圍電人
今日好開心! 感謝天父全日都好天氣!! 天父真係好愛小朋友!!
