5 級樂理考試

已經考獲 4 級鋼琴既小慈, 一定要考 5 級樂理先可以繼續考琴試, 於是, 為期半年既樂理班就開始了.  媽媽心諗, 一個又係咁考兩個又係咁考, 橫掂要接接送送小慈, 不如小明都學埋啦, 可能會幫到佢認識樂理, 音樂考試會合格番呢?

今日就係考試既日子了 ^^

呢個樂理試係公開試, 係人都考得, 我廿幾年前因為想做幼稚園老師要識彈琴都有考, 當時同 D 小朋友一齊考試, 佢地勁嘈, 好似好輕鬆咁, 我就緊張到手心出晒汗感覺都真係幾特別架, 唔知小慈小明驚唔驚呢?

人頭湧湧, 小慈小明加油呀!!!

呢個三角琴仔好得意呀!

努力學習音樂, 用音樂去服事主!

希望兩姐弟合格啦!!  結果要兩個月先知!

馬騮山 新眼鏡 House 41

今日要同弟弟去香港盲人輔導會取眼鏡, 真係好貴呀副 DIMS 鏡片, 但如果可以控制到弟弟既近視加深速度 (最理想既 case 係兩年只增加 50 度近視), 有鑑於小明 5 年級已經 300 度近視, 咩方法都試下啦!

爸爸專程送我地去攞眼鏡, 經過馬騮山時我叫佢慢駛, 佢直情停車俾我地觀賞馬騮, 笑死我

DIMS 既特色係鏡片佈滿0.8微米微型鏡片及加入近視離焦功能, 小朋友望邊個角度近視離焦都可以發揮作用, 有效減慢加深近視速度咁話

靚唔靚仔呀?  副鏡連框 $3129 架!  好在有得用生日優惠, 唔係仲甘!

小明話而家睇咩都清楚晒喇!

有時間, 我地決定行去美荷樓 House 41 食飯

天空海闊任鳥飛, 小小天地跳飛機 ^^ 

咪係佢攞!  以前垃圾蟲係綠色, 衰野黎架麻, 而家隻清潔龍又係綠色, 但係乖既..... 阿媽, 我好亂呀!

早餐時間過左, 午餐時間又未到, 於是搵個靚位望住風景做功課先

小明指定要巴拿馬火腿沙拉

實情係佢食火腿, 我食沙拉

咩都喜歡用手食既小明

簡單又開心的一天 ^^

小慈第一次跳舞巡遊

好榮幸得到舞蹈老師既邀請在尖沙咀文化中心露天廣場參與今年亞裔藝采

中國舞由曉舞蹈包辦, 仲有啦啦隊、肚皮舞等多個亞洲國家既舞蹈表演, 好期待呀!

一早到黎視察場地先 ^^

媽媽只係識同小慈搽粉底同唇膏, 眼影、眼線、畫眉呢 D 野都係等老師出手啦 :p

化完!  係唔係好省鏡呢!

今日其實趕到我 CC 下, 星期日返早堂, 初級詩班要獻詩, 獻完早堂即刻送小慈去文化中心, 化完妝就即刻返轉頭接埋午堂獻詩既弟弟再出尖沙咀, 點知未到旺角已經塞車, 即刻跳車搭地鐵先趕得切表演前見到小慈家姐咋!!

等緊巡遊時影的, 好可愛呀佢地!

我好鍾意呢張呀!!  勁有活力!

肉臂姐姐們

今日曉舞總共派出 4 隊表演, 好多靚女呀!

準備巡遊了!  今日好好陽光, 如果唔係咁少布又近海邊, 凍瓜佢地

巡遊開始了, 日本派黎既代表

小慈出場!  巡遊中如果行唔到停落黎係要擺 pose 的, 小慈在中間

小慈上台跳舞了

我同弟弟好叻坐到第一行睇得好清楚 :)

小慈笑得好靚呀 ^^

舞蹈「一片太陽花」

老師在台上影的角度, 影到我錄影緊, 哈哈哈哈 :D

任務完成!

多謝周老師俾小慈既演出機會

多謝陳老師由小慈 3 級教到佢而家 9 級

咁靚女, 影多幾張相啦

台上的小慈好耀眼呢 ^^

好多鴿子

我地去五支旗桿等啦!

今朝淨係食左個麵包到而家 3:xx pm 先食野, 餓到扁左!

又儲多左表演經驗喇~~  媽媽好欣賞小慈從來不怯場!  叻叻!

美荷樓記

今日同弟弟去石峽尾配眼鏡, 極速配完無所事事, 於是去左附近既美荷樓行下, 仲有展覽睇添!

好似入左時光隧道咁呀

一入場就見到石峽尾大火既新聞, 係呀, 當年如果唔係我婆婆快手夾住我媽媽 (仲係 BB) 逃離火場, 我應該冇機會出世

嘩~  呢條經典既燒 pat pat 滑梯, 當年真係唔知玩左幾多次, 燒 pat pat 都要玩

呢舊圓轆轆又係經典, 呢入去冇野做都要呢埋 :D

氹氹轉~  細個時係要轉到有小朋友飛出街先會停

呢個鋼架都爬唔少, 爸爸話佢細個係上面跑添呀!

我細個都係住 11 座呀!  黃大仙 11 座

呢款氹氹轉又係好玩架!

好多回憶

我地以前叫 7 層大廈, 點解美荷樓得 5 層?

我地細個玩既玩具

弟弟叫呢個做 Snoopy 打字機

一見到衣車, 就諗起我婆婆、公公, 以前都叫有間山寨廠架, 我媽同秋媽都係車衫高手

我媽以前好唔鍾意公屋, 就係因為要企係屋外煮飯, D 鄰居會好八卦你今晚食咩餸

呢間屋, 我記得曾經住過我太婆、公公婆婆、我媽、姨姨同 6 個舅父.... 真係好難想像佢地咁多人咁細間屋點瞓....

公家廁所同洗衫地方

真係好簡陋下架

稍為先進既公屋

已經有自己既廚房廁所

香港房屋發展史

活化左既美荷樓模型

唔知小明睇完我地既「以前」有冇一層深既體會呢?