遠近慈明: 小慈小四

顯示具有 小慈小四 標籤的文章。顯示所有文章

2018年2月1日星期四

小學最後一次陸運會

好凍! 真係好凍! 凍到教育局要出指引制定學校陸運會在寒冷天氣警告下該如何安排, 學校臨時出通告俾家長呼籲同學們要切合自身狀況決定是否參加陸運會, 不參加今次不會作缺課或曠課論..... 梗係要同小慈小明商量啦, 但我都未講完, 兩個已經大叫一定要參加!! 小慈仲話最後一年, 堅決落雪都要去! 於是, 我地切切為陸運會禱告!

今朝係入冬以來最低溫得 6 度, 但比傳聞中的新界得 3 度好少少! 天父保守出太陽又冇落雨, 冇想像中咁凍呢! 為小慈小明預備保暖午餐飯壺, 保溫水壺, 暖包手套, 太婆親手織既愛心頸巾, 又專車送到運動場門口, 爸爸媽媽可以做既野已經做晒, 自己照顧自己喇~~

兩姐弟最後一年一齊參加陸運會了, 好好加油!!

小明首先出賽, 今年報名參加 60 米跑、一分鐘跳繩仲有 4 x 100 接力賽

好乖, 教左佢地臨開跑先好除外套以免攝親, 真係有聽教聽話啦!

留心聽老師講解的小明

跑步腳仔唔夠 fight 名落孫山, 不過 1 分鐘跳繩就厲害了, 跳足 125 下差少少冠軍而家亞軍!!! Yeah! 叻仔!!

六年級特別團結, 小慈個班除左病人之外全部返齊!! 班主任 Miss Kung 買左打氣棒棒為佢地加油 ^^

今日大豐收, 小慈贏左個人 200 米跑季軍 & 女子 4x100 米冠軍!! 超級驚喜!! 連續 3 年, 小慈次次跑步都攞獎, 真係要好好栽培下 :D

班際比賽更加不得了, 小慈班贏左最投入參與大獎、校友盃、全班連同班主任玩接力賽贏埋薪火相傳冠軍!! 超勁呀!!!

兩屆校長一齊頒薪火相傳杯, 好有意思 ^^

好大座獎杯 ^^

學校仲 post 左佢地張相入學校網頁添! 不過官方照片未有

全班連同班主任 23 人一齊跑接力, 心連心士氣大增, 攞埋冠軍勁開心!!

仲有一齊做啦啦隊, 自創口號贏最投入參與大獎, 實至名歸! (影呢張相時好多啦啦隊已經走晒, 原先好多人架!)

為左縮短頒獎時間可以快 D 放學, 有 D 獎項如小慈個 4x100 接力賽冠軍遲 D 返到學校再頒獎, 少少不甘心, 不過無所謂啦! 心情好好, 所以吹左全日風都冇事!

叻仔叻女! 爸爸媽媽好開心, 非常自豪! Well done!

後記:
在學校早會頒發團體獎, 小慈再次接受 200 米跑季軍榮譽

4x100 女子接力冠軍!!!

金光閃閃多美麗!

4x100 男子, 小慈班組兩隊男仔都贏啊!! 超勁!

總冠軍就係弟弟班信社贏左 ^^

完美的小六陸運會, 驚喜, 難忘~~

2016年5月29日星期日

努力考試

今年既學期終試, 史無前例地一改以往考星期二三四五, 而改為考星期三四五一! 隔左個星期六日先再考數學同常識, 實在太令人感動, 多左 D 時間溫書啊!!!

一個好乖, 好努力做卷既小朋友

點知唔夠半個鐘, 努力既人仔戰鬥力開始下降, 張櫈同佢個心一樣, 開始飛走了....

小慈今年表現超級乖, 我同佢講因為工作超級繁忙唔可以請假陪佢溫書亦未必出到卷俾佢溫習, 小慈好失望咁話: 「吓~~~~~ 冇卷我唔知溫咩喎.... 不過唔緊要啦媽媽, 我知你返工好辛苦, 我得架喇!」.... 於是, 媽媽唔忍心, 唯有晚晚出卷出到凌晨一點咁整份好野佢嘆啦! 每朝當小慈見到有份卷係佢枱面, 佢係會高呼「好野!! 有卷溫習喇!」小慈真係好攪笑 :D

我真係唔能夠兼顧小慈同弟弟, 再加上小慈而家學緊既野, 我開始唔識教佢, 特別係數學、中作同英文 writing, 於是搵左個補習姐姐俾佢, 一教就教左兩年! 終於, 補習姐姐大學畢業要投身社會, 今日係最後一堂教小慈了

多謝昕姐姐既教導, 希望小慈有張亮麗既成績表可以報答你既辛勞!!

努力考試!! Fighting!!

2016年3月11日星期五

大個女

辛苦捱過測驗周, 放半日假打算同小慈小明去玩輕鬆下, 點知小慈同我講有師姐約佢去屋企會所玩, 問我俾唔俾佢去?

真係大個女, 小慈平時怕怕羞羞幾時都黏住媽媽, 難得佢願意同呢班師姐玩一定係好鍾意佢地先會去啦!

呢班師姐係跳中國舞識既, 個個星期練習又一齊出去幫學校比賽, 感情日漸加深

由中國舞初班做主角到四年班升上中國舞高班其實唔係好慣, 好在有師姐照顧住咋! 其中最錫小慈既就係呢位師姐呂依蕎, 佢成日話小慈好得意, 細細粒叫佢做「奀吱吱」

四年級係得小慈同身後既方蔚兩個

仲有方蔚既家姐方晴

女仔係鍾意做呢 D 手作仔, 寫晒信添~

要做個有禮貌既人, 小慈回信、回禮

跟住師姐又回信, 實在太攪笑

估都估唔到小慈會同師姐做好朋友! 非常珍貴、純真的友誼 ^^

2016年2月26日星期五

陸運會

今年既陸運會, 小慈終於肯參加比賽, 自選「一分鐘跳繩」, 跟住又同同學仔組隊參加「女子 4x100 接力賽」, 問佢報唔報名參加啦啦隊佢又肯喎, 真係大個女, 媽媽最鍾意小慈有勇氣、積極參與及願意體驗新事物! 天父俾左咁多好野我地, 老師同媽媽鼓勵你參加既野, 梗係對你有好處先叫你去啦, 咩都試下先知自己鍾意 D 咩, 樣樣識少少不過唔好扮代表 ^^

真係喜出望外, 估唔到一參加就有獎!!!
「一分鐘跳繩」季軍「女子 4x100 接力賽」亞軍!!!!

多謝義工家長現場直擊報導, 仲幫手影靚相 ^^ 5 號跑道既小慈排隊出場喇~

第一棒起跑! 呢張相影得好靚呀 :)

小慈跑第四棒因為佢話佢唔識交棒 :D 真係好厲害, 小慈話佢個隊一開始失手交棒交衰左, 到佢跑時佢就盡力追過左一個人, 但前面個位實在差太遠追唔到! 右邊數起第二個橙色鞋帶既小朋友就係小慈, 佢既跑姿超靚! 爸爸事後仲話一早知小慈跑步幾好, 下年報埋 100、400 個人賽都得 ^^

跑完喇~~ 隊友兼好朋友方蔚一齊舉起勝利 V 手勢, 無錯, 係得第二名呀!

密鑼緊鼓小慈一跑完就即刻變身啦啦隊, 企最側邊摸住獎牌個位就係佢, 我估係學校已經頒左跳繩獎, 小慈都唔知自己跳左幾多下, 只知自己冇失手冇停到, 叻叻呀! 佢係屋企練習時, 唔停會跳到 100 下以上架, 宣佈佢得獎時小慈都難以置信, 好驚喜自己有獎 ^^

藍色代表信社 (我最鍾意既顏色 ^^), Faith, 佢地企左個「F」出黎再加 9 位小朋友做特別動作, ending post 跪左係地下個位就係小慈, 之前排練時有跳 over 動作, 不過後來老師都係怕危險取消左, 佢地口號叫得好齊, 內容仲好得意:

我地信社人多才多 Quali 多, 我地同一心, 我地齊一心, 我地同心齊心 Number One! 信社加油, 永無漏油, 我地上場, 震驚全場, 我地攞獎, 冇人敢搶, 信社精神, 不死靈魂! 我地個個心連心, 攞硬全場總冠軍! 信社健兒個個醒, 今次實攞第一名! 信社醒, 信社勁, 男男女女都咁型! F.A.I.T.H. We are champion! We are best of the best! YEAH!!!

好攪笑呀! 抵佢地攞啦啦啦隊最佳合作隊伍, 最後信社又真係攞左全場總冠軍, 勁勁勁!!!

轉個頭又見小慈換基督女少年軍制服預備頒獎禮及閉幕禮當值, 今日行程真係好緊湊呀!

著住制服上台攞獎真係好特別! 4x100 接力賽亞軍, 左邊第一個就係小慈 :)

不論人生經驗還是獎牌, 今日都係大豐收的一天

叻叻呀, 小慈!! 攞左牌, 即刻對跑步同跳繩有興趣, 出年再參加 ^^

2016年1月16日星期六

小二小四家長日

派成績表喇~

一家人齊齊整整返學校見老師, 一年先見得一次, 梗係要成家一齊出動啦!

小慈預約 10:30 am, 我地早到但門口冇人, 即刻攝位 :)

繆老師連續兩年成為小慈班主任, 仲係數學輔導組既導師, 對小慈非常了解, 盛讚小慈今年用心左, 睇得出佢好俾心機好努力, 上堂專心、主動, 唔識會舉手問問題, 落堂亦會追問老師, 老師非常欣賞! 但始終都係多唔小心、大意, 學習與應用未能融會貫通, 要努力追學業成績, 因為已經 4 年班真係要俾多 D 心機, 數學成績差少少, 反而今年俾左個驚喜我地, 普通話 & 視覺藝術攞 A+ 真係估佢唔到 ^^

至於郭小明, 今年轉左新班主任蔡老師, 坐低第一句就話小明最出色既地方就係佢既說話能力, 講故仔講得好好, 有膽量有能力能夠聲情表達故事內容, 係班裡面少數能夠說話攞滿分既同學, 令老師印象深刻! 上堂乖, 守規矩, 主動積極, 情緒穩定, 只係少少坐唔定, 但整體表現唔錯, 老師對佢好滿意....... 點解? 點解老師心中既小明同我屋企個個差咁遠既? 係咪同一個人黎架?!! 不過都慶幸蔡老師欣賞小明 ^^ 成績就退步左啦, 尤其係數學, 求其做點會有好成績先得架? 一個好大既教訓! 驚喜既地方就係普通話 A+ 音樂攞 A-, 終於唱歌冇再高 8 度 >.<

小明仲帶我地去睇佢既貼堂, 貼係樓梯係人經過都見到, 好威水!