製作小禮物

我地教會有好多團契, 每次浸禮都由不同團契負責, 今年終於輪到提摩太團!!  如果唔係因為疫情延期, 12月已經浸左, 唔講唔知, 我地對上一次整浸禮禮物已經係 9 年前架喇!  呢張相真係經典, 小朋友們應該都唔可以再坐大脾  >v<

9 年後既今日, 我地都係整相架

相架既襯花要靠自己自由發揮

排好之後要用熱融膠固定

師母整得又快又靚, 好厲害

我同小慈既作品

半個鐘已經整完, 就等受浸日影埋相入相架就大功告成!  路過將於 6月27日啟用既宋皇臺站, 好快就多一個選擇返教會, 正!

而家只可以等巴士返屋企, 送車尾造就佢地入去公園玩下, 已經大個晒, 腳太長玩盪鞦韆會擦地 XD  小慈依然好錫好錫弟弟, 仲會走去推佢盪高 D, 場面溫馨~

6月13日浸禮, 當日亦有我地團契姊妹寶玲為大家作見證, 佢一次又一次癌症復發, 一次又一次死過翻生, 但天父總給予佢夠用既恩典!!  超級奇妙

歡迎大家參加!!

家姐再見

勇敢既家姐決定移居米字國, 仲要係短時間內完成, 差 D 趕唔切同佢餞行!!  今日我地不惜公本整左家姐最鍾情既海鮮餐, 一早出九龍城買料, 下午茶食到夜晚, 成家都飽到行唔郁 XDDD

趁天未黑影大合照先啦~

弟弟 & 姑媽一家

小慈 & 姑媽一家

男子組, 提早慶祝埋父親節 XD

女子組

父子女

兩姐弟

姐弟與另一半

開餐!!  由頭盆泰式香葉包 & 無骨酸辣鳳爪開始!  好多年冇食, 三表姐弟圍住張枱食左好耐, 昊昊更加係超級捧場 :D

跟住仲有清酒煮蜆, 大家連湯都飲埋

仲有椒鹽雞軟骨, 自家制蜜糖叉燒, 馬拉箋 & 清炒椰菜苗, 春筍雞湯, 當然唔少得家姐指定既鮮胡椒炒蟹啦~~

賣花讚花香, 4 隻頂晒角既大膏蟹要分兩次炒, 一人半邊, 真係滿足到不能形容呀~~

食蟹前趁對手乾淨又大合照先~

有位小朋友在自拍

我地個月光寶盒又攞出黎迎賓喇

街機一樣, 輸左要退位讓賢

你估佢地打咩機咁開心?

係街霸呀!  弟弟仲 K.O. 爸爸, 開心到不得了 XDDD

仲有一齊玩三國誌, 玩到唔想瞓

我信他日總會相見, 願一切平安, 珍重! 

一日假期

5 月中既一點紅, 就係呢日喇!!  今朝瞓到自然醒都係講緊 8:45 am, 叫做好架喇, 我有幾次放大假 7:00 am 就醒左幾唔抵呀 @.@  天氣好熱, 又要俾時間小慈小明做功課, 於是我就做下自己野!  之前參加左教會傳道部常設佈道隊發起既關愛鄰舍抄寫信函事奉, 今日終於起筆, 小慈見我寫得咁起勁, 佢又做晒功課都想參加埋一份, 梗係好啦!  一齊傳福音!

真係好耐冇攞起支筆寫信, 寫一封已經手震, 盡量叫自己唔好寫到咁撩但都係龍飛鳳舞, 希望街坊睇得明啦 :P

趁有時間我仲執下櫃筒, 搵番 D 歷史文物出嚟!  呢度 D 利是全部都係賀我結婚 & 預祝小慈出世!  

仲有小慈小明每年既利是錢, 我同秋秋都有寫祝福語!  直到近呢幾年小慈小明直接袋住我地俾既利是, 唔駛媽媽 keep 了~

最珍貴就係呢堆!!  我媽媽, 仲有我媽媽既媽媽, 即是我婆婆暨小慈小明太婆, 更加有世上最好既奶奶 秋媽, 寫俾我地既祝福語, 真係要 keep 一世呢!

小慈小明做完功課, 終於都有時間出去行下街, 兩個都話波鞋唔岩著要買!  原來兩姐弟都要著 41 號鞋了 @.@  有位小朋友接受緊家姐既服侍

試左好多對都係唔鍾意縛鞋帶, 要去番呀博士度先有魔術貼波鞋!  弟弟話見到有同學跑街時甩鞋帶跌親受傷, 所以真係唔想要縛帶波鞋喎....

最緊要你地舒服啦!!  滿載而歸~

脊柱側彎

小慈 5 年級 2017 年開始由健康院發現有脊柱側彎問題, 需要每半年覆診一次及照「莫爾相片」, 去到舊年年頭, 疫情下所有學生健康驗查停晒, 但健康院竟然打電話叫我地返去覆診?!  唔通照完 X 光張片有問題??!!  嚇死我即刻飛車出去, 好在醫生只係話健康院跟左小慈 3 年, 設施器材唔夠, 又怕小慈發育時有可能問題會突然轉差, 於是轉介小慈個案俾醫院跟進, 醫院有脊柱專科專門好多!  俾晒所有以前影既片呀報告呀轉介信呀咁叫我去醫院排期, 我心情幾複雜呀, 當時岩岩疫情開始人心惶惶仲要我去醫院!?  但唔入紙又排唔到期, 震震下咁踏入威院, 生完小明之後都冇黎過!  一條隊去排照 X 光, 一條隊去排見醫生, 我地住得近去醫院都叫方便, 又算快喎, 新症 3 個月就有得睇

第一次由爸爸帶, 話小慈唔算嚴重一年覆診一次就得!  今年我請到假就由我跟番啦, 每次照 X 光同見醫生相隔大約兩個星期, 今日醫院打晒蛇餅超級多人, 原來轉左程序要先繳費後診症, 好在有自動繳費機, 唔係要排完隊繳費再排隊等睇醫生真係等到天荒地老 @.@  醫院都進步左, 只要你一繳費, 程式就會開始, 耐心係大堂等候就會有姑娘叫名, 先幫小慈度高磅重

15 歲的小慈  高 161.5 cm  重 39.6 kg

跟住入房見醫生, 醫生話小慈舊年側彎 12 度, 今年 15 度, 輕微嚴重左要轉番半年覆診一次!!  (嚴重左???!!!)  不過冇其他野可以做只係繼續覆診, 20 度先需要佩帶支架, 因每日要戴足 23 小時好辛苦所以可免則免!  比較擔心小慈係 delayed puberty 問題, 之前健康院講過話最快 7 歲半黎經最遲 15 歲, 小慈剛剛足 15 歲都係轉介我地去兒科跟進, 穩陣 D!  唔駛攞藥排晒 D 期就走得, 成個診症過程一小時鬆 D 完成都算快!

之後, 小慈話肚餓要出去食 lunch, 未食過譚仔既佢今日黎見識下

譚仔初體驗~~  小慈試食 魚片 魚腐 雞肉 酸辣米線, 正!  爸爸問佢有冇聽到譚仔話?  少少啦 XD

後加黑糖珍奶一杯.... 咁樣食都唔肥呀 @.@

返屋企做功課有螳螂陪伴添 XDD   佢究竟係點樣入屋既呢?  我地明明有晒蚊網?!!  相信呢個係一個謎~~

由於在 keyboard 發現佢, 於是命名 Keyboard!!!  同佢玩左一陣就天台放生啦!

身體健康呀, 小慈女!!

我的母親節

多謝錫我既老公早幾日已經問我想點樣慶祝母親節, 要唔要佢煮飯云云?  煮飯梗係好啦, 秋秋煮野咁好食, 不過我無以為報, 父親節我唔會煮番俾你食架, 我係無飯妻子黎架麻... :P  於是秋秋好豪咁一句 "得啦!"  就拍版!  小慈女都有問我對母親節會唔會有好大期望?  要唔要收禮物咁?  傻豬黎既, 你陪住媽媽, 俾我攬攬錫錫, 平日孝順緊要過母親節先至黎有表示啦!  於是, 小慈今朝好早起身炒隻靚蛋俾我食!  乖嘞!  乖嘞!  煮多幾次俾我仲好 :P

最估唔到工人姐姐送禮物俾我!  母親節收花呢 XD  教會都有心意送俾所有母親, 一包口罩同物輕情義重既散紙包, 唔返實體崇拜係冇架!

崇拜後食晏佢地問我想食咩?  比茶餐廳高級少少既, 我地去左食快靚正既十三郎, 巧遇阮牧師, 大家都係快食趕住返屋企網上團契 

我地真係極速架, 由秋秋三扒兩撥食完先去街市買餸, 我地後來趕上!  爸爸負責買, 弟弟負責拎, 一次過用身體揹晒 D 膠袋, 笑死

正呀!  煮一味食一味, 保持新鮮熱辣辣 :P  頭盆係泰式酸辣無骨鳳爪, 仲有清酒煮蜆, 秋秋仲整熱兩杯清酒同我乾杯添~

弟弟非常欣賞呢碟蒜蓉炒椰菜苗, 半碟俾佢掃晒!

主角鮮胡椒蟹出場!!  蟹殼大過我塊面, 但係小慈小明已經大個, 識食, 兩隻蟹 4 個人有 D 唔夠分既感覺!  唔通以後要買 3 隻???  好重皮.....

好味呀, 老公!  你快 D 教曉佢地煮啦, 母親節唔係老婆節呀, 父母親呢 D 時間應該要嘆架!

Thank you so much!  Love you~

中三選科家長晚會

事態好似好嚴重, 上學期派成績表都只係網上開家長會, 今次中三升中四選科, 學校竟然開實體家長會!!  可見呢件事真係影響深遠, 要兜口兜面講清楚!  可惜限聚令下只容許一位家長入場, 爸爸冇得幫手聽, 我要非常留心 jot notes 再轉述, 真係辛苦晒....我 @.@  家長晚會 7:00 pm 開始, 我放工要飛入去, 約小慈在學校門口等

我地坐係禮堂最後排既位置, 小慈完全睇唔到個螢幕要戴眼鏡!  久違了的眼鏡 Look ^^

全級 120 人今晚有 118 位同學既家長參加, 高度參與校長話係對佢地好大既鼓舞!!  有緊張學生學業既家長係蒙福既, 因為選科真係好重要, 會影響將來子女既前途

呢個遊戲都幾複雜, 首先係必修 4 科核心科目 (中文 + 英文 + 數學 + 公民與社會發展 (前身係通識)), 跟住再揀 2 科 / 3 科選修科, 不過要成績係全級 36 名以內先可以人揀科, 每科只係有 24 (+-3) 咁上下既位

暫時小慈商業英語, 中史 & CHEM 成績叫做較好 (排名 32 / 48 / 41), 希望都有機會人揀科, 但奈何佢又唔係好鍾意呢幾科, 想讀我都唔識既 "健康管理與社會關懷" & "旅遊與款待", 不過呢兩科都睇 中文 + HIST + GEOG 成績 (50% / 25 % / 25%), 小慈上學期中文炒左我真係唔知佢點揀 (-_____-), 如果揀讀 CHEM 或者可能有 D 機會, CHEM 計 60% + 英文 20% + 數學 20%, 但我又唔覺佢呢科好掂, 數理佢都係比較弱!  ECON 中三都冇機會讀又唔知佢識唔識, 有科 BAFS 佢淨係讀過 Business English 又唔知掂唔掂.... 救命啊 @.@

成件事都係睇成績, 實施左成年既網課其實係拖慢甚至非常影響成績!!  呢個上學期都係自修咁, 考試我同爸爸出盡全力成績都係中間, 真係唔識點同佢揀, 仲要通識改頭換面唔知點玩 @.@

求天父賜下聰明智慧, 亦希望小慈生生性性勤力 D, 下學期考好 D 啦! 尤其係科中文呀~~~~~