病

有時真係對秋天又愛又恨!!  愛它秋高氣爽, 天朗氣清, 恨它由熱轉冷鼻敏感乞嚏咳一齊黎探你, 呢兩個星期小慈小明已經睇左 5 次醫生! 

11月1日 (Mon)

尋晚俾小明嚇親, 明明已經冇晒咳, 無端端發燒又流鼻水喊喊下仲嘔埋, 好早瞓, 瞓瞓下一咳竟然肚瀉, 成床都係..... 抱佢起身沖涼換床單一遍混亂之後仲燒到 39.9 度 @.@  好在食左退燒水全身標冷汗就退左燒, 不過都仲係體溫高! 

今日打電話預約睇醫生竟然 book 無可 book, 叫我放工時間去 walk in @.@  9 秒 9 帶小明出去, 點知小慈知我出去就即刻涼都唔沖話佢都好唔舒服, 仲即場咳左兩聲過我聽, 是但啦, 帶埋佢出去, 我都想問下醫生咩解究小慈輕瀉左一個星期?  小明喉嚨有紅, 少少發炎係導致高燒原因, 肺清, 初起感冒唔係太嚴重, 都開左 7 支藥水俾佢 @.@  小慈肚瀉醫生就好緊張, 話佢肚有風即刻要戒飲奶, 戒生果, 戒肥膩, 最好食兩日白粥清腸胃, 肚仔痛都 4 支藥水 @.@  好在而家小慈小明食藥合作, 記得佢地 bb 時我地要 3 個大人禁住餵藥....

11月3日 (Wed)

連續 4 晚, 弟弟 9:00 pm 食完藥瞓覺, 12:00 am 就會高燒到 40 度 (104 度)!!  係連續 4 晚呀!!  高燒不特止仲勁乞嚏 + 咳!!  即是上次醫生開既藥唔岩弟弟啦, 發晒 d 病徵出黎仲要燒得咁厲害 V__V  拿拿聲又帶弟弟睇醫生要求轉藥, 醫生好淡然話: 

"喉嚨紅囉, 開支抗生素幫下佢, 夜晚高燒係正常既, 唔係燒到抽筋都冇問題!" 

都係既, 連醫生都唔鎮定點做醫生?  不過我好怕 d 醫生成日嚇人, 我大肚個時俾政府醫生嚇唔少,  哼!  我相信弟弟係嚴重左, 如果唔係醫生都唔會開抗生素啦!  弟弟就黎 2 歲仔都係第一次食抗生素咋, 白色粉狀好難食!  於是弟弟好惡死, 態度好差, 問佢咩都話: 

"唔係呀~~~" 

"No 呀~~" 

"冇呀~~" 

好悔氣又成日大大聲擘大喉嚨嗌 

"我要水丫~~~~~~ " 

"我要三眼仔~~~  我要丫!"

燒緊個人好燥火, 可憐既小慈做左弟弟既出氣袋, 每次小慈同弟弟講野就 "NO!", 小慈摸佢錫佢, 弟弟仲乘機打小慈添!  太可惡喇!  病病大曬咩, 我見到係會照鬧, 不過為免惹起無謂既紛爭, 我都叫小慈唔好招惹弟弟住  

11月4日 (Thu)

今晚又 40 度, 點解食左抗生素都唔退架?!!!  叫醒弟弟食藥, 發緊高燒塊面又紅又熱成個煮熟蘋果咁, 弟弟發老脾勁掙扎死攬實張被被話: 

"我要瞓覺, I want to sleep 呀~~"

等佢喊完, 可能俾我抱住心情好 d, 竟然話:

"小慈呢?  小慈瞓覺喎, 媽媽係度, 爸爸係度, 我食 (完) medicine 要瞓覺呀!"

一個鐘頭後探熱去番 39.5 度, 都好, 有少少退燒跡象, 本來諗住一個鐘唔退燒就要食高燒藥水, 已經 2:20 am, 暫時冇野好做我終於都可以瞓.... 已經連續 4 晚係咁, 大人都就黎病架喇....

11月6日 (Sat)

欣慰是.....

小明終於 24 小時冇燒過, 由尋晚 9:00 pm 到今晚 9:00 pm, 小明都維持係 37 度呢個完美既數字上, 心情大靚成日都笑咪咪, 不過都仲係好黐身扭抱勁咳同埋唔係好肯飲奶.... 只要佢唔再發燒真係咩都冇所謂!  放下心頭大石, 第一次食抗生素就攪掂, 真係太令人感動

欣慰是.....

再一次證明工人姐姐真係好錫好錫小明, 我做媽媽既責無旁貸, 但姐姐比我還緊張就非常難得!  原來佢每晚差不多一個鐘頭就會幫弟弟量一次體溫, 我之所以知, 係前晚我聽到弟弟勁咳入房摸佢時發現佢又高燒但工人姐姐瞓左, 於是我抱起弟弟打算餵藥, 驚醒左姐姐, 佢話半個鐘前已經餵左弟弟食退燒藥 (我完全聽唔到!!)  攪到我非常內疚, 姐姐照顧得弟弟咁好岩岩瞓著又俾我整醒 @.@  連續 5 晚冇得瞓, 我已經又爆瘡又生飛滋勁大黑眼圈殘到飛起, 反而姐姐咩事都冇仲笑騎騎未見過佢黑面炆憎對弟弟發惡  

欣慰是.....

雖然小慈小明一齊病, 兩個都乞嚏鼻水咳, 意外地發現小慈識 '呻' 鼻涕, 我教左佢好多次都唔識, 教到我已經放棄左之際, 突然間佢又做到真係超級驚喜!

呢個星期好難捱, 人最緊要身體健康!!  小病是福~

弟弟酣睡中~~~~~ 殊~~~~~~~