遠近慈明: 小明 2 歲

11月 25日, 小明 2 歲~~~~~~

2 歲, 我覺得係大個仔! 12月1日就要返學, 唔可以再當佢係 BB, 雖然佢真係好 B 好可愛, 成日都攪笑又爆笑, 真係笑瓜我架!! 我從來都冇想像過仔會係咁, 又嗲我, 又黐我, 佢近來既口頭蟬係 "媽媽拖住我! 我鍾意媽媽拖住!" 霖死媽媽 ~

星期日係迪士尼玩到咁盡, 呢幾晚半夜都聽到佢突然大叫:

"媽媽~~~ 媽媽, 我安靜喇!!!"

半夜咁大聲真係俾佢嚇到彈起!! 正掙扎起身睇佢時, 又冇晒聲, 原來佢係發開口夢已經瞓番 @.@ 發夢都喊住叫安靜, 大家可想而知平時佢喊扭計, 我地係唔會睬佢直至收聲安靜為止! 有時喊得耐, 佢都會覺得自己好可憐, 於是入房攬住自己張被被自我安慰~ 佢真係好鍾意自己張被被, 恐怕返學都要俾佢帶住係身邊!

認知語言方面 --

小明識數中英文 1-10, 11 之後就開始亂黎, 認到大部份既形狀同顏色, pink, light blue, dark blue 都識, 又識叫自己 "郭恩明" "2 歲" "住沙田", 識晒眼耳口鼻眼眉毛等身體部位名稱, 識叫晒全家族既稱謂, 姑媽姑丈叫得好準, 基本上, 小明既發音係準既, 講野清楚又長氣, 外人聽得明白唔駛翻譯

唱歌呢個月突飛猛進! 音準, 有歌詞, 首本名曲係 ABC song, Do Re Mi, London bridge is falling down, Twinkle Twinkle little star, O McDonald, 小慈教佢唱 "圍個大圓圈", 仲有聽聽埋埋竟然識唱 Dona Nobis Pacem!!! 非常有自己主見, 話唔飲奶奶就一啖都唔飲, 轉頭同我講 "我要飲可樂!" 我唔俾, 小明會轉非常溫柔低聲下氣既口敏再講多次: "我想要可樂麻..." 好鬼委屈咁架, 我都係唔俾佢就識轉移我視線, 指住電視話: "爆炸! 驚驚呀!!" 然後逃之夭夭

又識要求, "我要羊奶片! 我要 oreo! 想我唱歌俾佢聽就會講 "媽媽你唱啦!" 仲識點歌, 我唱唔岩佢既心水會話我 "唔係咁!"

非常怕吱, 笑到飛起時我問佢投唔投降?! 小明係會答 "唔投降!!" 小慈問佢 "Are you a boy?" 小明答: "Yes, I'm a boy! I'm a Good Boy!" 佢真係明架!!

尋晚仲俾佢笑死, 小慈唔知話我咩我咋喊扮扭計, 弟弟突然叫: "你安靜未呀?" 驚魂甫定之後我就爆笑 XDDDD 學晒我! 又無端端攞左工人姐姐個買餸袋話自己 go market, 我問佢買咩呀? 弟弟話要 banana, 我叫佢俾錢, 弟弟竟然放隻手板係我度話: "嘟~~" 佢知八達通係錢呀!!

自理能力方面 --

咩都要 "我自己!" 自己擦牙 (其實係食牙膏), 梳頭, 著衫 (幾熱都要著 Thomas 風褸, 佢最鍾意呢件衫), 除鞋除襪, 扭開奶樽蓋, 用叉匙, 指示我湯碗 "擺呢度!" 跟手非常豪氣地棄匙雙手捧湯, 飲到成個張飛咁!! 手腳靈活, 識爬上爬落大床, 爬電視櫃, 雙腳離地 jump, 鍾意跳梳化, 搬 cushion 玩障礙賽, 企高睇風景, 自己打開大膠箱蓋再呢入去話玩波波池! 所有 2 歲既玩具都識玩, 好多動物都識不過答英文居多, eg: kangaroo, eagle. 對比詞識熱 / 凍, fast / slow, big / small, 開心 / 喊喊, 乖 / 曳, 好大聲 / 細細聲, 大力 d / 細細力, 攪笑地同小慈一樣唔識分 lion and tiger XDDD

禮貌方面 --

小明好乖, 出街識叫人有打招呼, 屋企既野都知道放邊度, 不過玩完要我地三催四請先會收拾, 嘆慢板你急佢唔急, 最鍾意洗手, 對手有少少污漕都會 "依~~~" 跟手就抹落自己件衫度 or 抹落枱面! 明知故犯, 叫左佢唔好收埋 d 野入櫃, 佢會扮聽唔到, 真係好鬼激氣!!! 但佢又知自己衰咩會同你 say sorry, 幫佢做左 d 野 or 俾野佢, 問佢點講呀? 小明會識答: "唔該, 多謝, thank you!" 咩都出齊, 有同理心, 跌左公仔會 say sorry 都會錫番公仔 ^8^

見到我同爸爸攬住會大喊, 扯開爸爸攬住我既手指, 同佢講道理話媽媽都錫爸爸, 爸爸好錫弟弟, 叫弟弟攬爸爸先, 小明會鬥氣大聲叫 NO 唔制! 好硬頸 @.@ 我俾佢自己企係度冷靜一陣, 再同佢講多次唔攬爸爸, 爸爸好傷心 (撞手臀叫爸爸扮喊), 小明都會就範~ 佢乖過當年既小慈啦, 小慈個時難攪好多倍!

今日正日雖然冇大型生日派對, 但我地全家都請左一日假陪小明弟弟過生日, 最開心個個係小慈家姐, 由星期一向班主任請假開始, 小慈已經周圍話俾人聽佢星期四唔返學, 老師笑佢弟弟生日點會關小慈事呢? 其實我地約左去影樓影全家幅所以趕唔切返學, 只此一次, 下不違例 :P

2 歲既弟弟今日見到全家都係屋企非常得戚開心

換件靚衫仔出發去影靚相喇

今日扮馬騮仔

影樓位於柴灣, 車程遙遠, 不過兩姐弟心情靚靚

小慈家姐吻賀壽星仔

爽呀~~~~~~~~

到影樓喇! 日曆記低呢個好日子!

揀呢間影樓因為全港得佢買左 Thomas & Friends license, 諗住弟弟鍾意 Thomas 會影得開心 d, 點知遇著上次幫小慈影相非常奄尖既攝影師 @.@ 左 dd 右 dd 前 dd 擺到大家硬晒都未影到!! 上次小慈影到發脾氣大喊要腰斬架, 今次弟弟冇喊但亦都冇咩點笑...... V____V 影左個幾鐘收工!! Total 360 張相揀剩 23 張, 我地唔係忍得手, 而係真係影得麻麻, 仲要聖誕先有相底俾番, 1 月中先有相簿, 真係等到頸都長 @.@ 我偷影電腦螢幕望梅止渴, 呢度就係我地揀既 23 張相!