2020 開學日

教育局因應疫情, 宣佈學校可自行決定開學日期但不能提供面授課程, 於是學校決定 9 月 1 日學生分時段回校領取學習材料, 9 月 2 日起就按時間表以視像形式授課.  於是, 當大部分學校今日舉行網上開學日之際, 小慈小明可以著校服返學校, 小慈返 9:00 am, 弟弟返 10:00 am, 唔想佢地任何一個孤單, 媽媽專登攞大假陪佢地一齊開學 ^^

小慈話佢等左兩年, 終於都可以再一次同弟弟一齊返學放學!!  小慈真係好 sweet 好 sweet, 好錫弟弟, 由細錫到大!  爸爸媽媽真係好安慰你地咁好感情!  為你地感恩!

送小慈家姐返學先, 要等佢 45 分鐘, 我同弟弟去嘆個靚早餐!  呢間冰廳我想試好耐架喇

2 人限聚令, 我同弟弟坐呢個卡位岩岩好!  沙茶牛肉通心粉好好味, 滑蛋超級滑, 弟弟食得非常開心!

Form 1 仔非常滿意套校服, 今日講左好多次有人陪住返學真係好, 媽媽至錫你地啦!

第一次著住中學校服返學, 懷住少少緊張既心情行入呢個門口, 弟弟已經係一個中學生喇~

對上一次仲係著住小學校服黎考分班試, 事隔兩個月弟弟好似大個左好多咁

時間岩岩好, 弟弟返學就到小慈家姐放學了, 一出門就見到媽媽笑到見牙唔見眼!  小慈攞住大包小包, 全部都係校簿呀, folder 呀, 作文紙呀咁... 攞住咁重就唔去遠了,  附近最近既一間餐廳坐低等弟弟.  小慈話想飲凍野, 一杯凍飲 $15 我不如叫個餐抵 D, 不過岩岩先食完早餐既我真係食唔落, 質小慈食晒 :DDDD  疫情期間小慈已經重左 6 kg, 同我一樣高了!

同柏苗一齊步出學校門口, 呢位好兄弟由細玩到大, 而家同班之餘仲連學號都連埋做前後位, 成件事都好奇妙呀!!  一個暑假柏苗高大威猛非常, 高弟弟成個頭好似大師兄同小師弟咁, 唔怕, 弟弟你一定後來居上架!

對上次開學日可以送到去學校門口已經係 2015 (5) 年前既事, 小慈 4 年級弟弟 2 年級, 好趣緻呀佢地 :D   如果可以, 每年既 9 月 1 日媽媽都想陪你地一齊開學支持下你地! 

 9 月 2 日, 一齊 google meet 即刻遇上技術上既困難, 屋企電腦冇鏡頭用電話上足咁多個鐘堂係會 c 的..... 未落堂小慈已經通知 IT 部爸爸要買器材, 爸爸不敢怠慢即刻飛車出去買,  行左好多間先買到, 疫情期間個個都 WFH / online class, 電腦需求非常大!  兩位少主對新鏡頭非常滿意 ^^

弟弟的同學們

小慈的兩位班主任.... 非常曳, 班主任課時竟然可以唔開鏡頭

努力讀書, 作個榮耀天父的好學生!  加油!