慢慢回復正常

停工停課到復工復課, 再唔似得之前咁嚴謹話要 0 確診 28 日先 ok, 而家有幾日回復單位數已經係豐功偉績!  明既, 停得太耐好多行業已經捱唔住, 疫情反覆, 爆完第 3 波已經預左有第 4 波第 5 波, 戴口罩出入經已成為常態, 係新既生活模式, 有 D 確診者病毒測試發現含菌量低, 原來已經係中左再好番先發現, 真係防不勝防!  自己要繼續小心防疫, 一有唔舒服就要盡快去睇醫生

小慈小明既補習班 / 興趣班已經陸續恢復, 都好既, 網上教學真係成果有限, 特別係數學, 有老師即場批改教導係唔同 D, 今晚上完堂同我講終於明白晒, 仲餓到七彩要去食宵夜

I have a 麥樂雞, I have a 薯條.... AH!  蘑菇薯條 :DDDD

跳繩班當然要面授啦!  今次呢位姐姐教練非常有鼓勵性, 做岩動作係會跳起仲開心過你既!  Good teacher ^^

夜晚 11:30 pm, 有位小朋友敲我地房門, 原來忍受唔到隻牙鬆界到條脷, 自己幫自己剝牙 @.@

明明睇過佢隻牙有排都未甩, 點估到弟弟一晚就剝左佢!  事出突然屋企冇雪糕, 我淨係俾左粒冰佢食要佢瞓先, 第二日先去補倉!  超市買兩盒雪糕有特價, 我睇中盒奶茶味, 弟弟想要朱古力咪好地地, 點知佢又三心兩意想食埋士多啤梨, 於是一不做二不休既我買埋盒綠茶, 一人一盒唔駛爭!  弟弟話佢兩盒都要食, 我問佢係咪鍾意士多古力?  佢答我鍾意朱古啤梨 :DDDDD

疫情期間真係好為食, 我同爸爸力保不失, 有節制減食不升反跌, 我仲有 2 kg 就減肥成功架喇!!!  

今日忽發奇想幫 Jimmy 磅重, 唔磅唔知 Jimmy 原來有 0.9 kg = 2 磅呀!!!!  淨係個殼都有我成隻手板咁長, 真係唔講得笑~

隨住政府慢慢放寬社交距離, 大家繼續萬事小心, 唔好鬆懈呀!!  祝福大家!