中一恢復面授課程

一個疫情真係學識左好多生字名詞, 而家講返學係唔清楚架, 要講明係上 "實體課" 定係 "網上學習", 返學可以, 但唔可以進行 "面授課程", 即唔可以面對面教書要上網用 "Zoom, Google meet, Google classroom"!  有 D 同學仔屋企唔可以進行網上學習都可以返學校係課室/禮堂上網上堂, 弟弟都返左幾次學校取物資/測驗/考公開試/見班主任.... 終於, 教局宣佈分兩階段恢復半日面授課堂, 先係中小學一五六年級 9 月 23 日返, 其餘年級就 9 月 29 日~

中一小一呢批新入學既學生要盡早適應新階段投入學習, 9.23 齊齊返學校, 媽媽都請左假陪太子讀書 :)

已經去左幾次書局/校服商取書取校服, 最後一次同埋小慈家姐去因為呢個疫情佢肥左又高左, 原本條校服裙已經放左腳但佢爆鈕要買過條新既, 咁梗係帶埋佢去度身穩陣啦!  順便行街買野, 小慈突然要求買個新書包俾弟弟, 話中一既時候我買左個書包俾佢 (六年級時仲用緊轆轆書包), 而家弟弟中一都應該買一個俾佢先公平!  但我話弟弟已經有好幾個書包喇喎, 小慈又話個 D 太細真係裝唔晒, 要信佢咁話..... 見你咁為弟弟著想, 愛弟情切, 又俾我地搵到個萬用袋王做特價平一半就買啦!  弟弟當然喜出望外 XD

係唔係好有型呀?  自動插褲袋, 黑色書包好襯佢, 即刻大個仔好多咁呀!

巴士班次唔岩今日搭小巴返學, 落車弟弟好自然地拖住我, 

我問佢: 如果見到同學仔, 你會唔會即刻 fing 開我隻手架?

弟弟: 梗係唔會啦, 媽媽送返學不知幾開心!

我: 唔怕俾人笑你咩?

弟弟: 佢地都有媽媽自己唔拖之麻!  又唔係日日都有媽媽送返學....

弟弟, 媽媽好開心呀!  雖然我都有心理準備青春期時你會有轉變, 你肯拖我, 我對手隨時隨地都歡迎你架!  Welcome 呀 welcome!

知道你有少少緊張仍大步走入校門, 望住你既背影媽媽真係好欣賞你 (一絲閃過幼稚園時你 bye bye 媽媽個爆喊樣....)  大個仔唔同晒啦!  你做得好好, 對自己有信心一定得! 

雖然係返半日, 點知放學等好耐都等唔到小巴要改搭巴士成 2:30 pm 先返到屋企!!  又熱又攰又肚餓, 但弟弟竟然係個書包度神神秘秘攞包撈麵出黎送俾小慈家姐!!  弟弟話知道小慈家姐未有得返學又知佢鍾意食所以專登買, 等車時好肚餓忍唔住自己食左幾條 :P   幫我攞可樂又好乖咁倒落靚杯又加晒冰, 仲要恭恭敬敬笑容可掬咁攞俾我!  嘩~  咩事呢個 Form 1 仔乖得咁緊咁得人鍾意既?  見你咁乖請你下午茶去食薯條啦!

又煮你最鍾意食既餸菜, 用靚碟裝住 :)

弟弟分享佢第一日面授課程既趣事:

班主任 Miss Cham:

同學你做咩呀?  咁靚既 Miss Cham 你唔望係度望個櫃筒?  櫃筒有 D 咩係美麗過 Miss Cham 架?  攞出黎睇下?  (原來係一支筆)

History 老師:

終於都見到你地個樣喇, 平時個個都唔開 cam, 原來 XXX 係咁既樣, hello~~

中史老師:

知唔知我地一個星期有幾多堂中史堂呀?  係兩堂呀!  知唔知要讀幾多年歷史呀?  係二千年呀!  本書有幾厚呀?  要讀幾多年先讀得晒呀?  唔駛驚, 我已經預備左精華 notes 俾你地架喇!

English Teacher:  Take out your listening book, it is a dinosaur (book cover).

Students:  No, it is a bird! 

English Teacher:  No!  It is a dinosaur!  It is a lizard!

訓導主任 Mr Lee:

昨日同學回校考 TOEFL, Mr Lee 好開心, 冇同學瞓覺呀!  考 3 個鐘頭試都咁精神, Form 1 真係唔同 D! 

返學真係開心好多!   :DDDDDDDDDDDD