7月 7日中一放榜, 由爸爸破天荒送兩姐弟返學, 新聞都話今年 9 成派到頭 3 志願, 都幾有信心弟弟會同小慈家姐同一間中學, 好快就會知結果!
真係第一志願呀!! 多謝天父! 弟弟話佢係學校等班主任派派位紙時真係勁驚, 尋晚仲發惡夢俾狗追又被蛇咬, 好陰公, 而家唔駛再發惡夢了!!! 一天光晒!!
食餐好既慶祝下, 去弟弟夢寐以求既烤肉放題, 星期一至四平好多仲要第二位半價, 正呀! 慶祝得好及時, 不過小慈家姐高過 150 cm 收大人價就有 D 唔抵, 質佢食多 D 先
任點任食呀喂! 枱面有 5 張 order 紙我地全部用晒 :p
恭喜你呀, 弟弟! 呢盆牛肉私人醒你既, 唔係講笑, 真係食得晒呀!
大個仔自己燒俾自己食, 舉手問人要多兩隻夾
牛肋骨湯超級好飲, 兩父子呢張相太溫馨感人 ^^
牛油粟米超正弟弟食左 3 盆, 牛油菇就俾小慈食晒, 4 碌熱爆腸仔係我既, 正!
小慈發現燒煙肉原來勁好食, 燒到硬硬地脆脆地 D 油係塊肉面上跳跳下, 食左十幾廿塊, 呢餐食得超開心!
乾雪糕!! 恭喜弟弟入到第一志願!! 同小慈家姐齊上齊落多 4 年 :D
7月 9日註冊日, 順便早 D 出門口送埋小慈家姐返學校考試, 馬鐵幾個站就到非常方便
當年今日一齊高舉第一志願派位證, 感謝天父看顧, 一樣的藍天白雲 ^^
兩位幼稚園, 小學 & 中學同學
Form 1 仔請去禮堂註冊, 弟弟係咁話間學校好大呀
弟弟嘩左一聲, 禮堂大過小學多多聲
註冊時要自己揀一本學校借既中文書做讀書報告, 弟弟揀左本偵探小說仲即時閱讀, 超乖
新款體育衫, 小慈非常期望弟弟係綠社
訂校服要度高度腰圍, 連鞋弟弟高 147 cm, 腰圍 27吋!! 月巴明
小慈為弟弟隆重介紹小賣部咖哩魚蛋仲有撈麵, 又平又好食
學校既青蛙池有小橋流水
仲有好多蚊
唔駛一個鐘就完成所有註冊程序, 對於成個 8 月都要上 bridging program 弟弟冇異議, 畢竟放左幾個月疫情假, 真係要追番 D 進度
中學課本真係好貴, 弟弟肯用小慈家姐既舊書幫手慳左 $1228, 佢話係 6 個 MVP+ 喎
期待你地再次一齊返學放學的日子!
沒有留言:
張貼留言