畢業相

學校原定延長一個星期 7月25日先開始放暑假, 多出既一個星期就俾六年級打防疫針, 處理班務, 影畢業相等, 可惜人算不如天算, 一個第三波所有學校提早 7月13日放暑假, 預定既所有野都取消晒冇得做!

小明原來非常渴望著畢業袍影畢業相, 於是我打電話返學校問攝影公司資料, 可唔可以攞件袍出去影?  點知學校話佢地係冇袍既, 以往都係借用攝影公司既道具係禮堂影相, 攝影公司仲要連影樓都冇, 鼓勵我地出去其他公司影..... 真係估唔到, 上次謝師宴同校長深情對話時應該問下校長點解學校冇畢業袍先岩 V__V

想起教會智賢同小明一齊升中, 佢岩岩先影完畢業相唔知可唔可以借佢件袍呢?  嘉良叔叔一口應承!!  佢地學校件袍仲可以外借到 8 月中先還番俾學校, 可以借我地一個星期呀!  真係太好喇!

趁陽光普照, 我地上天台影靚相

藍天白雲又有山景, 幾靚 :DD

弟弟既目標 -- 高過爸爸!!

 小慈家姐都攞埋佢隻畢業公仔一齊影

我戴四方帽畢業喇, YEAH!!!

事不宜遲, 第三波疫情越趨嚴重日日都過百宗破紀錄, 政府仲研究緊禁足令關閉商場, 嗱嗱聲出去剪頭髮影畢業相先~

弟弟好靚仔啊~~  媽媽心心眼中 ^^

大個仔喇!  期待你大學畢業 :)

天父真係好愛你, 你心所想既, 所渴求既, 都為你成就!

You Did It!!  Well Done!!