好行為

6 歲既郭恩明, 一上小學就「露底」, 唔專心啦, 多嘴啦, 坐唔定啦, 求其啦, 行古惑啦..... 明明幼稚園既時候好乖, 好醒目, 好精靈, 點解而家好似正經唔到, 成日都要人勞氣勞氣勞氣.....

幸好, 呢隻郭小明受軟唔受硬, 鼓勵下佢呀, 讚下佢通常都會乖俾你睇 ^^  放學返到屋企, 如果俾老師讚過, 佢一定會第一時間打電話俾我匯報, 呢幾日就日日都有乖野噃~

學緊 School Rules, 自己畫 sign, 老師俾左隻 A- 加送獎勵券, 佢勁開心

畫畫一直係佢既弱項, 有時見佢係學校派番 D 作品返黎都幾慘不忍睹, 視藝科老師仲勸佢去上畫班添!  我就同佢講, 畫公仔畫大隻 D, 油顏色唔好出界就唔會太差架喇.  點知, 今次有驚喜喎!  上堂畫蛇, 弟弟話老師讚佢, 俾左 85 佢, 仲話全班最高都只係得 85 分添!  最高分喎, 仲要係個人獲得史無前例咁高分 ^^  又真係好唔錯, 條響尾蛇好逼真!  呢位小朋友, 諗住佢唔得時佢又得俾你睇  :)

學校推行家中也自理計劃, 要小朋友定下目標幫忙做家務, 由家長每月評分.  小明既目標係保持書桌清潔, 咁佢目標咁低又達標, 我咪俾高分 D 羅!

小明同我講: 「媽媽, 好多謝你呀!  你俾我咁高分, 老師獎我獎勵券, 仲送左張恐龍書籤俾我, 勁得意我好鍾意呀!  非常多謝你, 媽媽!」

開心到不得了!  可能老師都睇通左小明要用氹呢種方法, 鼓勵佢做好行為呀!

近來成日俾我笑佢起身 D 頭髮飛起晒, 今日最嚴重, 成個頭好似八爪魚咁, 上下左右叉晒出黎同人揮手呀?  後來小慈話俾我聽, 弟弟一返到學校就衝入廁所洗頭, 將條八爪魚掃走左!!  哈哈哈哈!!

小明上報紙  >v<  (純屬攪笑)

弟弟, 你做得到架!  你知咩係乖, 你識分辨, 你有能力一定做到乖孩子架!