望住個海搭升降機一樂也, 困 lift 都抵 >v<
以前舊差館就係用炮台黎捍衛大澳
早餐時間~ 我地今日既任務就係 食 食 食 ^^
package 真係好, 又包 2 set 早餐
幾豐富
食飽飽, 我地參加左酒店既導賞團, 呢位 Martin 為我地介紹大澳, 佢唔係原居民不過好愛大澳呢個地方, 搬入黎住之餘仲開左呢間舖頭
第一站, Martin 帶我地黎呢度買大澳最出名既糯米糍, 伯伯佢地每日凌晨 2:00 就起身開工架喇
第二站閒逛市集, 大澳最熱鬧個條街叫吉慶街, 好多野食
第三站, 除左電動既藍色吊橋, Martin 帶我地行埋大澳另一條紅色吊橋, 手動既, 係全大澳睇棚屋景色最靚既位置
紅吊橋維修保養中, 其實大澳既船冇咁高大唔需要用到吊橋, 起吊橋既目的係俾神明坐船經過時神明既頭殼頂唔可以有野, 於是條橋要打開俾佢經過所以先要起
經過特色舖頭, 兩位小朋友忍唔住買玩具玩, 唔大隻個隻貝殼都唔揀
第四站, Martin 帶我地入棚屋探王伯伯一家人
棚屋真係好特別, 所有既支柱係用昆甸木建成, 昆甸木既好處係越浸水越堅硬, 所以昆甸木好貴, 一條都過百元, 起一間棚屋都要幾十萬!!
王伯伯好好客, 招呼我地飲茶坐下睇下風景, 呢套茶壺好經典, d 茶仲好好飲
棚屋一間連住一間, 昆甸木唔怕水但怕火, 所以上次大澳大火一燒不可收拾, 之後到處都見到滅火筒, 屋入面仲有消防喉
睇完咁多, 我地絕對發覺棚屋唔好住
最後, Martin 帶我地去買蝦醬, 呢間勝利香蝦廠既蝦醬香得黎並唔咸, very very good!
蝦醬用銀蝦仔黎做, 可惜唔知咩原因, 大澳一夜間所有銀蝦冇晒, 而家要係大陸入口銀蝦再自己加工, 除左整一桶桶既蝦醬, 仲有呢 d 一磚磚既蝦膏
酒店 check out 之後, 我地決定去掃街!!!! 周圍都係燴魷魚, 唔食對唔住自己 :)
呢檔炭燒雞蛋仔備受推崇, 遠遠已經見到條人龍, 外脆內軟, 真係好好好好食呀
肥叔叔係一底一底咁整, 每底大約需時 2-3 分鐘, 肥叔叔話其實快過電爐
$25 / 一碗辣酒煮花螺, 秋秋八到原來要落埋花椒先更加惹味
呢檔蝦豬餅又係大澳名店, 飲恨地我影完張相諗住一陣等佢 1:00 pm 開門時返轉頭試, 點知行行下就唔記得左..... 嗚~ I will be back.... in years :p
作為漁村, 魚既製品真係多到不得了, 我同秋秋試左咖哩魚肚, 另外, 大澳有自己既水塘, 用呢 d 水整既豆腐花真係唔同味, 滑到不得了, 我食左成桶都仲想再食! 好好味!!!
仲有呢 d 超大粒魚蛋又係好好味, 魚蛋有魚味, 仲非常彈牙, 讚!!!!
手信除左買蝦醬, 咸檸檬, 糯米糍, 我地仲買左呢 d 手製蛋卷, 小慈好鍾意食
回程既時間實在太長, 令我地不敢久留, 掃完街就走
出到東涌, 俾兩姐弟發現呢個地面噴泉, 正在研究幾時衝過去濕身最少
呢位小明 B 見到水係完全忘形既
跑到連海膽頭都出埋
小朋友, 簡單就是開心
大澳之旅完滿結束, 眼界大開, 令我最開心既部份都係見到中華白海豚! 不過佢地數量少左好多, 我地又成日咁樣出海睇佢地令佢地置身危險當中, 但佢地又真係好得意好想望實佢地, 心情好矛盾呀!
沒有留言:
張貼留言