漢堡包糖的故事

小明係一個好有主見既小朋友, 每晚臨瞓前已經決定第二朝要食咩早餐, 薯餅 / 烚蛋 / 三文治 / 蜜糖星星 / 威化餅等等, 唔會 repeat 架, 唔講都唔知原來佢對食咁有要求!  接放學既時候又會吩咐我帶 d 咩零食...

弟: "媽媽, 一陣間你黎接我呢, 我想食漢堡包糖呀"
我: "邊度有漢堡包糖呀?"
弟: "咪就係屋企個糖果盒羅"
我: "有 d 咁既野咩?"
弟: "有架, 你帶一粒俾我得架喇"

當我返到屋企, 反轉左張枱都搵唔到!  正考慮緊係咪要去買但其實我又唔 like 買糖之際, 小慈放學返黎換衫跌左粒漢堡包糖出黎

我: "小慈, 你呢粒漢堡包糖可唔可一陣俾弟弟放學食呀?"
慈: "可以呀!"
我: "真係太好喇!  原先弟弟仲叫我係糖果盒羅俾佢, 原來一早已經食晒, 咁你有我就唔駛買喇, yeah!  係唔係同學仔送俾你食架?"
慈: "唔係呀, 係老師送架!  我地合唱團上次音樂節比賽羅左亞軍, 老師好開心每人送 5 張獎勵券同埋呢粒糖羅"

我當堂好慚愧, 太衝動喇我: "下?  咁珍貴既野我唔俾弟弟喇, 我同佢講食晒就算, 呢粒漢堡包糖係你努力得番黎既獎勵, 應該留番俾你呀"

慈: "唔駛啦, 媽媽!  如果你話俾其他人我就會唔俾, 你話俾弟弟就梗係可以啦!"
我: "女女, 你真係好乖好乖!!!"  錫佢一大啖  ^8^

接放學, 小明第一時間問我羅糖

我: "弟弟, 你知唔知呢粒糖點黎架?"
弟: "糖果盒羅"
我: "唔係啦, 糖果盒個 d 一早食晒啦!  呢粒糖係由一個人送俾你既, 你估係邊個?"
弟: "蛋叔叔?  菜姨姨?"
我: "係家人黎既"
弟: "爸爸買架?"
我: "唔係買既"
弟: "小慈家姐?"

岩左!  於是我將呢個漢堡包糖既故事講左俾佢聽, 你個家姐真係錫到你不得了!  連最珍貴既野都願意送俾你!  於是, 弟弟有呢個表情~

好在弟弟都識感恩, 嗒呢粒糖既時間, 逐片逐片咁食, 嗒左好耐 ^^

要更加錫小慈家姐呀!!!!