識得笑其實好好笑

弟弟係一個非常精靈, 好醒目, 反應好快既人, 我好鍾意同佢傾偈, 佢有時出其不意咁爆一兩句說話出黎真係笑到我反肚 >v<  趁我呢個大矇媽媽未失憶之前寫低佢先~

(1)
兩姐弟都好鍾意食煎太陽蛋, 把握機會教小慈, 太陽蛋英文係 sunshine egg, 烚蛋係 boiled egg, 炒蛋係 stir fried egg, 蛋白叫 egg white, 蛋黃....  弟弟大叫 EGG YELLOW!!

(2)
食晚飯, 弟弟遙指: "我想食個 d 白色西蘭花"
......... 其實個 d 係椰菜花啦~

(3)
小明問: "咩味最好味呀, 媽媽?"
我: "甜味?"
小明: "人情味最好味呀!"
我: "係咪真係咁解架?"

(4)
弟弟好鍾意佢自己張被仔, 今日好早就自己碌上床瞓, 我埋去裝下佢, 佢答: "我真係眼瞓, 唔係咋弟架!  我無時無刻都要帶住我張被被架!"  咩叫咋弟又識, 連無時無刻都識用, 厲害厲害!

(5)
教英文, 消防員 fireman, 醫生 doctor, 老師 teacher, 警察 policeman, 好叻喎!  咁女警察呢?  弟弟好大聲答: POLICE MADAM!!!

(6)
晚飯中, 小慈: "媽媽, 今日咩湯呀?"
我飲左一啖, "似係無花果喎!"
弟弟: "好似係蘋果雪梨呀!  What soup is that, Vicky 姐姐?"
Vicky: "Apple Pear Soup"
 我: "勁喎, 弟弟!"
弟弟: "雖然我個鼻塞左, 但我條脷冇事所以飲得出!"

(7)
教小慈家姐做功課時最鍾意加嘴, 我教 shirt, 弟弟會問: "做咩教小慈家姐壞人 Zerg 呀?"  教時間, 8:00am 返學 3:00pm 放學用左幾多小時呀?  小慈答: " 7 小時"  弟弟: "7 小慈????  用左 7 個小慈??"

(8)
平時朝早送完小慈家姐上校車返學我就返工, 今日放假我就返番屋企, 諗住弟弟未瞓醒我就入房整 d 野, 突然間, 弟弟企係房門口......

我: "早晨, 弟弟!  你點知我係屋企既?"
弟: "我聽到你流鼻水「雪」一聲咪知係你羅!"
我 (大笑):  "咁你都認到??!!!"
弟: "係呀, 你地個個都唔同聲架!  爸爸低音 d 「葛」, 小慈家姐同我把聲差唔多"
我: "好野, 好野!  佩服, 佩服!"
弟: "媽媽, 你係咪唔駛返工呀?  可唔可以送我返學呀?"
我: "唔係姐姐送你咩?" (我其實係預左送佢不過想睇下佢咩反應 >v<)
弟: "唔係呀!  我想你送我呀咁難得!"
我: :"好啦, 你連難得都識就送你啦!"

沿途見到咩就講下, 弟弟問點解有咁多人排隊?
我: "巴士站黎架, d 人排隊等搭巴士返工羅!  媽媽平時都係咁啦, 不過今日放假之麻!"
弟: "如果巴士站有 fast pass 佢地咪唔駛排得咁辛苦羅!"
我: "你估迪士尼咩?  不過呢個都係一個好主意!"  ^^

(9)
每晚臨瞓前講聖經故事, 今晚講到聖誕節耶穌出世, 我講題外話, 耶穌係神既兒子, 我相信佢應該由細到大都係一個好乖好乖既小朋友, 食飽瞓瞓飽食, 好聽話仲可能會成日笑, 應該好好湊!  弟弟反應奇快: "媽媽, 你唔可以咁講架!  你唔可以講主耶穌壞話話佢「好臭」架!!!"

(10)
臨瞓前都會祈禱, 由初初要弟弟領禱時佢只係識講: "親愛既天父, 多謝祢俾我地有咁好既一日", 到而家會要求自己祈晒成個禱, 佢今日係咁講既:

"親愛既天父, 多謝你俾我有智慧, 我返學返得好開心, 我今日上左普通話堂, 我已經有智慧聽得明老師講既野, 求祢繼續保守我.  我有 d 咳又有乞嚏又有好多痰, 唔食得芒果, 我好想食芒果, 求天父祢俾我快 d 好番可以同爸爸一齊食芒果!  爸爸媽媽聽日都要返工, 求祢俾佢地返工都有智慧.  小慈家姐同我而家都要瞓覺喇, 求祢派天使黎我地屋企保護我地, 叫我地一覺瞓天光, 就算要發夢都要發 d 好夢唔好發 d 壞夢, 俾我地聽日精精神神健健康康咁返學, 多謝祢聽我地既祈禱, 奉主耶穌基督聖名祈求, 阿門!"

係小明心目中, d 野唔係好既就係壞既, 所以佢個 d 叫壞夢而唔係惡夢 ><  仲有, 我都係第一次聽到人為一個芒果而祈禱, 真係忍唔住笑左出黎  ^o^

(11)
睇緊天氣報告話會落雨, 我就教落好細雨可以叫微微雨, 落雨落得好勁就叫暴雨, 天文台仲分黃雨紅雨黑雨.  出大太陽好曬你又唔呢埋就叫暴曬, 弟弟搶答: "可以叫陽光好猛烈!" 勁喎, 好猛烈都識!  大風又係, 好大風可以叫暴風, 有個暴字個 d 都係好勁好強好嚴重咁既意思.... 於是弟弟一臉天真咁問我: "暴龍係咪就係因為佢步行得好用力呀?"  哈哈哈哈

(12)
爸爸唔覺意撞到我, 我大聲呼叫 "喂! 做咩摸我 pat pat!!"  爸爸都未答弟弟就搶答: "佢係你老公黎架! 咁介意!"  衰得佢仲搖搖頭  @.@

I Love my Son ^^