事實證明小慈真係好錫好錫弟弟!! 尋日帶完小慈去冒險樂園玩, 返屋企已經第一時間報告俾弟弟聽玩得好開心, 弟弟聽到就即刻問幾時輪到佢? 小慈家姐非常豪爽地應承弟弟聽日完左崇拜去啦好唔好? 弟弟梗係話好架, 仲問埋要去餵白鴿添!
今朝, 小慈竟然再一次提我地完左崇拜要帶弟弟去冒險樂園! 嘩~~ 佢講真架! 仲出到 "求下你啦~~" 呢招!! 於是, 睇在小慈咁愛弟弟份上, 佢地今日團契又表現良好就 encore 啦!
實在唔係太識玩呢個遊戲...... 唔係人人有書讀既咩? 唔係應該間間學校都係好既咩? 點解會怕 "萬一" 攪珠攪得差要撲學校? 點解要咁辛苦整 portfolio? 點解要學呢樣學個樣怕唔夠競爭力? 仲要小朋友面對面試壓力, 又要考串字又要考數學, 英語會話仲有普通話?
我唔算係隨波逐流既家長, 但, 做一個另類既人有時係需要勇氣同膽量, 人人都識係得你個女唔識, 當個個小朋友都沙紙成尺厚, 係唔係可以瀟洒地話唔緊要我冇所謂先? 多多少少都會有 d 影響啦! 做阿媽既都會有壓力, 不過我真係比較懶, 亦實在係冇咁多時間同金錢去換取成尺厚既沙紙, 再加上恩慈小姐好有性格, 唔係任你舞好順服個隻小朋友, 佢唔鍾意既野真係勉強唔到佢架! 所以, 咁羅....
機緣巧合之下同一個家長傾計認識到音樂小學呢間學校, 參加完佢既家長簡介會之後, 我同秋秋簡直愛上左呢間環境優美, 校長幽默自信既學校! 於是, 膽粗粗又捱更抵夜咁學人整左一本 portfolio 申請面試, 今日就係面試既日子, 知道面試過程要小朋友同家長分開, 6 - 7 人一組跟老師玩遊戲, 唱歌, 傾計, 家長都要面見老師!!
其實我地都好怕面試, 特別係小慈, 一聽到小朋友要同家長分開面見我地個心已經冷左一截, 好怕小慈狂喊啊 @.@ 於是, 係面試之前, 我地已經帶小慈參觀過呢間學校, 小慈又出奇地鍾意呢間學校, 話間學校好靚, 成日都有音樂聽表現開心! 小慈幼稚園班主任亦有同佢傾過偈, 同學仔又有同佢打氣鼓勵佢勇敢 d 同媽媽分開唔喊! 真係萬事俱備架喇......
由出屋企門口到學校登記, 小慈都表現開心又話自己好心急想快 d 面試, 點知到老師叫名請小朋友出去排隊入課室佢就喊, 仲要係大喊個隻!!!!! 仲亂嗡話唔要呢間學校要留番係幼稚園, 自己仲係好細個云云... 終於都係喊住咁入課室, 老師一句:
"媽媽交俾我地啦!"
我就要轉身走, 小慈見我走仲狂喊到拆天咁滯, 個一聲 "媽媽呀~~~" 真係凄厲到走埋音 @.@ Round 1 衰左個頭, 我同秋都好失望, 灰心, 無言........
等緊老師叫名到我地面試之際, 應該已經係大半個鐘之後, 竟然見到小慈同其他小朋友搭住膊頭咁出番黎!! 小慈已經冇喊, 眼圈紅紅, 見到我地識笑, 就係呢個時候老師就叫名到我地家長面見, Round 2 有種希望重燃既感覺.... 面見我地既老師姓蔡, 佢問:
1. 出面咁多間學校點解要揀音小?
2. 點解會讀而家呢間幼稚園?
3. 點樣發掘小朋友既潛能?
4. 有冇發現小朋友有邊一方面既困難, 例如讀寫障礙?
5. 如果同學校政策有分歧會點做?
6. 有冇參加學校既工作?
7. 對小朋友將來既發展有咩期望?
最後, 蔡老師仲同我地一齊祈禱, 話我地係一個好愛主既家庭, 希望我地有更多既恩典祝福, 讓恩慈係教會既司琴 / 詩歌班上都可以榮耀主!
返去課室接小慈, 仲係眼紅紅既佢好安靜咁係課室入面等我地, 一見到我地就話:
"爸爸, 媽媽, 我頭先喊左一半, 老師唱歌我就已經冇喊, 但係因為我喊緊所以冇唱到, 佢地唱個首歌我唔識, 之後老師叫我畫圖案 (應該係個刀字冇左一撇) 我有畫得好靚, 仲有老師叫我地指幅圖畫, 係一個動物園黎既, 入面有好多小朋友, 有 d 好乖有 d 好曳, 我要指住邊個小朋友唔岩, 我指左 2 個, 一個係牆上面跳舞好危險會跌落地, 一個走左入去 d 動物入面會俾佢地咬架! 媽媽, 我喊左少少可唔可以帶我去冒險樂園呀? 唔該你啦, 我下次真係唔會再喊, 會好勇敢架!"
之前係應承左佢面試完帶佢去玩, 但一見到佢喊真係好灰心其實已經決定即刻返屋企! 聽到佢咁求我地, 我又唔忍心, 又唔係佢想要黎 interview, 又唔係佢決定要讀呢間學校, 因為佢喊而懲罰佢我感覺非常唔良好 V___V 雖然我都唔明白佢點解做唔到, 全場冇人喊係得佢一個係咁, 仲要喊到咁凄厲!!!! 但我地仰賴創始成終既耶穌, 神一定會俾最好既學校小慈, 只有神先知邊間學校適合佢! 如果喊到咁都收就真係神既旨意!!!!
算啦, I do my best, God do the rest!!!
尋日三號風球, 小慈就歡呼一聲 "放假喇~~" 今朝都仲係三號風球, 小慈就 "下?! 又黎? 我好鍾意返學呀...." 小朋友既心情簡直就如天氣一樣~~
我好少會打電話返屋企, 除非有野要提工人姐姐做 or 臨時有事, 好似今晚咁, 突然要 OT, 於是打番去吩咐姐姐開飯俾佢地食先! 因為少打電話, 所以佢地一聽到電話響就好興奮搶住聽!
小慈會話: "I want to talk to mama"
弟弟會話: "I want to 喂"
今晚仲估唔到聽電話既係小慈, 無師自通地識得㩒聽電話制, 仲要一開聲就話:
"媽媽, 我係小慈呀! 點解你仲未放工既? 我同弟弟今日好乖, 冇玩推黎推去既遊戲, 有分享有排隊冇喊呀! 我仲有自己練琴添呀!"
跟住到弟弟, 佢係一輪嘴咁講既:
"媽媽, 天黑架喇, 點解你仲未返黎? 咁耐都唔返黎, 你返咁耐工既? 你成日都唔返黎, 日日都唔返黎! 快 d 返黎啦, 我唔見左你呀! 你去左邊度呀? 太陽伯伯都收左工, 你都要收工架喇!"
好啦, 聽阿仔話收工啦!! 入到屋我笑左出黎!! 明明係工人姐姐幫小慈扎頭髮, 點解弟弟會變左樣? 真係笑瓜我喇 :)
感謝天父, 我既仔女真係真係好可愛!!
今日海馬襲港, 天文台發出 3 號強風訊號, 一早返工差 d 俾風吹走, 大風大雨到呀.... 雖然天氣唔穩定, 我同老公都決定出街食飯慶祝慶祝, 就近近地係番屋企附近食, 大風大雨渣長途車危險呀! 揀呢間餐廳因為鍾意佢個名 -- 2+2, 我地 6月22日結婚, 岩晒 :)
一家人齊齊整整, 健健康康, 笑聲笑聲滿載溫馨真係最大既祝福! 感謝天父, 賜我地豐富, 恩典夠用 !!
按教育局規定不能要求幼兒班既兒童執筆寫字, 再加上小慈間學校係唔催谷既幼稚園, 所以小慈 K2 先開始寫字, 已經學識寫 Aa-Zz, 1-100, 中文字寫公司, 信, 作病, 商店, 售賣.....
驟眼睇起上黎, 小慈識寫既字好似好少, 當然仲要睇下對比邊間幼稚園啦, 我都聽過有 d 幼稚園 K1 已經識晒 A-Z 仲已經串緊字, K2 已經寫大量詞語背埋成數表, 不過我地都係 d 唔催谷既家長冇咩所謂, 讀書可以讀一世, 咁早識晒 d 字做咩先?!
哈~~ 你話我地懶又得, 自由發展又得, 而家小慈對文字仲係好有興趣, 成日都問我呢個係咩字, 睇書見到佢識既字又好興奮咁! 今晚仲攪笑, 攞住支筆同我講佢識寫好多字, 咁我叫佢寫黎睇下啦, 小慈就問我寫咩好呀? 我問佢想唔想寫自己個名? 小慈好興奮, 於是我就學老師咁拆開個字依筆順教佢寫, 小慈臨摹能力又幾好喎, 字體大小比例都掌握到, 第一次寫算幾好
學習興趣先係我地想追求既野, 希望慢工出細貨, 學習態度凌駕一切! 我真係幾鍾意呢間學校好有經驗, 對小朋友真係好有耐性! 小明兩歲半之後, 老師打俾我話小明係學校好合作, 會主動同老師講去廁所, 但就成日都話去, 差不多每 10 分鐘就叫一次, 但次次去佢都真係屙得出喎 (呢樣真係要問下爸爸, 點解男仔可以少少少少咁屙既呢? 女仔一去就要去晒架麻, 每 10 分鐘一次真係能人所不能呢?!)
老師都發覺佢有 d 趁熱鬧既心態, 聽到同學仔話去廁所佢都例必舉手話要去, 當老師拖佢去街玩咁開心, 仲識教小朋友屙落廁所度唔好周圍整濕添! 為免狼來了既故事發生, 老師都要開始控制小明去廁所既次數, 請佢等一陣先去 / 儲多 d 先去, 如果佢真係好急就會賴, 不過暫時都冇失手, 學識忍住!! 老師都話小明進步左好多, 已經成個星期瞓醒晏覺條片片都係乾既, 可以嘗試係學校戒埋瞓覺片!! Yeah! 弟弟你真係進步得好快呀!
兩個都叻叻, 媽媽以你地為榮 ^8^
父親節獻俾偉大既父親 -- The World's Strongest Dad
偶然係網上聽呢個故事, 在美國波士頓, 有一個爸爸名叫 Dick Hoyt, 兒子叫 Rick Hoyt. Rick 在出生時因臍帶纏頸導致腦部缺氧受損成為不能走路也不能說話的植物人, 沒有任何希望只能在輪椅上渡過他的一生, 但他父母沒有放棄, 當 Rick 11 歲時, 更送他上特夫斯大學工程系, 為 Rick 裝了一部能用頭的側面控制滑鼠的電腦, 令 Rick 能和外界溝通
Rick 15 歲時, 一位中學同學因意外而癱瘓了, 學校為那位學生舉行跑步籌款, Rick 便透過電腦打出:「爸, 我也想參加!」 爸爸 Dick 之前並非跑步運動員, 也沒有跑過馬拉松比賽, 但因著兒子的要求就參加了! 他推著 Rick 跑完了 5 mile 全程, 在結束之後, Rick對父親說:
「我今生第一次不覺得殘障了!」
這句話深深地震撼了爸爸 Dick, 他決心要把那種感覺盡可能帶給兒子, 要參加 1979 年的波士頓馬拉松, 比賽當局不接受他們報名, 原因是 Hoyt 父子既不是單獨跑手, 又不是輪椅參賽者! 結果幾年來, Hoyt 父子只能在賽事中跟著大隊一起跑. 終於, 在 1983年, 他們參加了另一個馬拉松, 他們速度之快令他們能入圍參加之後一年的波士頓馬拉松! 不久之後有人對 Dick 說:「何不參加三項鐵人賽?」 一個從來未曾學過游泳的人, 一個自六歲起便從未踏過單車的人, 如何能拖著 110 磅的兒子完成三項鐵人賽? 但 Dick 還是勇於一試, 屈指一算，他現在已完成了 212 次三項全能賽！
因著父愛，父親去學習游泳，學習踏自行車! 他願意為 Rick 做出許多的犧牲和付出，他又曾拖著他的兒子越野滑雪, 又曾背著他爬山, 其中一次更用單車拉著他橫越美國!! 於是從那時候開始, 他們父子就常以 "Team Hoyt" 報名參加馬拉松和三項鐵人賽. 跑步時 Dick 就推著 Rick 跑, 游泳時 Dick 就拖著 Rick 躺著的橡皮艇游, 騎自行車時 Dick 就騎著特製的自行車將 Rick 放在自行車前騎. Dick 說, 他參加比賽純粹是為了看到 Rick 面上露出甜美笑容時的「奇妙感覺」
今年, Dick 與 Rick 分別 66 和 44 歲, 已完成了他們第 24 次波士頓馬拉松, 在 20,000名參賽者中排名第 5,083, 他們的最佳時間是在 1992 年的 2小時40分 -- 只落後世界紀錄 35 分鐘!! (這紀錄是由一個沒有推著輪椅的人所創的)
兩年前在一次比賽中, Dick 輕微心臟病發, 其後醫生發現他的一條大動脈有 95% 栓塞了!! 一名醫生對他說︰「若非你一直保持著這樣好的狀態, 你大可能 15 年前已不久於人世。」
現在, 儘管 Rick 有自己的住宅單位及享有居家照料服務, 並在波士頓工作, Dick 從軍隊退役後已在麻薩諸塞州的荷蘭市居住, 他們經常在全國各地發表演說, 而每週末也會參加極耗體力的比賽, 當中包括去年的父親節, Dick 請父親吃晚飯, 他最想送給父親的禮物就是:
「我最想送給爸爸的, 是爸爸坐在椅上, 由我推他一次!」
在影片中, Dick 推著 Rick 通過終點時, 他們父子都受到眾人的鼓掌和歡呼! 但這中間Rick 什麼都沒有做...... 他也什麼也都不能做..... 一切都因為他父親的愛而白白領受這些.....
好偉大, 好感動既父愛!!! 回看我的家, 我個老公都係一個好爸爸黎架! 一位出奇地溫柔既爸爸 :)
夜晚約左爺爺姑丈一齊食 buffet 慶祝父親節, 你睇呢兩隻污漕貓食朱古力幾開心
The World's Strongest Dad!! Happy Father's Day!!
