弟弟返左屋企亦都係我忙碌捱夜生活既開始.....
餵人奶都預左唔駛訓, 但估唔到係俾個 "姑姑仔" 玩謝左我! 唔明點解次次幫弟弟換屎片佢都一定屙殊殊?!?! 我已經好醒咁用濕紙巾掩蓋住, 但原來係阻擋唔到佢既勁射, 我同弟弟都成身濕晒換完屎片又要換衫手忙腳亂, 小慈個時唔係咁架, 真係男女大不同....
3:00pm -- 第 1 次返健康院 check up, 我自己同弟弟去, 因為工人姐姐要接小慈放學, 秋秋要返工, 我一個人都攪得掂既, 姑娘一聽到弟弟仲係屙緊胎屎就好緊張, 話唔夠奶食, 冇理由 3 日仲係屙綠屎!! 即刻見醫生, check 黃有 21 度! 要入威爾斯兒童病房照燈啊~
醫生話我餵人奶技巧要改善, refer 左我俾人奶小組, 我好沮喪, 明明今次我自覺好有經驗, 又谷奶, 又真係有奶, 阿仔都食得幾好, 每 3 個鐘自己識叫食 1 次, 點解咁都叫餵得唔好?!! 我粒聲都唔出, 有咩好講....
人奶小組既姑娘話我技巧已經好純熟, 當然有地方要改善啦! 話我唔應該用個身就 bb, 應該將 bb 放埋黎自己度, 以自己最輕鬆既角度去餵, 而家已經俾弟弟咬損左我啦! 個胸又硬又有一粒粒, 因為乳線塞左, 出奶出唔晒就會塞, 用手幫我摔散佢, 痛到我喊啊 >.< 跟住就教我用手吱奶, 雖然係痛到喊, 但真係有鬆左少少既感覺, 因我開始谷奶已經有 d 頭痛!
姑娘見我聲都唔聲下, 問我係唔係好唔開心呀? 我話梗係唔開心啦, 小慈個時都 5 日先入院, 而家弟弟尋日先出院今日又要入番去, 我點會開心?! 諗起已經想喊! 又自責, 又內疚, 已經第 2 胎都唔識湊..... 姑娘安慰我, 話我傻既, 胎胎情況都唔同, 生 10 個都未必有經驗啦, 有就唔駛要姑娘啦云云.... 姑娘教我唔好羅人奶去醫院, 係屋企儲人奶庫, 由得醫院餵奶粉, 唔駛驚 bb 食慣奶樽唔肯埋身啜, 出院先同 bb 洗腦, 肚餓起上黎咩都會食既, 唔好擔心, 照同 bb 入醫院, 有姑娘幫你餵夜奶, 自己係屋企訓多 d 食好 d, 養好精神等 bb 出院先照顧佢! 聽到姑娘咁講我開心左 d, 個心定好多
4:00pm -- 係威爾斯 7B 病房, 估唔到闊別 2 年半又要返黎呢度 弟弟得 2.93kg 咋!! 又輕左咁多?! 真係冇奶飲過落肚咩? 抽血驗黃有 297!! 好高啊~~ 攪入院手續之後, 醫院問我餵人奶定奶粉? 有上一次經驗加頭先健康院姑娘教路, 今次我冇執著亦都冇咁緊張, 餵奶粉就餵奶粉啦! 呢期醫院飲 S26, 我細個都係飲呢隻, 唔知弟弟受唔受得呢? 小慈個時飲完屙硬屎我冇俾佢飲, 而家俾弟弟試下谷佢做肥仔先!
弟弟真係同小慈好唔同, 小慈個時飲奶樽係搶住黎架! 弟弟就好似唔想飲咁, 超慢~~~~~~ 60ml 奶飲成個鐘仲要獲利回吐! 飲 2 啖嘔 1 啖咁真係羅命!!
已經 6:30pm 喇, 要趕返屋企食飯仲有陪小慈, 小慈返屋企見唔到弟弟肯定好傷心呢....
將弟弟交俾醫院照顧, 求神保守!!
沒有留言:
張貼留言